Inkhawm zanah Praise On!

Tunlai hian Mizoram Synod hnuaia department pakhat, Synod Information department (Synfo) chuan malzaia intihsiakna, Praise On a buatsaih mek a, a tuipui chi tan chuan ennawm tak a ni âwm e. Rah ṭha tak a chhuah ngei beisei ila; zaithiam, mite hriat hlawh pawh an pun phah ngei turah beisei phawt ang.

Praise On hi luhchilh viau lo mah ila, bo lutuk lo tâwk tur chuan kan lo hre ve zel a, mi titi aṭangin thil chi hrang hrang kan hre ve zel bawk a. Tun hnai, third round competition an tih ṭan aṭanga sawi hlawh tak chu, inkhawm zana intihsiakna buatsaih hi a ni. Whatsapp leh Facebook-ah sawi zui a hlawh a; ṭhutkhawmnaa sawi a hlawh viau bawk.

Ni e, kohhran thil a nih hi chuan kan thîkthu a chhe hma a, a neitu vek kan nih avangin han sawisel mai pawh a âwm viau mai. Hnâr hnuaiah phatna a bo lo' an ti mathlâwn lo a, a buatsaihtu lam chuan chhuanlam leh insawifiahna tur an haihchham hauh lo ang. A chhan leh vang chu eng pawh ni se, inkhawm zana kohhran kaihhnawihin intihsiak an buatsaih hi a mawi lo viau. Kohhran kaihhnawih pawl ni hauh lo, MFA pawh hian tun hnai kum 2/3 kal ta aṭanga zana Mizoram Premier League khelh an tihah pawh hian inkhawm zanah chuan an ti meuh lo zu nia. Ka hriat vek loh avangin inkhawm zanah an ti lo tawp e, tih erawh ka sawi ngam bik lo a; an tih pawhin zan tam zana inkhelh an tih tawhah hian zan 5 pawh inkhawm zanah an la ti kher loin a rinawm.

Praise On intihsiak hi inkhawm zanah neih ni mah se, 'Inkhawm bânah alawm kan tih' tih hi an ṭan chhan a ni mai thei. Hmun ṭhenkhatah chuan a dik ang. Mahse, kohhrante hi inkhawm ṭan hun a inang lo a, kohhran tam tak chu zan dar 6:30-ah inkhawm an ṭan tawh laiin, zan dar 7:00-a ṭan pawh an la awm nual a; chu'ng kohhrante tan chuan zan dar 8:00 hi inkhawm bàn fel vek tawh hnu a la ni kher lo.

Intihsiaka tel tur te, a buai-puitute leh ṭawiawmtute tan chuan inkhawm zana intihsiak buatsaih a nih hian inkhawm hman ngaihna a awm lo hrim hrim. A thlengtu Bungkawn Koh-hran, ṭhalai pawl leh koh-hran hmeichhiate tan phei chuan, inkhawm loh phah an va tam dawn em! Intihsiaka mawhphurhna nei, an awmna kohhrana mawhphurhna pawimawh tak tak neite pawh an awm niin a lang; ṭhenkhat chu kohhran upate pawh an ni âwm e. Chu'ng mite chuan an kohhran inkhawm ngai pawimawh hlei thei loin intihsiakna lama an kal a ngai tihna a ni a. Inthiam lo tak chunga kal nge an nih ang a, inthiam lohna nei hauh loa kal ni ang le!?

Praise On buatsaihtute hian Synod hruaitute an sawipui ngei turah ngai ila. Chhuanlam nei ṭha inti takin, loh theih lohin inkhawm zanah pawh intihsiak neih a ngaih thu an hrilhfiah ngeiin a rinawm. Chuti ni se, kan Synod hruaitute hian engtin tak lo chhang an maw? Awlsam têin, 'A pawi hleinem,' an lo tih mai chu ka ring phal lo.

Eng pawh ni se, Synod hnuaia pêng pakhatin inkhawm zana intihsiak an buatsaih hi a fuh lo tak zet tih hi pawm se, tun hnuah chuan ti tawh lo se a duhawm ngawt mai. Insawifiahna tur nei tho mah se, 'A pawi hleinem,' titu pawh mi tam tak awm mah se, Kohhran mite zingah ṭha ti lo leh sawiseltu tam tak an awm a nih chuan 'Inenfiahna tur a awm a ni,' tih hi thil chiang a ni.

Kohhran mite tan kohhran inkhawm awm lai renga kohhran huang pâwn lama (Vanapa Hall, etc.) inkhawm ṭhin hi tun hma aṭanga mi tam tak sawisel, a inkhawm ṭhinte pawh miin an ngaihsan lêm lohte an ni fo. Hetiang thil hi a la awm fo mai thei a, kal sualna bul a nih fo avangin kohhran mite chu inthiarfihlim a ṭha viau.

Chutiang zelin, kohhran hmunpuia mite'n kohhran mi ṭhenkhatte an inkhawm theih lohna tura programme huaihawt hi tih fo chi a ni lo.

- Tetea Khiangte