India ram civil airport-ah chuan
Tunlai chu Mizo mipui mimirte’n sorkar hmalakna kal mek avangin Lengpui Airport chungchangah social media hrang hrang leh talk show lamah kan ngaihdan kan sawiho nasa hle mai. Lengpui Airport chungchang kan sawi hmain civil aviation industry chungchanga kan hriat ngai tlemte han tarlang ila. Thlawhna hmanga mipui mimir (civilian-te) kan zin veivahna hian kum zabi 20-na chho aṭang khan hma a sawn nasa em em a, khawvel mihringin kan kal duhna hmun kan panna (transportation)-ah chuan hun duh rei lo ber leh him bera ngaih a ni. Chutihlai erawh chuan, accident thleng thei laka inven lawkna (safety) leh pawn lam aṭanga tihbuai theitu laka venhimna (security) fimkhur ngai ber leh hautak ber a ni bawk. A chhan pawimawh tak tak a awm rualin tlemte han tarlang ila.
Khawvel ram zawng zawng a nghawng: Khawi ramah pawh thlawhna a accident a nih chuan khawvel pumpuiah ngaihven hlawh bik a ni ṭhin. A chhan chu kha aircraft-ah khan American, Russian, Pakistani, English emaw, khawi ram mi pawh an lo chuang thei a. Hijack-ah phei chuan airlines neitu ram emaw, thlawhna an ṭumpuina ram neitu, a hruai kawitute nena inbe remtu tur kha khawvel ram hrang hrangte’n an mi leh sa, passenger-te himna atana an chet dan chungchangah inbiakna neiin an thlithlai reng ṭhin a ni. Heihi hijacker tam tak pawhin civil aviation industry an target chhan a ni ṭhin.
Thlawhna hi misualin an hruai kawi a nih chuan khawi ram mahin a chhunga pawisawilo tam tak chuang nena lo kah thlak ngawt theih a ni tawh si lo a, misualte hian an duh duh lai hmun an target thei tihna a ni. Thlawhna leh a khawl te, a tuialhthei paite nen puak thei thil hlauhawm tak a ni tih USA a thil thlengah khan kan chian viau kha. A nihna takah chuan Lengpui Airport-a hijack emaw, Jammu & Kashmir-a hijack kha a hlauhawm lam a inang reng tihna a ni.
Thlawhna hi awlsam têa hijack/tihchhiat theih a ni: Kan chenna leilunga innghat venhimna ngai hmunte ang lo takin vansang lei hîpna tlemna hmuna thlawhna thlawk hi puak thei thil siam chawp IED (improvised explosive device) gram 300 lek hian a tipuak khawlo vek thei tih a ni. Tin, hmanraw hriam leh zum chhetê, entir nan thirfian zum (fork) kan tih ang mai mai pawh misual kuta a awm a, mi dang nunna lak tuma vauna hmanruaa hman tawh chuan an kutah thlawhna a thuneihna kha awlsam tein a lut thei bawk.
Airport hi misual leh terrorist ten hetiang hmanruate thlawhna chhunga an ken luh lohna atana a bika thiamna neite leh trained chhuakte leh hmanraw changkang hman ngei ngei a ṭulna hmun a ni.
Kawvel ram economy tarlangtu leh nghawngtu lian: Khawvel ram economy ṭha leh ṭha lo tehna lian tak pakhat chu ni khat thil thua commercial aircraft (Air Force ni lo) che vel tam lam hi a ni a. India ramin ni khatah thlawhna che vel 3,000 chuang kan neih tawh laiin, Pakistan chuan 300 vel a nei anga chhût a ni. Thlawhna tinah hian a neitu ram code tarlan ni ṭhinin, hei hi ram dinhmun hriltu lian tak leh inchhuanna tling ve pakhat a ni.
Chumi piah lamah chuan khawi ram airlines ber emaw an thlawhtheihnate’n chhiat an lo tawh hian a ram sorkar tan leh airlines-te tan hlohna nasa tak a ni ṭhin. Nuna chànna, khawl thil man tam tak tak hlohna mai piah lamah hian, a ram tourism industry nasa takin a nghawng ṭhin. Malaysia-a airlines pakhat thlawhna a tlak palh chuan foreigner tourist tam takin an rama thlawh luh an châk loh phah dawn tih chu kan ngaihruat thiam mai awm e.
Heng lo pawh point tam tak la awm mah se duhtawk phawt ila. A nihna takah chuan Delhi Airport hi safety leh security-ah international standard a nih a ngai kan tih lai hian, Lengpui Airport pawh a nih ve tho a ngai tih kan hrethiam mai awm e.
INTERNATIONAL CIVIL AVIATION ORGANISATION
Venhimna pawimawh leh inbuatsaih ngai a nih mai piah lamah international flight ten ram hrang hrang an kalnaah security check dan leh passenger-te thil ken phal loh chinte a lo inang lo nuaih bawk nen, khawvel ram hrang hrang chuan thawhhona ṭha zawk leh tih dan rualkhai zawk a lo awm theih nan United Nation an ṭah-awh ta ringawt mai a. Tichuan, kum 1944 khan ICAO din a lo ni ta a, kum 1947-ah a tak takin hna a thawk ṭan a; India pawh hemi kum vek hian member ni turin a inziak lut a ni.
Civil aviation khawvelah chhiatna vawi tam tak a lo thleng tawh a; a ṭhen chu misual kan tih mai (terrorist emaw phuba lakna thil etc) thil tih niin, a ṭhen chu technical lamah harsatna vang a ni. Hei vang ICAO hian a member ram (tunah hian ram 193 member an ni mek)-te chu tih dan ṭha zawk, kalphung ṭha zawk zawm ngei tur safety (pawn lam misualte siam ni lo technical problem, etc vanga chhiatna laka himna) emaw, security (misualte tihbuai theihna laka himna) a kawhhmuh ta ṭhin a ni.
Entirna tlem han sawi ila. Kum 1985-a Air India thlawhna Kanishka chu Atlantic Ocean chunga a thlawh laia tihpuah a ni a. A tipuaktu hian thlawhna chhunga phurh tur bomb awmna bag chu check-in baggage anga a register hnuah thlawk lovin airport hi a chhuahsan a ni. Hetiang a nih avang hian Identification and Reconciliation of Baggage System hman ṭan a ni ta a. Bungrua neitu leh passenger zin turte chhinchhiah vek niin, passenger thlawk leh lo tur an lo awm thut pawhin an bungrua chu offload niin, phurh a ni ngai ta lo.
Kum 2001 July khan LTTE-te’n Colombo Airport (Bandanaralke Airport) chu a hungna perimeter wall-a lâwn liamin an bei chiam mai a. Thlawhna eng emaw zat tichhiain mi pasarih lai an thi a. Heta ṭang hian airport hungna bang chu ft 8 a ni tur a ni a, chumi chungah chuan ft 1.5-in barbed wire a awm ngei tur a ni, tih a lo ni ta.
Kum 2001 September thlaa Al Qaida-te’n USA an beih ṭum khan tihluihnain pilot awmna cockpit-ah misualte kha an lut tlang lui a. Khami vang khan ICAO chuan thlawhna cockpit reng reng chu luh tlang luih theih loh, silaimu pawhin a kah tlang theih loh a ni tur a ni tiin thupek a rawn chhuah leh ta a ni.
Hetiang hian thil thleng tam tak aṭangin ICAO hian civil aviation industy a lo him zawk nan a member ramte-ah kalphung thar an zawm ngei tur a duang chho ta zel a ni.
DGCA leh BCAS
India ramah chuan ICAO thuchhuah anga kal turin Ministry of Aviation hnuaiah himna atana hma la turin DGCA (Directorate General of Civil Aviation) din a ni. Anni hian a him tawk em tih enfiahin airport te, airlines te, air traffic control te, CNS (Communication Navigation and Surveillances) te, pilot-te leh maintenance engineer, etc zawng zawng license leh certificate-te pe chhuakin an ennawn ṭhin bawk. Airport zawng zawngah audit leh inspection an nei ṭhin a. Runway a ṭha tawk em, thlawhna hijack a nih emaw bomb a awm nia report a awma airport terminal building, mipui leh thlawhna dang, etc te tana chhiatna a thlen nasat loh nana rang taka thlawhna lak sawn vat a, park-na tur isoation bay te, mipui insaseng vatna tur a nei ṭha em tih te, thlawhna him taka a ṭum leh thlawh chhuah theih nan runway, ILS, DVOR , runway light, etc a ṭha tawk em tih zawng zawng an endik ṭhin. Hunbi neiin hmanraw hman leh khawl, etc te a rintlak tak zet em tih enfiahin audit leh inspection an nei ṭhin bawk.
Pawn lam aṭanga tibuai theitu laka himna atana hma latu BCAS (Bureau of Civil Aviation Security) din a ni bawk a. Anni hian misualte’n civil aviation industry an tihbuai theihna laka venhimna an enkawl. ICAO-in tih dan tur a hrilh hmangin India ram puma airport zawng zawng him taka a kal theih nana ruahmanna National Civil Aviation Security Programme (NCASP) an siam a; chu chu ṭha zawka kenkawh a nih theih nan National Civil Aviation Security Quality Control Programme (NCASQCP) etc an siam bawk. Anni hian airport tinte inspection leh audit nei ṭhinin, airport security, airlines security leh hmanraw hman, etc te duhthusam a ni em an enfiahin siamṭhat ngai leh thil tih ngaite report siamin action lak a nih leh nih loh an enzui ṭhin.
DGCA/BCAS LEH LENGPUI AIRPORT
India ram airport dang ang thoin DGCA leh BCAS hian kan Lengpui Airport hi hunbi neiin inspection leh audit an ti ṭhin a; hei hi kan buaina bul ber chu a ni, a tih theih awm e. Airport ven fimkhur a ngaihzia kan sawi tawh ang khian ICAO-in standard a duan mila kan kal leh kal loh an rawn enfiah kha civil aviation industry himna a nghawng theih avangin an tih tur ngei an rawn ti a ni kan ti thei ang.
Hmun danga airport changtlung tak tak AAI emaw, Adani group emaw, Indian Air Force emaw enkawlte ang lo takin kan Airport-ah chuan hunbi neia upgrade a awm ve ta si lo a. Audit leh inspection hian kan Airport duhthusam lohna leh a hlauhawm theihna leh siamṭhat ngaite an rawn ziak lang tuarh mai ṭhin a. Thil tenau, kan sorkar siamṭhat theih mai a awm ṭhin rualin, hlauhawm thlen thei khawp (critical point) sum tam tak sen ngai, kan tih theih loh a awm ta ṭhin a , chu chu kan buaina a ni.
Entirna tlem han sawi ila. Khawvel puma airport hungna perimeter wall san zawng tur kan sawi tawh ang khi a nih laiin, keini Airport-ah chuan airport hawn hlima a nih dan ang ang kha a la ni a, standard a tlin loh bakah a hlui tawh avangin hmun tam takah a chim a, a kaw heu huau tawh. Kum eng emaw zah kal ta aṭang khan siamṭha tur te, santiri post dah belh leh light leh CCTV dah belh tura min rawn tihnate hi sum senso a crore têl hmanna tur a nih vangin kan la maimitchhinsan ta char char a ni.
Runway PCN leh surface hrim hrim hian duhthu a sâm lo em em; interview hrang hrangah pawh kan hmuh ṭhin hi. Hei pawh hi crore tam tak senna tur a ni. Kan PWD-te’n ni tin thlawhna thlawh chhuah hnuah an han repair ve nêl nual ṭhin a, thlawhnate an la ṭum ve thei ṭâwk ṭawk a ni ber mai. Kan Instrument Landing System (ILS) lah a hman theih hun (lifetime) zo tawh a, a thara thlak ngai a ni a, crore têl man tur a ni leh bawk. Kan equiptment dang tam tak–power supply system, etc. te pawh sum tam taka upgrade ngai a nih bakah, khawl hrang hrang awmna building tam zawk hi thawm ṭhat/sak thar ngai a ni tawh hlawm.
Kan Airport-a hautak taka kan rem khawm khawlte leh a hmunhma (vital installation) kan tihte hi venhim ngai em em, nileng zankhuaa ven ngai leh veng tura beisei kan ni. Mahse, tuna kan force neih police 50 bâwr leh CRPF 100 bâwr tan hian operation lai (thlawhna thlawh chhuah leh luh lai) takngial pawhin point pawimawh ven sen a nih loh laiin, darkar 24 venga patrolling tur chuan indaih ngaihna a awm lo sa hrim hrim. Tunah phei chuan kan Airport terminal building sak ṭhat a nih mek avangin hmun tam tak hman theih loh a ni a, force deployment hi sâwr zim/tihtlem a la ni viau zawk nghe nghe. Chu mai piah lamah, airport security, airlines security, cattering security, etc zawng zawng hian airport-a security hna thawk thei tur chuan kar khat training a, induction course an pass a ngai a. Chumi hnuah ni 18 training nei leh in, India ram puma a ruala exam AVSEC (Aviation Security) basic course an pass ngei ngei a ngai bawk. Hemi exam-ah hian question inang vek, a ni leh darkar inang vekin India ram puma NIELIT centre-ahte exam a ni ṭhin. X-Ray khawla duty ṭhin tan AVSEC basic pass-te tan Screener Course exam a pass ngei ngei a ngai leh bawk. CISF te, Indigo, Air India, etc. te chuan anmahni hmun khawpui lian hoah training centre neiin an staff-te tan exam hmachhawn tur hian training an kalpui a. Keini Airport-a duty state police leh CRPF, training centre facility nei ve lote tan chuan a buaithlak em em a ni. Hengte vang hi a ni ngei ang, nikum lam khan Ministry of Home Affairs lamin CISF company hnih lai mai kan airport security enkawl tura order an siam rup mai ni.
Hetianga kan sawi point hrang hrang aṭang ringawt pawh hian tuna kan Airport-a kum tina kan hloh zat mai piah lama ICAO duh dan zawm tura kan in upgrade a, staff mamawh zat kan inchhawr belh huna kan sum hman tur tamzia kan hrethiam mai chuan a rinawm, Airport hi state sorkar enkawl zawh chi a ni lo, tih hi.
Airport-te hi state sorkarin a enkawl tura ruahman ni se la chu Airport Authority of India (AAI) hi din a ni lo ang a, kan budget-ah hian kum tin airport enkawlna tur head a lo kal ziah a rinawm a, state zawng zawng hian airport kan nei vek awm e. Chutih lai chuan, airport kan neih theihna tur atana theihpatawpa tha lo thawh tawhtute erawh an chhuanawmin an hming kan theihnghilh thiang lo. Chutih laiin, kan sorkar kal tawhte’n kan Airport hi a enkawl theitu hnena hlan an lo tum ṭhin kha an tih tur dik tak an ti a. India ram airport dangte’n system changkang zawk leh passenger-te tana awlsamna nasa zawk Digi Yatra kan tih te, terminal building changkang tak tak, shopping mall, restaurant changkang, ṭhutthleng, phone charge mai theihnate leh inthiarna changkang fai tak tak an chhawp theih ang kan beisei lo a nih pawhin, thlawhna ṭum theihna kan nei zel duh a nih chuan kan sorkar hrawn mekin hma nasa lehzuala a rawn la hi thil tih ngei ngei ngai a ni e.
- R. Lalthlantlinga, Chaltlang