Bûkna hlauhawm

Sap thufing 'Comparison is the thief of joy' tih hi Mizote hian nunah lantir ila a va ṭha nasa dawn em.

Thil kan han tisual a, chhungte’n ṭhenawm naute emaw, keini aia fel leh theite nen min han khaikhin nghal zat a, a chang phei chuan keimahni ai pawha fel hlei bik lote nen min bûk a. Thirtiang ling vut hmanga thin khei ngar ngar ang mai a ni. A ngeiawm dan hi mi rilru hrisel pangngai tak tan pawh beng lehlama chhuahtir mai a harsa khawp ang le. Mizote hian kan ching tam hle. Ani pawn a thei, chuti chuan a ti, chutiang chuan a awm, eng nge i theih ve loh, tihte hmangin nu leh pa tam takin an fate an zilh fo.

A chhan bera lang chu–an fate an fuih phûr (motivate) duhna, an fate ṭhatna tur ngaihtuaha chham chhuak an ni tlangpui. Amaherawhchu, an fate chu mahni inhlut thiamna (self esteem) leh mahni inrintawkna (self confidence) tihchhiatna hmanraw ṭha ber hmangin an bei a ni reng si. Mahni inrintawkna leh inhlutna nei ṭha tawk lo mihring chan tur chu kan suangtuah thiam ṭheuh ang.

Chu mai pawh chu a la ni lo. Mi dang nena khaikhin a nih fo chuan chu mihring rilru sûkthlêk dan chu a inher khawlo zo ṭhin.

Ṭhalai chuan a ṭhian te, a unaute thlengin a îtsîkin a engto phah thei a, mi dangte engtona tluka mihring tichhe nasa thei hi a tam lo khawp ang. A unaute leh ṭhiante nena khaikhin a nih reng chuan a rilru chhungril (subconcious mind)-ah anni chu a hmelma, a elpui angin a lo intuh ta ṭhin. Chhungril aṭanga ei chhetu huatna (hatred) thlengin a lo pian phah thei a ni.

Fate chu zilh an ngai a, hauh an ngaih hun a awm a. A ṭul chuan vuak châng te pawh a awm thei (ṭul zing lutuk lo se). Fuih an ngai a, an ṭhat lohna leh tlin lohna pawh hriattir a pawimawh. A hring a hrâna mi dangte nena khaikhin nghal zut erawh i ti lo ang u.

Theih zawng leh thiam zawngte a inang lo a, hemi avang hian theih zawng a inang lo tih ṭan chhana dawihzepna chhuah erawh i ching lo ila.

- MS Dawngzela (Dingdonga)