Anthurium Festival leh Mizo hmeichhe zahawmna
Tun hnaiah Reiekah Anthurium Festival hlawhtling taka hman a ni. Duhthusamina kawngte lian lo mahse a hmuna leng mang lo mipui an pungkhawm thei a, mipuiin an hlut hle a ni. He hunah hian thil lawmawm tam tak zingah lawmawm lo ṭhenkhat ka hmuh leh hriatte hi sawi lova awm mai mai harsa ka ti ta tlat mai.
Ka sawi tum hma-sa zawk chu Mizo hmei-chhe pakhat Vaipa in a fawp lai thlalak kha a ni. Kha thil kha Vaipa ruih vanga thleng pawh a ni mai thei a; nimahsela a thlalak a darh chak em avangin a mualpho dan kha Mizo hmeichhe mual-phona lam hawi a niin ka hria. Vaipa leh kha Mizo nula/ nuthlawi/ nu inkar thu kha ka hre lova, nupa pawh an lo ni reng thei a, ka sawi tum pawh a ni hek lova, mahse ên laia ualau taka Vaipain a va fawp niawm tak thlalak awm kha Mizo hmeichhe dangte Vai dangin an zuam phah ka hlau a, a pawi ka ti takzet zet a ni.
Pakhat leh chu fashion show kan chhuah chhawn leh danah khan Mizo nula mualpho theihna turin kan Mizo photographer leh Facebook user lam an che tlatin ka hria. Tute emaw sawisel tumna leh khakna lam ni lovin tun hnua a thlen tawh loh ka duh vangin ka ziak lang tel dawn a, insawiselna lamah lo ngai lo ula ka duh khawp mai.
Fashion show kha engzat nge awm ka hre lova, Facebook lama kan lo hmuh ve ah chuan photographer ṭhenkhat chuan a fashion lai kha an la ngei a, fashion pho-tography kalphung pangngaiin thil an ti a, an thehlar (Facebook bak hi tihlar vak dan a awm lova) danah pawh khan zahawm pangngai takin an ti a. Ṭhenkhat erawh chuan a fashion lai aiin a hmeichhia kha an va focus a, hmeichhe zahawmna atana mawi lo thei dawn dawnin an posi fuh loh lai (sexy lai a ni zawk ang) an han tarlang duh mauh mai a, an focus pawh hnute bawr leh mawng bawr nia puh theih turte kha ka hmu. Facebook-ah an han dah a, an comment zui danah pawh, "Ka hreh lo...," han tih lam hawite a ni nual a, a pawi ka ti takzet a ni. FB lama comment-ah pawh inhnialna a awm zui.
Mizo mipa hian hmeichhe zahawmna hi kan hum tur a ni a, model ṭhenkhat khan khati tehhrepa an thlalak tihdarh a, a duh duhin an comment zui tura dah kha an lo duh a nih pawhin a tam zawk khan an duh loh ka lo ralkhat rin ve ringawt a, hetiang nikhua hian professional pho-tographer rawiha an ni bak thlalak tir loh hi a ṭhat ka ring zawk a daih a ni. Engpawhnise Anthurium Festival chu ka rin aiin kan lo hlut daih mai.
- Mawitea K.