Mahni eizawnnahna Ngaihpawimawh leh zah a ṭul

Thil nung tawh phawt chuan dam khaw chhuah nan eitur kan mamawh vek a, mihring pawhin kan phak tawk ṭheuhah kan mamawh phuhruk nan hna chi hrang hrang kan thawk ṭhin.

Kan hna thawh chu eng hna pawh lo nise, kan dah pawimawh a, kan zah hle hi kan tih tur a ni. Thawnthu pakhat an sawi fo ṭhin chu, nula pakhat hian a ṭhiante lakah a nu mi ang lo chu a zahpui a, amaherawhchu, a nu mianlohna chu a'n hriat meuh erawh chuan mittui tla zawih zawih chungin a nu chu a kuah a. A nu chu hmuhsit a zahpui chu sawi loh, amah a hmangaih avanga a sen laia meipui nasa tak laka a chhan chhuahna lama a taksa, kut leh kete kang kawm a, chutiang dinhmuna ding ta chu a lo ni tih an hriat meuh chuan a nu chu a chhuang ta em em zawk a ni.

He thawnthu tawite aṭang hian zoram mipuite hian zir tur tam tak kan nei. Tun dinhmuna min din tirtu, kan mamawh thil min phuhruk saktu, kan eizzawnna hna hi a te emaw a lian emaw kan zah a, kan hlut hle hi kan tihtur a ni. Kan eizawnna/ kan hna rinawm leh taima taka kan thawh a, kan dah pawimawh thiam hian chu kan hna chu midangte pawhin an zah a, keimahni ngei pawh kan zahawm nghal mai ṭhin.

Kan hna chu eng hna pawh ni rawhse, a thawktu berin a zah loh a, a phatsan fo a, a hna aia thil pawimawh zawk dang a neih reng mai chuan a hna leh amah ngei pawh chu mi hmuhsit a lo ni mai ṭhin. Mahni eizawnna hna kalsana NGO a kan phusa lutuk fo maite hi mi fel leh mi inpe tiin miin min fak a ni mai thei.

I hna i kalsan a, i hnain a tawrhna kha midang tan a pawi lem lo thei, mah se, i hnain a mamawh che.

Mihring nih-phungah chhuanlam tling harsatna leh pawimawhna loh theihlohna thil a awm thei. Chutiang ni lo, inthlahdah vang leh chhuanlam dap chawpa kan hna/ eizawnna kan thawk peih lo te phei hi chu a pawi hle a ni.

Mi ṭhenkhat mahni hna hmusit a, thawk
ṭha peih lo, aikal la te, ṭhenkhat mahni hna chapo pui, midang tana harsatna thlentu an awm bawk.

Ṭhenkhat duhamna avanga mahni hna a nihna tur anga thawk thei lo te an awm ve leh bawk. Eng pawh nise, kan eizawnna kan hna te hi a hlutna chhut a, kan duat a, kan ngaih pawimawh a, ka ei hmunna leh kan dam khawchhuahna a ni tih hriaa taima leh zahawm taka kan thawh hian mahni tan mai piah lamah ram leh hnam, midangte tan malsawmna kan nihna a ni tih hre chiang ang u. Ṭhahnem ngai takin, dik takin mahni hna ṭheuh hi i thawk ang u khai.

- PC Lalringliana Sena