Lammual hmunah Science Centre

Assam Rifles hovin Aizawl Sipai Lammual an chhuahsan ta mek a. He hmun zau ṭha tak, khawpui laili lai taka awm hi engtiangin nge kan cheibawl ang a, kan hman ṭangkai ang tih duhthu sâm hun lai tak a ni. Kan Chief Minister pawhin Legislative Assembly House awm nan a ṭhat a rin thu a sawi tawh a; sports lam tui mi chuan sports complex changtlung tak dah nan an awt ngei ang. Chutih laiin, kan khawpui berah hian mipui tam tham punkhawmna tur hmun kan neih loh avangin auditorium lian tak, YMA leh kohhran khawmpui lian pawh thleng zo tur ruahman tel a awhawm hle. Environmentalist rilru pu chuan thil dang vawm lut lovin thing phun belh a, Aizawl khawpui boruak vawng nuam thei khawp ngawpui siam nan an awt ngei ang.

Hetih lai hian, Science Teachers’ Association, Mizoram (STAM) chuan science centre dah ngei ni se tih hi an mitthlana a lo rei tawh hle. Kum 2012-a an conference chuan, “Aizawl khawpui chhunga Assam Rifles-in an ram an chhuahsan hunah Science Park tur ruahman ve ni rawh se” tiin resolution an siam daih tawh a ni. Science Park hian hmun a duh zau deuh dawn avanga kan phal lo a nih pawhin, science centre hi Assam Rifles chhuahsan hmunah hian suan luh ve ngei ni se kan hlawkpui hle ngei ang.

Science centre chu eng nge ni a, helai hmuna science centre dah hi kan hlawkpuina tur eng nge ni ang? Science centre function chu science, technology leh environment lama mipui, a bikin zirlaite’n hriatna zau zawk leh hmasawnna an neihna tura centre lo siamsak a ni ber mai. Science centre din tur hian hmun zau ṭha tak awm thei se duhthusam a nih laiin, building lian ṭha deuh pathum pali vel chauh pawh awm se hlawkpui tham takin a kal theih ngei ang. Tuna kan Science Centre neih hi Aizawl khaw pawn Berawtlangah a awm daih avangin tlawh duhte tan sum tam fe sen bakah, hun leh tha tam tak seng lo chuan tlawh theih a ni lo. Aizawl khaw pawna awm a nih avang hian Science Centre lam pawhin an programme neih ṭha tak takte hi an kalpui hlei thei hrih lo a ni awm e. Heti taka tlawh a harsa chung pawh hian tlawhtu a nei ṭhahnem viau ṭhin a ni.

Science Centre hi a bultumtu chu Ministry of Culture hnuaia autonomous scientific organisation–National Council of Science Museum (NCSM) a ni a, anni hian infrastructure leh technical lamah ṭanpuina hrang hrang an pe ṭhin. NCSM hmalakna tlangpui chu a hnuaia mi ang hi a ni:

a) Kan ni tin nun, eizawnna leh ngaihtuahnaa ṭangkai tur thil mipuite kawhhmuh.

b) Science, technology leh industry lama mipui tihhmasawnna tur thil ṭangkai leh hlu lak khawma vawn ṭhat.

c) Science lam thil hlu leh ṭangkaite pho chhuah a, chumi hmanga mipui leh a bikin zirlaite hnena zirtirna pek.

d) Exhibition, seminar, science camp leh programme dang dang buatsaih.

e) Science zirtirtu leh zirlaite, thiamthil hmanga eizawngtu leh eizawn tumte training pek.

f) University, technical institution, museum, school, college leh pawlho te nen thawhho leh chungho puihte leh, thil dang dangte a ni.

Science Centre hi mipuite’n an lo hlut viau a ni ang. Kan hriat lar deuh ber tur Kolkata-a Science City khu a gate pui luh man ringawt pawh Rs 70 lai a ni chungin May 2022 chhung ringawt khan tlawhtu mi 1,60,000 lai zuk nei a! Entry fee ringawt aṭangin thla khat lek chhungin Rs 1,12,00,000 (cheng vaibelchhe khat leh nuai sawmpahnih) lai an la lut a nih chu. Science exploration hall hrang hrang leh thil dang en vek dawn phei chuan gated puia luh man Rs 70 bakah Rs 500 chuang sen belh a la ngai zui. Tlawh a manhla viau a ni ang.

Keini pawhin Aizawl hmun laili laia centre kan neih chuan revenue kan hmuh tur hi a ṭhahnem tham khawp ang. Science Centre ṭangkaina tur pawimawh tak pakhat chu – mi tin tana thil hmuhnawm leh ṭangkai, hlimawm bawk si chhawp chhuahsak a ni ber. Kum upa lam hi chuan ngaihtuahna thar kan hman peih tawh vak loh avang leh hma lam hun kan ngah tawh loh avangin a chhawr ṭangkai tur ber chu zirlaite an ni ngei ang. Science Centre-a thil pho chhuahte hian zirlaite hnenah ngaihtuahna thar hmang turin chona (challenge) nasa tak a pe dawn. Khawi ram mai pawh hian ro hlu (assets) a neih hlu ber chu zirlaite an ni a, an ngaihtuahna kan chher dik a pawimawh tak zet a ni.

Tun dinhmunah chuan zirlaite suangtuah tur kan chhawp chhuahsak ber chu – football, idol, icon leh entertainment chi hrang hrang a ni a, ni tin zan tin kan châwm a. A hâwkdâk lo deuhin computer games zankhuain an khel thung. Instagram leh Facebook lam pawh kan zirtir ngai hauh lovin an thiam hneh khawp mai. Hetih lai hian, zirlaite ngaihtuahna puitling an neih theihna tur chhawp chhuah kan nei lo hle. Kan ngaihtuahna hruaitu ber chu ni tina kan hmuh leh kan tawnte a nih miau avangin thil ṭha, an suangtuahna hruaitu tur chhawp chhuahsak a ṭul tak meuh a ni. Scientific thinking leh reasoning an neih theihna turin Science Centre aia ṭha Lammual hmuna dah tur hi a vâng khawp ang.

Han kir leh ila, Science Centre hi a dintu NCSM-in an phût ang tak, khawpui laili lama kan dah chuan tlai tin zirlaite’n an sikul bânah an tlawh thei ang. A ṭha lama an ngaihtuahna thui taka hruaitu tur thil chi hrang hrang an hmuh bakah, a thu chauhva an zir ṭhin, an hriatthiam hleih theih loh thil chi hrang hrang, entir nan–thlaiin chaw a siam dan leh boruak ṭha min pek dan te, nungcha khawsak dan hrang hrang model te, van thengreng leh tuifinriat chhung lan dan te, kaihruaitu kaihhruaina hnuaiah mit ngeiin an hmu ang a, an khawih bawk ang a, an zirlaiah a pui nasa hle ang. Chu bakah, nungcha leh ramngaw humhalh pawimawhzia thu maia sawi ai chuan Science Centre-a an thil hmuhte’n nasa takin thu a sawi thûk zawk ngei ang. Tin, thlasik khaw thian zana arsi kan hmuh aia chiang daihin planetarium hmangin kan universe a hmuh theih dawn a, a hlâwk hle ang. Building kawt thing hnuai velah khaw hawi tinuamtu tur, entir nan, tui chik chhuak (fountain) te, lawng lian, thlawhtheihna, tank, etc. model-te han dah se, Aizawl khawpui laili cheimawina ṭha tak a ni ang a, thil manhla tak a ni ngei ang.

Kan mamawh tak mipui pun khawmna tur hmun auditorium lian pawh Science City/Center huam chhungah hian a dah tel theih ang. India rama Science City lian ber, Gujarat Science City (Ahmedabad)-a an auditorium khu lian ṭha tak a ni a, mi 2,000 chuang zet an leng. He auditorium bakah hian entertainment atan pawha hman remchang, mi 700 zet ṭhut theihna 3D theater pawh a awm a, chung nei lo (open theatre) zau takte hlei hlei khu pun khawm nan a remchang emaw tih tur a ni. Kan hnaih ber, Kolkata Science City chhunga auditorium-ah pawh khuan mi 2,000 chuang zet an leng. Hetiang pui pui hi kan hmunhmain a zo lo a nih pawhin, ruahmanna fel tak a awm chuan puipunna hmun remchang pawh Science Center huam chhungah hian a bilh tel theih tih chu a chiang a ni.

Hawi khawthawnna tur park-te pawh kan awt hlawm a; chutiang hmun atan pawh chuan Science Center/City aia ṭha a awm kher lo ang. Science City-ah kan lên luh chuan kan hawi khawthawn paha thil kan hmuhte hi kan hriatna tizautu a ni nghal a. Tunlai technology hmasawn chak tak khawvelah chuan naupang inawmlemna tur pawh science hmunte hian a pe ṭha ber ang tih a rin theih. A hmunhmain a zawh phei chuan botanical garden changtlung tak pawh Science City chhungah dah tel ṭhin a ni.

Theih ni se, AR ho chhuahsan tur ram zawng hi thing hmun (green belt)-ah siam ta ila, eng emaw chen chu kan Aizawl khawpui hi a vawng nuam deuh ngei ang. Amaherawhchu, kan ngaihtuahna hruai ngiltu tur kan dah tel loh erawh chuan kan nula tuai tìr te, an top-up man atana lo inhralh nan te, AIDS inthlahpun nan te, OD nante kan hmang mai mai ang tih pawh a hlauhawm hle ang.

Engpawhnise, kan sorkar hian Lammual leh a chhehvel hman dan tur ngaihtuahtu committee a din thuai turah ngai ila. Chung mithiam leh hawi zaute chuan tun huna kan mamawh mai ni lo, kan tu leh fa te thlenga ṭangkai tur asset ṭha tak an ngaihtuah chhuak ngei turah i ngai ang.

- Dr. R. Lalengmawia