Raltlan enkawl dan policy neih a ngai

Mizoram hi Zo fate Jerusalem tia kan sawi mek a ni a. Mizo inti duh miah lote pawhin an mangan tawpah chuan Mizoram bawk hi an rawn raltlanna tur a ni a, kan tan lo hnar a har tho tho dawn; kan lo tuamhlawm zel pawh a ngai ang.

Tun dinhmunah pawh raltlan hi Manipur, Bangladesh leh Burma aṭangin kan nei mek tih kan hre tlang vek. Hun lo kal zel turah pawh tuna rawn raltlan mekte mai bakah, Tripura leh Assam aṭang pawha raltlan la nei thei kan ni. Chuvangin, raltlan enkawl dan tur mumal hi sorkarin a siam thuai a ṭul tain a lang. Zo fate Jerusalem hi an rawn pal phulh vek erawh rem kan ti tur a ni lo.

Raltlante awmna tur lo 'identify' a ṭul

An rawn raltlanna hnaih lampangah emaw, ram ruak awmna lai kan dahna tur lo identify a ngai. Ram thâwl tak kan la nei a, hengte hi mumal taka lo survey a nih loh chuan khawpuiah emaw, a bulhnaiah emaw an rawn lut zel ang.

Raltlan lo ṭanpui dan leh an nun khawchhuahna atan sorkar hian raltlan a lo dawnsawn dan tur ngun taka ngaihtuah a ngai. NGO-ho lo tih tur te, mimal inrawlhna tur te, sorkar inrawlhna tur bikte leh an nun khawchhuahna tura an inhlawhna/eizawna turte hi thawhhhona hmanga lo duan a ṭul. Heng hi a famkima duan lâwk chu a har mai thei, mahse, a ruangâm tal lo duan a ngai. Eng ang sumdawnna nge an tih theih, engte nge phal loh, tihte chiang taka duan lawk ni se. An duh duhna hmuna awmtir hi a fuh dawn lo. Rangvamual ang hi kan neih belh tawh loh a ngai.

Document lem siamte hrem an ngai

Mizoram mi nihna tura document lem siamtute leh a siamsaktute hremna tur dan khawng tak siam emaw, dan awm sa hmanga hrem ngei ngei a ngai. Document lem hmanga in hmun leh ram leite pawh chhuhsak mai bakah, dan anga hrem an nihna tur ruahmanna khawng takte awm se. Mi dang hminga ram lo lei leh sumdawnna lo khawihte check dan tur hi NGO-te nena duan a ṭul.

Tlêma raltlan khawsa thei deuh chuan Mizoram hmun lum laiah chhungte an lo nei mai zel. Tuna mipuite beng tithleptu tam ber pawh hi an ni hial awm e. Heng mite pawh hi raltlan camp-ah dah vek ni bawk se. Loh theih lova an chhungte bula an awm a ṭul pawhin dan mumal tak siam ni se.

Identity card siamsak

Raltlante hi mumal taka identity card (ID) kan siamsak a ngai. An veivahna tur pawh mumal taka in report zel tura siam a ṭul a; in report lova vâk darhte chu man nghal zel theih tura dante siam a ṭul ang. Tun dinhmunah chuan an duh hun hunah in report mumal lovin an vak darh a, Burma ramri pawh an kal vel mai maiin a lang. Kan ralmuanna an tichhe mek. Dan an bawhchhiat chuan foreigner an nihna anga hremte pawh a ṭul mai thei. Uluk taka ngaihtuah a hun ta! Hei hi ram changkang zawka kan zin pawha thuneitute min phût dan a ni.

Raltlante tan awareness neih

Mizo zingah pawh Israel-a pem thla kan nei nual tawh. Israel an thlen hian absorption camp-ah thla ruk dawn an dah phawt ṭhin. He hmunah hian nun khawchhuahna tura thil pawimawh an lo zirtir a, nunphung turte an lo hrilh ṭhin. Hetiang chiah hian raltlante pawh hi awareness lo neihpui phawt a ṭul tak zet. Hmeichheho kawngpui bula inbual mai mai te, ransa chunga nunrâwng lo tura inzirtir te, rinawmna te, mihring chunga inzah tawnna te, mi mitmei ven dan te, etc.

Chi bing politics kan phal tur a ni lo

Mizorama Mizo tia lungawite hian kum tam tak harsatna kan lo paltlang tawh. Raltlan zingah an lo kalna chi bing politics hi indirect taka rawn promote an tum pawhin uluk taka kan lo filter thiam a ṭul ang. Hei hi neutral taka kan khap beh a ngai. Mizo nihna tichhe zawnga hma an lakte kan phal tur a ni lo. Dan bawhchhetute chu dan vêk hmanga na taka kan hrem ngam hi kan tih tur ni awm tak a ni.

NGO hruaitute hnena ngenna

Raltlan zingah hian khawngaihthlak tak tak leh ṭanpui mamawh ngawih ngawih hi a tam zawk an ni ngei ang. Kan NGO-te hnathawh pawh a ropui ṭhin tak zet a. Chutih rualin, raltlante zilhhauh an ngaih chânga an ngawi tlat zel hi USA-a sponsor-a an kal ṭhin tawh vang a ni em tih hi kan rilruah kan inzawt nasa ta mai.

Balance an siam hram hram hi mipuite’n kan beisei. He thil ziah a ngaihna chhan chu–raltlante huat vang lam ni lovin, tunlai boruak chhe chho zelah mithiam zawkte cho chhuah nan leh buaina lian zawk a thlen loh nan sorkarin hma la se tih rilru awm chunga ziah a ni.

~ Dr. Nunga Hmar, Associate Professor, Mizoram University