SAWRKAR HNATHAWK DUTY HI

Sawrkar hnathawk tam tak hian an duty hi an hre chiang lo nge hre chiang chung siin an zawm lo zawk? Kan ramah hian sawi leh selna tawk tam ber pawl chu sawrkar hnathawk hi an ni mai lawng maw?

A hmasa berah chuan sawrkar hna-thawk duty hun chhung hi kan hre chiang lo em aw tih rindan a awm thei. Sawrkar hnathawkin sawrkar hna a thawh avanga a hnaa a duty hun chhung chu ni khatah darkar 24 a ni. Office a thawkte tan office work bika an duty hun chhung chu darkar 8 a ni. Office-a an duty chhung darkar 8 bak hi an duty a zo a ni mai lo, zan dar 12 ah pawh office hna vanga office kal ngai nise a kal mai tur a ni; a hna duty chhung nikhat ah darkar 24 a nih miau a vangin.

Ṭhenkhat chuan office hun chhung a nih loh avangin an induh khum ṭhin em aw tih tur an awm fo. Office bika darkar 8 duty pawh hi bawh-pelh an tam a, in enfiah a ngai viau. Tlai dar 5 ban hun ni ta se dar 4 ah dawr tur awm mumal tawh lo office hi an tam hle.

Damdawi in lama thawkte pawh hi ni khatah darkar 24 hi an duty a nih ve tho avangin damdawi in bika an duty hun ni loah pawh koh kal theih reng an ni tur a ni. Chawlh (leave) lak vanga office hna thawk miah lo tura inngai hi tam tak an awm a, thlakhat chhung chawlh la pawh nise a chawlh a lak chhunga hna pawimawh a awm a nih chuan koh kal theih a ni tur a ni. Chawlh ka la alawm tia kohna lo ngaih pawimawh loh ngawt kha a tihtur a ni lo.

Sawrkar motor kawltute hian an hmang thiam lo tih thu sawi a awm fo. Mahni ta bik liau liau a ngai tlat tam tak an awm, mahni ta ang maiin an ngai a, a enkawl kawngah mahni ta angin an enkawl leh si lo. An thawhpuiten mamawhah hman ve tum se an phal ṭhak lo. A tui nise mahni sum sengin an thun duh miah lo a, in enfiah a ngai e.

Office hrang hrang hian biak har deuh, dawrtute lo chhawn
ṭha vak ngai lo hi an kawl fur mai. Hengho hian mi tam tak a ti ṭi a, mi pakhat avangin department pum a hmingchhiat phah fo
ṭhin. Intih lal lutukte hi mite nuihzat nihna mai a nih avangin lal dan thiam lote hi inenfiah an ngai hle bawk. Mahni hnuaia mite hmusit taka en chin loh a ṭha a, a rualkhai thei ang bera rorel thiam a pawimawh.

Sawi tur tam tak a awm, chutih rualin Sawrkar hna thawk zawng zawng an fel lo tihna a ni lo a, fel tak leh biak nuam tak tak tam tak an awm. Heng fel tak takte hian mirethei leh tlaw ve tak takte nun hlimna nasa takin a pe a, huaisenna leh mahni inrintawkna an pek ṭhin bawk avangin mahni hna ṭheuh thiam leh taima takin thawk vek ila a va nuamin kan ram hian hma kan va sawn dawn tak em.

- C. Lalremmawia