Scholarship leh a chhehvel
Online Scholarship avanga buaina hi tunlaia Mizorama zirlaite boruak tawn lian ber a ni awm e. Harsa chung chung pawha internet kaltlanga scholarship dil a ngaih kher chhan chu India sorkar laipuiin Direct Benefit Transfer (DBT) Scholarship scheme hrang hranga a kalpui vang a ni.
DBT-ah hian scholarship diltu zirlaiten National Scho-larship Portal-ah anmahni user account leh password hmangin an login ang a, form an fill up hnuah an submit ang. An zirna ina thuneituten an institution account hmangin zirlai form te hi an lo check fel leh vek ang. Engkim a fel chuan sorkar laipui chuan zirlai account ṭheuhah direct-in pawisa a rawn thun mai dawn a ni. Scholarship diltu zirlaite chuan anmahni (individual) bank account dik taka an fillup loh chuan pawisa an dawng lo ang. Zirlai tinten anmahni chanpual tur dik taka an chan theih nana Direct Benefit Transfer (DBT) Scholarship scheme hi ruahhman a ni tih kan hriat a ṭha awm e.
DBT thil tum hi thil ṭha tak a nih laiin National Scholarship Portal hmanga online-a scholarship dil a ngaih avang hian internet speed muanna Mizoramah scholarship dil turte’n harsatna an tawk nghal a. Aizawl khawpui chu sawi loh, khawpui dang leh thingtlanga zirlai, internet hman ve theih lohna hmunah phei chuan an buaina hi a nasa zual hle. Internet a muan ṭhin avangin ‘login’ theih loh chang a tam bawk nen scholarship dil zirlaite an hrilh a hai ṭhin khawp mai.
Hetihlai hian sumdawn nana hmangin scholarship dilna fill up-sak thei computer zirna in, internet café, mimal hrang hrangah zirlaiten man chawiin form an fill up tir a, an lun thei hle. Chuti chung chuan internet speed a muan avangin zirlai ṭhahnem tak chuan hun tiam chhungin scholarship dilna an ti fel ve hman dawn lo niin a lang.
Mizoram Scholarship Board (MSB) lam pawhin hetianga chawpchilh taka kalphung a inthlak thut avang hian buaina an tawk nasa ve hle a, an phak tawk tawkin zirlai harsatna hrang hrangte sut kian nan MSB lam pawhin theih tawpin kawng a ngaihtuah mek reng a ni. Keini state chauh ni lo, India ram pumah hei hi thil thar a nih avangin thil hre chiang lova sorkar, Mizoram scholarship Board leh zirna ina thuneitute han dem ngawt chi a ni lo tih kan hriat a ṭha hle mai.
Sumdawn nana hmanga a, scholarship dilna fill up sak theite hian form pakhat fill up manah a tlangpuiin Rs. 100 aṭanga Rs. 200 thlengin an la; zirlai dinhmun a inang lo, sum leh paia harsatna nei hi a tam zawk an ni. Kum danga pawisa sen lohna turah cheng tam tak zirlaiten an sen a ngai ta te hi kan sorkar hian uluk zawka a ngaihtuah a ngai hle mai. Zirna in hmun hrang hrangah free wifi emaw, internet connection ṭha tak an neih theih nan chak taka hma a lak a ṭul ta. Tin, Aizawl pawn lamte harsatna sutkian nan Mizoram pumpui internet thlunzawmna, State Wide Area Network hi ṭangkai zawka hman theih ni se.
Buaina kan tawh chhan lian tak chu zirna school, college leh institution hrang hranga zirlai leh an hotuten online scholarship application kalphung kan hriat tawk loh vang a ni. Online-a scholarship dil dan kalphung hi National Scholarship Portal-ah chiang taka ziah lan vek a ni a, hei hi zirtirtu leh zirlaiten uluk taka kan zirchian a ṭul. Online-a scholarship hi mobile kaltlanga form fill up theih vek tho a nih avang hian post matric zirlaite hian smart phone leh computer changkang tak tak kan neih te hi ṭangkai zawkin hmang ang u.
Information technology ṭhang duang tak chuan nghawng lian tak a rawn nei chho mek a. India sorkar chuan state hrang hrang sorkar kalphung leh hnathawh dan hrang hrang a siamrem zel a. Kan hriat ṭheuh tur chu eng thilah pawh kalphung thlak danglamna a awm reng reng hian a tirah chuan harsatna kan hmachhawn ve hi a ṭul
ṭhin. Kan buaina bul ber hi internet connection a nih miau avang hian Mizoram sorkar pawh hian zirlai harsatna chinfel kawngah nu leh pa chan changin mawhphurhna la thuai se a duhawm hle.
Scholarship chungchangah pawh tumah indem lovin, he kalphung vanga harsatna kan tawh mek ang te hi nakum lama kan pumpelh theih nan sorkar, zirna in leh zirlaite hian kan mawhphurhna ṭheuhah hma ila ang u.
- Chhungpuia Renthlei