Sorkar hnathawk rilru dik ka tawng nual

Mizoram sorkar chuan mirethei zawkte damdawi ina an inenkawlna turin sorkar hnathawk, an hlawh tam dan azira a cut tur chu sorkar hnathawk rilru zau leh dik tam tak chuan an thlawp viauin ka hria a, a lawmawm ngawt mai. Pawisa hi sorkar hnathawk pawhin indaih tak tak a awm meuh lo a, kan inrenchem dan azir a ni mai awm e.

Mizoramah hian sorkar tan sum lak luhna a vâng em em e, sorkar tan pawh chhiah lakna awm ang ang dap a ngai a, a dap kim viau tawh pawhin a lang. Motor oil-ah pawh kawngpui thawm ṭhatna tur te, zirna hmasawn nana hman turin rate a tisang a, chhiah a la tam ta deuh tih zawng a la ni awm e. Sum lak luhna ber tur leh Mizoram mipui sum kal ral lohna ber tur ZU kan zuar ngam si lo. Zu zuar lo tura awrâwl ring fahran kohhran lah hian chhiah pek lamah ngawih an chuh tlat bawk si.

Tuna sorkarin healthcare a ruahman thar hi a tihpuitlin theih chuan mi harsa zawkte tan chuan lawmawm tak tur a ni. Mahse, thu inbât a la awm avangin private hospital-te'n an la pawm thei lo a, an la pawm ve mai turah ngai ila. An pawm theih tâwk tur pawhin sorkar hian uluk takin ruahmanna siam se, an hek lutuk lohna tawk ngaihtuah chhuah a har lo turah ngai phawt mai teh ang.

Insawiselna pawh ni bik loin, Mizorama private hospital inenkawlna hi ngati nge a san em em ni le? Phai lam hospital aiin a sang bik far far hle tih chu tlang hriat a ni. Kan ṭhianpa pakhat chuan, "Doctor-te'n room/ward an rawn fang fo hi lawm em em tur a ni lo. Kha doctor rawn fangtu khan pawisa a hlawh a, hospital-in eng emaw zat a chang bawk alawm," a ti a; a dik awm e.

Mizoramah sorkar hna bak thawh tur a tam lo tih kan hre vek. Tuna sorkar hnathawkte pawh hian vannei an inti viau a; sorkarin mi harsa zawkte inenkawlna tur atana an hlawh mila pawisa a pektir (cut) tur pawh hi an hrethiam viau chuan a lang a, a lawmawm khawp mai.

Heng sorkar hnathawk rilru dik putute hi chuan lallukhum pawh an khum chhah bik hial ka ring. A chhan chu, a ruaituin an lakah pûr a chaw tlat a, an pe lo thei lo a; phal taka petute a nih kha Pathian pawhin a lawm em em ni.

Healthcare atana pawisa thawh hreh tlat sorkar hnathawk la awm tlem azawngte pawh lo inngaihtuah chiang se ka duh hle mai; lunglohah la loin, sorkar ruahmanna hi pawm ve mai se la a lawmawm hle ang.

Kan healthcare atan hian sorkar hnathawk lote pawhin pawisa an thawh a, an sawisel lo. Sorkar hnathawkte pawh pawisa thawh ve tura sorkarin a ti a nih chuan an thawh ve mai tur a ni. Pawisa thawh ve loh hi an dikna chanvo (right) a ni bik lo ang. Sorkar hnathawk lote'n cheng nuai 5 thleng hamṭhatna an hmuh theih dawn laiin, sorkar hnathawkte chu a tam lamah bithliah a awm lo lehnghal a; pawisa thawh rau rauah sorkar hnathawkte hamṭhatna chan theih zat nasa takin a la tam zawk a ni.

- Lal Rinmawia