Assam Rifles chhuahsan ram hman dan tur

Kum eng emaw kal ta aṭang khan Aizawl Lammual leh a chhehvela Assam Rifles awm sawn chhuah rîvâ kan hre ta nual a. Hun rei deuh tawha khawtual mi leh Assam Rifles intih thiam loh vanga râl ang maia mipui lama ngênmu sûrtir vanga thi leh hliam tuar kan han awm chiah khan Assam Rifles (AR kan ti zel tawh ang) hi Aizawl khaw chhunga awm hi an hnawksakzia kan hre thar ti ila kan sawi sual tam awm lo e.

A ni teh tak a, AR Lammual tih hmingpu tlat infiamna hmun chu ‘Lammual’ a ni tlat a, AR ho hian keipui sahauh viau pawh hi a awm viau a ni. Hun a lo kal zel a, AR-te hi sawn chhuah duhna thinlung a lian tual tual a. Political party lahin huaisen tak takin ‘Kan sawrkar chuan AR-te hi sawn chhuah an ni ang’ tiin auhla pawh an nei fo ta a. Tichuan, Zokhawsang hmun thengthaw nuam leh mipui paltlang mai mai rem tawh lohna hmunah an awmna tur ruahman niin, sawrkar pawhin sum tam tak sengin a hmunhma an cheibawl a, in tam tak sak a ni bawk a. Rambuai a reh ta bawk a, Mizoram khawpui laili tak maia AR-te la awm tlat hi kan mamawh em em hran ta lo. Shillong khu kal tawh chuan kan hria ang a, la kal remchang lote’n an lo hriat ve tur chu, khaw daiah AR chuan hmun ṭha tak neiin an inkulh mup mai a ni.

Tunah chuan sawrkar hmalakna chak tak, thu mai ni lo, vangin phurhhlân siamin an liam phei ta bûng bûng mai a. Kan sawrkar hmalakna chak leh awmze nei tak vang hian lawmthu kan sawi a ṭul tak zet zet a ni. Heti a lo nih tak avang hian AR ram chhuahsan chu eng eng emaw atana rawtna a awm ta nual mai a, a ṭha ber tur hriatthiam pawh a har a, sawrkar tan pawh a luhaithlak viau awm e. Assembly House thar sak nan te, damdawi in sak nan te, bazar hmun atana (lo sawi ri faih an awm a ni awm e?) te leh recreation centre atante emaw rawtna pawl ang leh mimal angin a tam ta viau mai.

Kan ngaihtuahna sente a zahawmin ṭha viau angin lang mah se la, ‘A lanna tlang dang aṭanga thlir’ tel fo hi a ngai zel a. A nihna takah chuan AR ho khan khawpui laili taka awm chung siin khawpui vawng daia boruak thianghlim siam tura thing phun lam an ngaihtuah hauh lo ti bawl mai ila a dik awm e; a awm tawh sa erawh chu tiriral mai loin an humhalh ṭha viau a, a lawmawm viau thung.

Ngaihdan tam tak karah kan rilrua lian ber tura ka ngaih ve chu a tam thei ang ber thing, a par chi eng emaw zat bakah, evergreen tree lam phun belh vak ila, Aizawl khawpui kum tina in leh eng eng emaw building lian tak tak kan sak belh reng vanga lo lum chho zel ta hi vên nan a ṭha ber awm e. Park nuam tak lam hawi siam chungchang hi rawtna a awm nual nâin, mipui rilru sawh sawn thei tur dang rawtnate hi an langsar viau ni te pawhin ka hria.

A pawimawh ber chu, kan Mizo fate zingah landscaping thiam tak tak an awm tawhin a rinawm a, chungte aṭang chuan sawrkar hian intihsiakna angreng siamin, helai hmun hi master plan han siam hlawm se la. Chungte chu mipuiah tlangzarhin, mipui tam zawk ngaihdante la se la, thil ṭha tak a chhuak ngeiin a rinawm. Tin, landscaping-ah hian a pawimawh ber nia ka hriat ve chu, lirthei eng chi mah tlan kual theihna tur provision awm lo se, ‘smoke free zone’ ni tawp se la (hei hian meizuk pawh phal lo se). Park ngaw dup karah kea kala insawizawina nuam taka kal theihna turin kawng bik awm se la, chung baka a tlana insawizawi chi tan, kea kala insawizawi te nena intâwk buai thei loa tlanna bik kawngte pawh siam tel ni se a ṭha viau awm e.

Damdawi in atan hi chuan rawt tawh loh a ṭhat ka ring, kan khawpui chhungah hian hmun rem leh remloah private hospital kan nei nual tawh a, kan mamawh a phuhru ṭha viauin ka hria. Chu bakah, Assembly House atana rawtna awmte hi tih chi a ni chiam lo, Assembly House thar kan mamawh a nih chuan Khatla lama an la chhuahsan tur hi valh ila, a rem a nih phei chuan MLA Hostel-te pawh a hnaivaiah awm nghal se, a ṭha viau ang. Hmun fianrial nuam tak a ni dawn a. Tin, Science Centre chu Berawtlangah ṭha tak kan nei a, a kaihhnawih thing chi hrang hrang phun theihna tur pawhin hmun âwl chu a la tam viau saw maw le?

Engpawh chu ni se, khita ka rawtna ang khian, AR chhuahsan ram cheibawl dan tur master plan insiamsiak hi sawrkar hian rawt se la, mipui nawlpui aṭanga ngaihdan thawh duh tan thawhna hun siam se la. Chung ngaihdante chu draft master plan final hmain sawrkarin ngaihtuah leh ta se, final plan tak erawh chu sawrkarin committee a siam tumte chuan uluk takin han lepse se la, a tha ber chu a chhuak mai ang.

Hmanhmawh lo ila, kan ṭhatpui tlan theihna ber tur rawtna ṭha tak, ngaihdan hrang hrang thawh khawm aṭangte leh mithiamte ruahhman chhinna aṭangin a lo chhuak ngeiin a rinawm. Khelmual pawh hi AR Ground ti tawh lo ila, kan hnam ro hlu min hnutchhiahtu, politic lam rawngkai lo tu emaw hming chawiin (entir nan Rokunga Mual, etc) tih hming puttir ila rem tak ang maw?

- R. Lalrinkima, Hidden Lodge, Chanmari, Aizawl