Police station-te tihchak leh community policing ṭha neih a ṭul

Police station-te hi police core functions leh basic policing hna thawktu bulpui ber an nih avangin ngaih pawimawha thuam chak leh tihchak an ṭul hle.

Police station (PS)-te a nih dan tur dik takin thuam chak ila, manpower leh lirthei leh hmanrua pawimawhte pek vek ni se la; kan tualzâl nun himna tibuai thei sualna chi hrang hrang hrêk beh leh dan beh a nih theih phah ang a, mi mangangte tluk luhna tlakin PS-te hi siam a nih chuan kan tualzâl nun a nuamin a thlamuanthlak hle dawn a ni.

Chuvangin, PS-te hi tihchak leh thuam chak nachang kan hriat hma loh chuan rule of law kenkawh te, crime control/prevention te, law & order maintenance-te hi a ṭha tak tak thei lo vang tih hi ka hmuh dan a ni ṭhin. Hemi hlawhtling tur hian ram hruaitute’n strong political will an neih a ṭul hle.

State chhung vawnhim hna police te, dan leh thupek kenkawh te, crime prevention te, law & order maintenance-te hi state subject a nih angin state sorkar mawhphurhna a ni a. Heng hnate thawk tur hian a bikin Police dept mawhphurhna a ni. Ṭha taka dan leh hraite (rule of law) kenkawhna hmun society apiang hi society nuam a ni ṭhin a; chutiang society kan nih theih nan Mizoram police-te hi tihchak leh thuam ṭhat a pawimawh tak zet a ni.

PS-te tha tichak turin ka lo vei ṭhin em em mai, community policing system ṭha neih hi a ṭul a. Tunlaia community policing atana kan kut leh ke ber hi VDP-te an ni a, VDP system hi reorganize a ṭul khawp mai.

Tuna VDP dan kan la hman hi Assam Village Defence Organization Act, 1966 Mizoram sorkarin a adopt mai kha a ni a. Kum 1981-ah Mizoram Village Defence Organization Rules 1981 siam a ni a, he Rules hmang hian tuna VDP-te hi din niin kalpui a la ni ta reng a. State puitling kan ni ve tawh a, Assam dan la hman zel hi kalsan a hun tawh. ‘The Mizoram Village/Community Defence Act & Rules’ thar hlak Mizoram State Assembly-in a pass ngei hman kan mamawh tawh hle a ni.

Mizo society hi community policing ṭha taka kalpui theihna society niin ka hria. Ka lo mitthla danah phei chuan a chunga sawi ang hian community policing dan ṭha tak siam ila, chumi hnuaiah chuan veng/khaw tinah mumal takin community police officer an awm ang a, an awmna ṭheuh jurisdiction neitu PS-te nen thawh hona kalphung (SOP) fel tak neiin an thawk ho ang. Duthusamah phei chuan veng/khaw tinah a ṭul dan azirin community police officer-te enkawlna hnuaia awm turin temporary police lock-up siam ni se la. Tiang chuan mumal takin Mizoram chhungah community policing system hi kalpui ila, tunlaia kan buaipui sualna chi hrang hrang lo pung zelte hi nasa takin kan veng thei ang.

Kan hriat angin state sorkar hi sum lamah harsatna a neih avangin mamawh tawk police recruitment tih theih a ni lo va. Community policing system hi mumal taka duan leh kalpui a nih phawt chuan police pangngaite hi duhthusamin tam lo mah se, nasa takin community policing hian min chhâwk thei khawp ang tih hi ka thlir dan a ni.

- C. Lalthanmawia, IPS (Rtd) (9436146391)