Chhinlung chhuakte i harh ang u
Chhinlung chhuakte hi chhûl khat kual, unau kan ni, tih hi kan sawi tam ta hle mai. Nimahsela, a ngai bawkin maw kan inchemhâr leh tak; khua hi a var lo mang e. Kei chu Hmar ka ni, kei chu Zomi (Paihte) ka ni, kan ti leh ta. Tun hnaia Churachandpur-a thil thleng zet chu, ’A mak, a na,’ a ni ringawt mai. Engtikah tak Chhinlung chhuakte hi unauah inpawm thei hlawm ang i maw? Eng hian nge maw min bual â a, eng hian nge maw min mawlh hlawm chu ni le? Heti em ema kan harh theih loh ni! Sual hnathawh chu a ni chiang mai, mahni unaute pawh hmangaih theih loh chu. Mahni chi bil chauh ngaihtuah a, mahni hnam bil chauh ṭan hi a thiam zawk leh thiam lo zawk pawh ngaihtuah lo hian, insual kan peih at zel mai ṭhin si. Râl phiarin kan inphiar zel mai a, kan inphêksual leh vak zel mai zawng a nih hi. A dàwn tawithlak mang e.
Tunlaiah mi hnamte chuan inpumkhat zai an rel a, lungrual taka ke an pên mum mum laiin keini ve zawng kan inngur kan inngur mai hlawn a, kan intin ûr ûr hlawm a. Inṭhen darh zawngin ke kan pên fo hlawm mai zawng a nih hi. Thiamthu insawisiak reng rengin kan hmanhlel mai si a, tlawm kan tum dêr hlawm si lo. Kan hmelmate nuih kan tiza dawn mang e. Pathian hming pawh kan tichhe lutuk a lawm, Kristian kan inti ve hlawm bawk si a. Kristian mahni hmasial, mahni unaute ngeih lo, mahni chi bila khurbin tum tlat, inpumkhat thei lote kan ni si a. ‘Aw, hnam zawng leh chi tin ṭawng tin hi van lal nau ang a ṭahna Kalvari-ah an dang chuang lo e,’ tia zai tui em emte kha kan ni a, mahse, kan unaute pawh kan ngeih thei lo chu a ni si!
Chhinlung chhuak hnam pêng hrang hrangte hi keimahni chi bil hi chuan tumah kan dingchhuak lo ang. Chuvangin, inpumkhat kan ngai, hming pakhat min khaikhawmtu a awm a ngai. Mizorama kan awm ang hian, Mizo kan ni, kan inti vek mai a, Mizo Paihte te, Mizo Hmar te, Mizo Lai te, Mizo Vaipheite kan ni mai. Hei hian inunauna leh inpumkhatna min thlen a, inlungrualna min thlen a; chhiatni ṭhatni-ah min phuar khawm a, hnam khatah min siam a ni. Meiteiho pawh hi chi pêng hrang hrang an awm ṭeuh a, nimahsela, Meitei-ah an inlungrual mai a sin. Keini Chhinlung chhuakte hi eng vangin nge kan inlungrual theih miah lo ni? Harh a hun tawh e, i harh em em tawh ang u.
Engtikah nge kan inunau dawn a, engtikah nge kan inlungrual dawn, engtikah nge kan inpumkhat dawn le? Tun hi inunauna hun ṭha a ni a, tun hi inlungrualna hun ṭha chu a ni a, tun hi inpumkhatna hun ṭha chu a ni. Tun anga hun ṭha hi kan bawhpelh chuan hun ṭha kan tawng leh ang em? Chhak leh thlang, chhim leh hmar aṭangin hmelmate’n min bei a, tun ang hunah pawh kan inlungrual loh chuan inlungrualna tur dang a awm chuang lo. Tun ang huna kan inunau loh chuan inunauna tur dang a awm chuang lo a; hawh u, Chhinlung chhuakte hi i harh teh ang u.
- Hausanga Hauzel