Rorelna pakhat hnuaia awm hi

A KAMKEUNA

MNF dintu Pu Laldenga (L) khan Mizoram zau zawk ‘Greater Mizoram’ a tuipuiin a buaipui hle a. Kum 20 zet silai nen zalenna a sual hnuah India ram bung khat (integral part of India) ‘state’ pangngai a rawn hawn a, a sa kah chu a lian teh fahran lem lo a ni ber mai! Remna Thuthlung (Peace Accord)-ah pawh ‘Greater Mizoram’ tih hi telh a ni lo; a chhan erawh sawi tur tam tak a awm thei.

GREATER MIZORAM CHU

Zo hnahthlak tawh phawt chuan Greater Mizoram tih hi ṭawng kauchheh berah kan nei ta emaw ni? Inthlan dawn hnaih apiangin kan sawi ri tel ngei ngei ṭhin. ZORO, politician, mihlim, intizawlnei leh evan, missionary leh Mizo hnam chhuitute lah hian chawtak khûkin an khûkpui chiam ṭhin em maw ni? Hahîpin an sawi leh hluai ṭhin.

India Danpui Article 3 chuan Parliament chu state thar din theihna thuneihna a pe a, state awm tawhte hmun, ramri emaw, hming emaw tihdanglam theihna thuneihna a pe a, chutianga tih dan tur pawh a tarlang bawk. Hei hi ṭan chhanin Mizoram ramri dep Myanmar, Bangladesh, Manipur, Tripura leh Assam-a Zo hnahthlakte chenna chin zawng zawng chu Zorama rin luhtir tum ni âwm takin pulpit tlang aṭang leh politik dawhsan hrang hrang aṭangin nutling patling, intifing âwm pui puiin chil phuan tla buah buahin an sawi châmchi ṭhin. Mahse, tun thlengin hei hi a tak hmuh tur a la awm lo va, thu vaûk mai a ni e.

Kumipinu sawrkarin min chhuahsan hlim khan Greater Mizoram hi an tihfel tawh loh laklawh hnuah pawh, Remna Thuthlungah leh zel pawh telh a ni ta lo va. A aia nghet lehzual sauhin, suihtakin India ram bung khat (integral part of India) ni nghet lehzual turin June 30, 1986 khan suih hnan kan ni tawh a. Chuvangin, hetianga politik puarpawlênga inham buai reng tur kan ni tawh lo. Kan ram ngeiah hian hmasawn tumin lungawi takin inbengbelin insawhnghet sauh sauh zawk ila, kan ram leh hnam hi a dingchhuak hma zawk ang.

GREATER MIZORAM KAN DUH CHIAH EM

Greater Mizoram hi a taka hlawhtlin kan duh tak tak em? Hlawhtling tak tak ta se, tuna tuipui êm êmtute hi a ning hma hma an ni zawk mai thei. A chhan chu, Zo hnahthlak ṭheuh ni mah ila, kan chenna geographical area leh sawrkar hrawn a danglam ang bawkin kan khawsak zia leh sûkthlek dan pawh a inang lo hlawm hle. Chutih rualin, hmun hrang hranga Zo hnahthlak awm zat hi kan hriat a ngai a, i lo bihchiang lawk teh ang.

MYANMAR: Myanmar rama Mizo awm zat hi mi nuai 250,000–400,000 inkar vel an ni. Anni hi a bul berah chuan Kalay, Khampat, Mandalay, Pyin Oo Lwin, Rihkhawthar, Tamu, Taunggyi, leh Yangon khawpuiahte an awm khawm ber a. Hriat tur pawimawh tak chu, Mizo 2,00,000 chuang chu Kalay khawpuiah an awm a ni.

BANGLADESH: Bangladesh-a Mizo awm zat hi chiang takin hriat a ni lo. Mahse, Mizote hian kan ṭhenawm ram, Myanmar leh Bangladesh-ahte hian hmun pawimawh tak kan chang tih hriat a ni. India ramah chuan Mizoram state-ah kan khawsa ber a, Manipur, Assam, Meghalaya leh Tripura-ahte Mizo eng emaw zat kan awm bawk. Mizote hian culture heritage hausa tak leh identity hriatna nghet tak kan nei a, chu chu kan ṭawng, kan nunphung leh kan hnam danah a lang chhuak. Bangladesh-ah hian Mizo 2,700 vel an awm nia ngaih a ni.

ASSAM: Assam state-a Mizo awm zat hi chiang taka hriat a ni lo va, mi 20,000–30,000 vel a ni mahna? British colonial hun lai khan Assam province-ah kan tel ve a; India ramin zalenna a hmuh hnuah pawh Mizoram hi Assam-ah a awm reng a, kum 1972-a UT pek kan nih hma chuan Lushai Hills district a ni. Assam-ah hian tuna Mizo awm zat hi chiang taka hriat theih a nih loh laiin, Mizo khaw ṭhenkhat chu Assam state chhungah an la awm a nual a, a bik takin Mizoram ramri hrûlah an la awm nual a ni.

TRIPURA: Mizo hian India ram Tripura state-ah hian hmun pawimawh tak kan chang a. Tun hma lam aṭang tawh khan Lushai tlang, tuna Mizoram tia hriat ṭhin hian Tripura nen hian ramri kan nei a, kum zabi 19-na chhung khan Tripura, Cachar leh a chhehvela hmun dangah Lushai lalte’n an bei a ni. Tunah chuan Tripura-a Mizo community chuan Mizorama keini an chipuite nen hian culture inzawmna nghet tak an nei reng a, kan hnam dan phung an hmang chhunzawm zel. Mizo ṭawng an hmang chhunzawm zel a, Mizo culture Tripura-a Mizo population hi Mizo diaspora lian zawk zinga mi an ni. He diaspora hian Indian state dang Assam, Manipur, leh Meghalaya-ahte Mizo hlâwm lian tak tak kan nei bawk. Hmun hrang hrangah ṭhen darh ni mah se, Mizo khawtlang chanchin, kan nunphung leh kan hnam dan inang tlang tak takte chuan min intipumkhat ṭha hle a ni.

MANIPUR: Manipur-ah hian Mizo (Lusei) bik hi mi 10,520 vel awma ngaih a ni. Manipur-a Kuki awmte hi an langsar hle a, Kuki hnam eng emaw zat chu state chhunga southern hill district-ah an awm.

Manipur-a Kuki hnam langsar ṭhenkhat chu:

Gangte: Manipur-a Kuki hnam lian zinga mi an ni.

Hmar: An hnam nunphung leh an hnam dan hrang hranga hriat hlawh tak an ni.

Paite: Churachandpur district-ah hian an tam ber.

Simte: Manipur-a Kuki hnam langsar tak dang an ni.

Sukte: Manipur tlang ram hmun hrang hrangah an awm.

Thadou: Manipur-a Kuki hnam lian ber pawl, state chhungah tam tak an awm.

Vaiphei: An hnam nunphung hausa tak avanga hriat lar an ni.

Zou: Manipur-a Kuki hnam langsar tak dang an ni.

Kum 2001 chhiarpuiah khan Manipur-a Kuki-Zo awm zat chu state chhunga mihring awm zawng zawng zinga 16% vel an ni a, tunah phei chuan an tam belh tawh viau tura ngaih a ni. Tichuan, Kuki Zou 16% leh Lusei 10,250 nen phei chuan Zo hnahthlakte hi kan tam tham hle ang.

MEGHALAYA: Meghalaya khawpui Shillong-ah Mizo tam tak an awm. Kum 2011 chhiarpuiah khan Mizo 1,43,229 an awm a, tunah phei chuan an tam tawh hle ang. In hmun lo ram neia inbengbel pawh chhungkaw eng emaw zat an awm. Mahse, Greater Mizoram huam chhunga rîn luh ve chi chu a ni lêm lo vang. Chutih rualin, rorelna pakhat hnuaia inpumkhat duhtu vek an ni ve tho tih kan hriat erawh a ṭha.

A TLANGKAWMNA

Manipur-a mihring awm zat hi kum 2023 thleng khan mi 35,38,621 vel an ni a, chuta ṭanga Kuki-Zo awm zat 16% chu mi 5,66,179 an ni a, Manipur (Lusei) mi 10,520 nena belhin Zo hnahthlak awm zat chu mi 5,76,699 an ni. Myanmar-a Mizo awm mi nuai 4,00,000, Assam-a mi 30,000, Tripura-a mi 2,700, Bangladesh mi 2,700 leh Meghalaya Zo hnahthlak mi 1,43,229 zawng zawngte a vaia belh khawmin mi 11,55,768 an tling pha a ni. Mizoramah lo haw khawm vekin rorelna pakhat hnuaiah awm khawm tak tak dawn ta ila tuna Mizorama awm sa zat aia ṭhahnem zawk mah an rawn awm belh dawn tihna a ni a. Eizawnna kawng hrang hrang, politik, sawrkar hna leh kohhran, NGO, kawng engkimah a chhunga awm sate aiin an vengvain an laktlak zawk vek mai thei a, chutiang a nih ngat chuan a chhunga lo awm sate ai hian kawng engkimah an zeihawi zawk phei chuan mi tam tak hi kan dâwngin kan dawha reng thei mai dawn a ni.

Chuvangin, Greater Mizoram tlangaupui dum dum ṭhinte hian ngaihtuah chiang se, rorelna pakhat hnuaia awm hi an duh tak takin a châk tak meuh em tih hi zawhna awmze nei tak chu a ni e. Myanmar lam aṭanga kan unau tlemtê lo lutte pawh Pu Vanlalsailova'n a ngaimawh ṭan titih dêr mai khan a lang a; khawvel huapa Zo hnahthlak zawng zawngte phei hi chu rorelna pakhat hnuaiah awm khawm tak tak ta ngat ila chuan, ni tin kan invaw hlum pheng phung lo vang tih tu nge sawi thei le? Chuvangin, Greater Mizoram hi zawng buaipui lul tawh lo teh ang u khai! 

- Dr. C. Lalrampana