LPG CONNECTION BPL FAMILY TAN (Pradhan Mantri Ujwalla Yojona)

India khua leh tui dinhmun khirh khan (BPL Family) a ding mek LPG connection nei zo lote tan; a thlâwna LPG connection Oil Marketing Company (OMCs) ten an pek chhuahna tur, Scheme Central sawr-karin a ruahman thar hi 'Pradhan Mantri Ujjwala Yojona' (PMUY) tih a ni. LPG connection hi BPL chhungkuaa hmeichhe kum tling chin hminga pek chhuah tur a ni. He scheme hian India rampumah chhungkaw Vaibelchhe 5 zet hamṭhatna siamsak tura ruahman a ni.

Tun dinhmunah India rampumah LPG Connection nei zawng zawng hi 16.7 Crore (Vaibelchhe 16.7) awm anga ngaih a ni a, kum 2019-ah LPG Connection nei zawng zawng hi 25 Crore (Vaibelchhe 25) awm hman turin Sawrkar laipui chuan ruahmanna a siam mek a, hemi atan hian LPG Distributor 10000 teh meuh mai hawn thar a tum mek bawk a ni. Eirawngbawlna thianghlim leh hrisel thingtlanga chengte ban phaka chhawp hi sawrkar laipui duh dan leh ruahmanna siam zinga pawimawh ber pakhat a ni awm e. Eirawngbawl laia meikhu hip luh hian a bikin hmeichhia leh naupangte hriselna nasa takin a tichhiain harsatna a thlen ṭhin a. Hemi vang hian eirawngbawlna thianghlim leh hrisel zawk in tinin kan neih theih hi sawrkar laipui duh dan a ni. 2016-2017 Union Budget chuan Rs 2000 crore (Vaibelchhe Sanghnih) teh meuh mai hemi atan hian a dah a, hemi hmang hian chhungkaw 1.5 crore (Chhung-kaw Vaibelchhe 1.5) lai tan hamṭhatna hi siamsak a tum a ni.

He hamṭhatna chang tur hian tehkhawng hrang hrang hmanga enfiah hnuah a dawng tur dik takte hnenah LPG connection thar a thlawnin (Gas stove leh gas tui erawh comsumer-in an pek ve a ngai) pek chhuah tur a ni. Senso ngai hrang hrangte hi Sawr-kar laipuiin Oil Marketing Company heng Indian Oil Corporation Limited, Hindustan Petroleum Corporation Limited leh Bharat Petroleum Corporation Limited te kal tlang hian a tumsak dawn a ni. He hamṭhatna dawng thei tura ṭul leh pawimawh hrang hrangte tarlang ila:-

1. BPL chhungkua tan chauh he ham-
ṭhatna hi ruahman a ni a, 2011 SECC chhiar-puia chhiar tel an ni ngei tur a ni.

2. LPG connection chungkaw member hminga la nei lo hrim hrim an ni tur a ni.

3. BPL family member hmeichhia kum 18 tling chin hming chauha LPG connection hi dil leh pekchhuah theih a ni.

4. 2011 SECC list-a awm lo mah se BPL ni ngei si chuan mahni awmna District Deputy Commissioner hnen aṭanga ngaihven tur a ni.

He hamṭhatna dawng thei turte chuan LPG Distributor te hnenah kalin form siamsa hmangin dilna an thehlut tur a ni a. He an dilna hi ngun taka Oil Marketing Company ten an endik hnuah a dawng âwmte hnenah LPG Free connection (Gas stove leh gas tui erawh comsumer-in an pek ve a ngai) hi an pe chhuak ang.

PMUY Scheme hi India ram hmun
ṭhenkhatah kalpui ṭan a ni tawh a. 1st April 2016 khan Shri Narendra Modi, India Prime Minister chuan ropui takin a lo hawng tawh nghe nghe a ni. Mizoramah pawh a mamawh leh dawng âwmte'n an dawn ve ngei theih nan ruahmanna siam mek a ni a. Mizoram chhung-a District tinah Indian Oil Corporation Limited chuan District Nodal Officer (DNO) ruatin anni hian Deputy Commissioner te nen he scheme kalpui dan tur sawihonate pawh an lo nei tawh a, tunah hian LPG distributor tin hnenah dilna dawng turin hriattirna chhuah tawh niin dilna dawn mek a ni. Hetih lai hian hmun ṭhenkhatah LPG distributor ni lo, dilna lo lakhawm an awm nia hriat a ni a, hei hi he scheme inkaihhruaina kalh a nih avangin LPG Distributor te hnenah chauh dilna hi thehluh tur a ni.

Pradhan Mantri Ujwalla Yojona atan bik hian Oil Marketing Company ten a bik taka hman tur LPG Stove, Suraksha Hose Pipe (Gas Pipe) leh DGGC (Gas Card) ṭha leh tlawm si a siam thar a, PMUY a LPG connection te hi lei/hralh chhawn emaw mi hrang hnena
inrochun phal a ni dawn lova. LPG Connection neitu a boral a nih chuan kha chhungkaw member zinga hmeichhia kum tling hnenah chauh hlan chhâwn phalsak tur a ni.

Mizoram hi ramchhung hmun dang nena khaikhin leh mihring chen tam lam nena tehin LPG connection tam berna pawl kan ni awm e. Hei hi chhan hrang hrang awm thei zinga langsar tak pakhat chu Multiple connection nei kan tam lutuk vang a ni thei. Chhuanchhe zawk leh dâwm kâi ngai zawkte tana Central sawrkar ruahmanna rawn siam thar hi a lawmawmin hmaih phal rual a ni lo. Hetih lai hian mi ṭhenkhat a thlawn a nih vang hrim hrima a tehfung pawhin a phal loh anga lo beisei leh chan tum kan awm
ṭhin hi a pawi hle. Hun kal tawhah midang tan harsatna an siam piah lamah anmahni ngei pawh harsatna insiam an awm tawh ṭhin. BPL family ni hauh si lo, inti BPL chawp te, LPG connection nei tawh reng si mah se duhâm luat a, la nei miah lo anga inchhalte kan awm ṭhin. Heng mite vang hian harsatna kan tâwk mek a nih hi. BPL family ni lo leh BPL Family pawh Gas Connection nei tawh kan nih chuan dil lo ngam ila, Central Sawrkarin a duhsak leh chawikân ngaia a hriatte tana phal taka ruahmanna a siam hi a dawng tur awm te chuan chan ngei i tum ang u.

- VL Chinzah