Kan ram a dam lawk lo ang

Thupui êng lam zawnga dah ka duh hle lain, a thim zawnga dah a ngai tlat hi hreawm ka ti hle. MLA inthlan kan neih khan party pakhat khan huapzo sawrkar din, politics-a Pathian ram thlentir kha thupui pakhatah an nei kha a ni a. Kha khan neutral-te rilru a la viau niin a lang a, sawrkarna pawh an siam ta reng a ni. Thil lawmawm tak thawm kan hriat leh chu opposition lian ber MLA-te khan positive role ti deuh khan kal an tum ni khan an insawi a, ṭha hle dawnin a lang.

Sawrkar thar a piang a, Lammualah mipui kan ṭawngṭai a, sual thupha chawina leh in hlan tharna kan nei a. Sawrkarin State Day chu ram pum huap ṭawngṭai programme-a hman turin Organizing Committee a siam a; Lammualah leh hmun hrang hrangah ram pum huapa ṭawngṭai nan hman a lo ni leh ta zel bawk a. A va ṭha dawn em ve aw, kan lo ti leh a ni.

Amaherawhchu, hun a han kal deuh hlek a, kan hotute’n session an han nei a, opposition leh kan ruling han intih tawn vel dante ngun taka thlirin, a hmaa ka lo suangtuah ang reng rengin thil a awm ta mang lo. Chu chauh ni lovin, kan ramah chanchin ṭha lo hrang hrang a lo inlâr leh ta. Engtizia emaw ni, kei chu ka rilru a ipik leh ta tlat mai a, ‘Engtin nge, ni zel ang le,’ tih hla kha rilruah a lo awm.

Kan ramah thil lawmawm tak lo awm chu nikum October thlaa CCM (Council of Churches in Mizoram) ding kha a ni. CCM lo piang kha a lawmawm hle a, khata la tel remchang lo kohhrante pawhin an zawm zel theih nan hotute’n hma an la ang a, hlim takin Mizoramah kohhranin bung thar a kai tak tak ang chu, tia kan thlir laiin, MKHC nen a lo la in parallel a, a eng zawk nge pawimawh ta tih pawh hriat hleih theih lovin a lo awm a. Chu chauh ni lovin, kohhran hote’n rorelna sang ber kan nei zo ta hlawm a, ram tana thawhna lamah ke kan la pên ho thei leh ta rih lo chu a ni. Hetiang a nih chuan kan ram hi a dam lawk lo ang tih a hlauhawm hle.

Kohhran hi tu tute emaw chuan an bei deuh ṭhin a, pastor te, upa te, thawhlawm chungchangah te, a chang chuan kan haw deuh ṭhin a ni. Kohhran pawl hrang hrang kan awm a, chutih laiin kan ram chhiat leh ṭhat thuah hian tute nge mawhphur tih chhanna hi kan ram hruaitute kan ti mai thei, mipui pawh hi kan ni ve tho bawk. Chutih lai chuan, kohhran hruaitute hi kan ram chhiat leh ṭhat thuah mawhphurtu lian ber an ti ti ila, a sual awm lo ve.

Kan kohhran hruaitute inlaichin leh thawhhona chungchanga hetianga kan awm chhung chuan kan ram hian dam ni hmel a hmu lo ang tih a hlauhawm a ni. Kohhran hruaitute rau rauah pawh kan la zah em em kan kohhran hruaitu hlui thu la nei fute hi an inenfiah a ṭulin a lang.

- Rev. Biaka, Ramhlun South