HEROIN (No. 4) TEHKHÂWNG LEH A MAN

Hàwng 440 aṭangin heroin tehkhâwng leh a man zat hian ngaihven a hlawh zual a; a hre chiang leh a leitute zawh kual aṭanga hriat theih chin thai lang ang aw.

Hàwng aṭanga cap

Ruihhlo hlauhawm heroin hàwng 1 hi a tlangpuiin gram 12.5 -13.3 a ni a. Hei hi Central YMA hnuaia Supply Reduction Service (SRS) an taimak vanglai khan a man pawh a sang chho hle a, hàwng 1 kha Rs 35,000 a ni phâk niin hriat a ni.

Drugs ngawlveite hnenah hian hralh chhawng turin engtin nge an tih? Hàwng 1 kha Penicillin bûrah an ruak chhuak leh vek ṭhin a, a tlangpuiin hàwng 1 chu Penicillin bûr 35-ah an bun chhuak thei ṭhin. Penicillin bûr 1 chu 'cap' an tih mai (bûr tê zawk a chhin sen) ngawlvei hnen thleng ta tak tak bûr 12-ah an siam leh ta ṭhin a ni.

Heti hi a nih chuan heroin hàwng 1 aṭang hian damdawi ngawlvei hnena thleng thei zat chu 'cap' 420 tihna a nih chu. A tam tham hle. Ngawlveite hian cap 1 hi Rs 100–500 ten an lei ṭhin a ni awm a. Mahse, a rate hi a ngai reng lo tih erawh kan hriat a ṭha, Rs 100 chauh te pawha hralh/lei châng an nei.

Tun hnaia lâr em em hàwng 440 hi Penicilin bûrah an bun chhuak leh ang a, hàwng khat chu bûr 35-ah an bun ang a, hawng 440 chu búr 15,400 lai a ni. Chumi vêk chu a aia bûr tê zawk cap-ah an bun chhuak leh ang a, Penicillin bûr 1 chu cap 12-ah an bun chhuak thei a; chuti a nih chuan hàwng 1 chu cap 1,84,800 a ni ta. Cap khat Rs 500-in lo hralh ta se, hàwng 1-ah Rs 9,24,00,000 lai a chhuak dawn a ni.

Heroin man a tlahniam

SRS an active vanglaiin heroin (opioids no. 4) man a sâng viau tih a ni a, a váng a, a kawltu nih a hlauhawm bawk. SRS a ngai pátin an kal reng thei lo a, a man a danglam fo rêng a ni. SRS hràn tak tak laiin heroin hàwng 1 Rs 35,000 te kai a, cap 1 Rs 350 te ni ṭhin kha tunah chuan a tlâwm riau tawh niin thu dawnna chuan min hrilh.

Tuna Mizorama heroin man a tlàwm chhan hi Burma raltlan kan rama an tam vang niin thu dawnna hian a sawi. Tun dinhmunah chuan hàwng 1 hi Rs 20,000 a kai pha ṭâwk a ni awm e. Heti a nih chuan SRS active vanglaia hàwng aṭanga Penicillin bûra an daha bûr 1 Rs 3,500 te ni phak kha tunah chuan a phak dawn tawh lo hlein a lang.

Penicillin búr 1 hi tunah chuan a sang berah Rs 2,000 bak a niin a rinawm loh tih thu dawn a ni a. Heti a nih chuan Penicillin bûr 1 hi cap 12-ah a chhuak leh thei a, cap 1 hi Rs 200 velin an lei theiin a rinawm.

Hàwng 440

A chunga tarlan aṭang hian heroin hàwng 440 aṭanga cap chhuak zat tur chu kan chhût thiam awm e. Cap 18,48,000 vel a chhuak thei tihna a ni a, cap 1 hi drug ngawlveiin vawi khat inchiuna atana a hman tâwk tura ruahman a ni. Vawi nuai 20 dawn tehmeuh mai inchiuna tur hi hàwng 440 chahtu/neitu hian Mizo ṭhalaite zingah a ‘vawrh’ dawn a tih theih; a rapthlak lutuk hi sawi dan tur pawh thiam a har zawk e.

~ Zoa Tlau, Buannel Cabin