Chapchar Kût bawk

Anthurium Festival kan hmang zo a, Aizawl khaw pawnah nghah ṭhin a ni a, mahse kal an tam hle tho mai. Haw lam phei chu Reiek aṭanga Aizawl thleng traffic a jam ni berin a lang, a kal chak theih loh a, kan intlar pût pût reng mai. Mi tam takin an sawi angin Anthurium Festival, kût phuahchawp deuh zawk mah, Aizawl pawna nghah a nih a, kal an tam chuan Chapchar Kût phei hi chu hmun dangah hmang ve ta ila, kan ṭhahnem lehzual ngawt ang.

Mizo hnam anga kan hun pawimawh leh kan ngaihhlut ber chu Chapchar Kût a ni. Kum tin Lammualah kan hmang a, mihring tel an ṭha-hnem a, mihring leh motor kal hleih theih lohin Aizawl khawpui kawng dungah kan inhnawh ṭhin a ni. He kût hi lammualah kher ni lo, hmun dang-ah hmang ṭhin ta ila, tun ai hian a nuam lehzual-in ka ring.

Aizawl aṭanga kalna hla vak lo hi hmun tam tak, nuam deuh deuh a tam mai. Sesawngah te, Sialsukah te, a nih loh pawhin Aizawl khawpui dai, hmun zawl zau deuh awmna hmunah te hmang ta ila, a nuam lehzual hlein a rinawm. YMA Branch zawng zawng emawina cheraw kân kha chu a harsa deuh tawh ang a, amaherawhchu Anthurium Festival mah khatiang khawpa tam an kal a nih si chuan Chapchar Kût phei chu an tam lehzual hle ang.

Hmun zawl zau nuam awmna ni si, lirtheia tlân chhuah deuh vang vang ngai bawk si ni ta se chuan Aizawl ṭhalai tam tak, tuna kût vel kal ngai vak lo pawh hian kal an peih ṭhupin a rinawm. Reiekah pawh hmun zawl zau ṭha tak a awm chuang lo a, Reieka Anthu-rium Festival hmanna khawp aia zau hmun zawl leh hmun thengthaw nuam awmna tam tak a awm a, chung hmun-ah te chuan Chapchar Kût hi hmang ve ta chiah ila, tun ai hian kan hlut lehzual ngei ang. Hmuifâng tlang, Lallianvunga hmun phei zawng zawng chu han awh khat duar mai ila, zaithiam zai nen, hnam lâm chi hrang hrang nen, a nuam dawn hle hian ka hria.

Puipunna lian tham deuh Treasury leh Chanmari inkara nghah kan tum zel hi kan khawpui pawh hian a zo meuh tawh lo. Khawpui nunphung a chhe lamin nasa takin a nghawng a, a buai-thlak. Hun leh tha a ui-awm duh hle. North East state dangah te, an kûtpui lian tham deuh chu khawpui chhungah an lawm luai luai tawh lo, Hornbill Festival te pawh khaw pâwn deuh-ah a lawmna hmun a awm a, a nuam em em a, mi pawhin an hlut a ni. Chutiang deuh chuan Chapchar Kût pawh hi Aizawl aṭanga pan nuam tawk, hmun nuam leh thawveng zawkah te hmana lawm ni ve ta se, tun ai hian kan hmang nuamin, mipui pawhin kan hlut zawk hlein ka ring.

- John Z. Paite, Mizo Ṭhalai