Central YMA ṭang zel rawh se

Central YMA hnuaiah Kumpuan duty chuan tlaivarin gas bûr tihchingpen an check ṭhin a, tun hnaiah pawh an check a, bûr 38 ngawt tihchingpen an hmu chhuak a, a lawmawm ngawt mai.

Mizoram sualna hrang hrang a punlun mek a, drugs tawlhruk te, tualthah te, rûkrûkte bakah sualna hrang hrang a hluar ta hle mai. Heng sualna hrang hrang hi sorkar ngawt chuan a hmet mit thei meuh lo a, theihtawp chhuah mah se, manpower-ah harsatna a awm a, NGO-te'n theihtawp an chhuah ṭhin hi a lawmawm a ni.

CYMA Kumpuan Committee hian hâk an zauh zel se, hnam dang, a bikin vaiho sumdawng pung chak lutukte hi a ngaihmawhawm ta khawp mai. Tam tak chuan ILP an neih ang ni loin hna an thawk nasa a, kan sumdawngte an la lân zo mai ang tih pawh a hlauhawm hlel lo e. Tun hnaiah Armed Veng chuan an veng chhunga vai khawsa, mi in luaha awmte an dapnaah an permit neih ang loa hna thawk an awm tih an puang a, in neitute thlengin an in luahtir lo turin an ngen niin kan lo hria a, an tiṭha khawp mai.

Aizawl Chanmari NGO ṭangrual pawhin raltlan chungchangah thuchhuah khawng leh ṭha tak an siam a, an bawhzui ngei dawn hmel bawk a. Raltlante hi Mizorama an rawn tlan luh ang ngeiin khawsa se a duhawm khawp mai. Sumdawn nante an rawn hmang a, mi dawrte man sang tak takin an khâr niin sawi thâwm a awm a, thâwm a awm chuan a dik bawkin a rinawm. Hengho pawh hi enkawl dan tawk thiam an ngai ta viau mai.

Mizoram chu Burma nena innghêng kan nih avangin ruihhlo kalkawng ber a ni a, Mizoramah hralh kher lo mah se state pawn leh ram pawnah an la thawn zel niin a lang. Tun hnaiah heroin hawng 440 ngawt mai mi hausa tak hnen aṭangin man chhuah a ni a, jail bang a zût hial a ngai ta a.

Mi hausa thut ho tam tak chu an rinhlelhawm hlawm khawp mai. Ram an lei a, building lian pui pui an sa khep khup hlawm a, mi rinhlelh loh nan dawr an han hawng ngawt zel a, an dawr hawnah lah an bungraw neih a turu hlawm viau a ni.

Ruihhlo leh sorkar phal loh thila sumdawngte hian Mizoram min luah hneh ta viau mai. Hengho hian khawtlangah tlaktlum tumin nasa takin ṭan an la mek bawk a, mahse, khawtlang chuan an hausak dan kan pawm lem lo. Kan pawm loh laiin kan thinhrik leh si lo a, mi ṭha angin kan la en zui bawk si hi a hahthlak khawp mai.

Hman ni khan Champhaiah kan han zin a, a tam zawk chu an thawh chhuah aṭanga in leh lo an din a nih a rinawm a, mi dik lo vek chu an ni hauh lo. Amaherawhchu, mi tam tak chu ruihhlo leh sorkar phal loh thila sumdawng hausa an nih a rinawm a, an hausak dan te, an building sak danah pawisaah an buai lo tih hi a chiang reng mai.

Chuvangin, ruihhloa sumdawng te, sorkar leh mipui harsatna siam zawnga khawsa hrim hrim ho hi nasa zawka kan do tlan a ngai ta a ni. Central YMA hi sorkar tih lohah chuan mipui mit fûkna ber a ni a, thil ti thei ber pawh an ni. Anni hi Zoram chhan chhuak tura Pathian bêlruat pawh an ni mai awm e. Ṭan han la sauh sauh se, mipui pawhin kan thlâwp tlat a ni tih hre mawlh teh se.

- Lal Rinmawia