Ruihhlo do – Kan la ti tak tak lo em ni?

26.3.2025 zana ka muhil thei lo, ka chîn ṭhan vak loh Yubtube ka en mai mai a. Tun hnaia Khawhri khuaa ruihhlo an man chungchanga Khawhri YMA President biakna ka ngaithla fuh a. Chuta ka rilrua lo awm chu–khawchhak lam aṭanga ruihhlo leh kuhva leh dan lova thil lo lut tam lutuk dang tur hian kohhran leh NGO lian tak tak te, pawl hrang hrang te, Police leh Excise te, minister te, Chief Minister leh a sawrkar leh mipui hian thâwm kan neih rin bakah, he lam atan hian sum eng eng emaw pawh kan vawrh viau emaw tih laiin, kan lo la ti tak tak loin, ka lo va nêp ve ka ti a ni.

Heti khawpa a ram pumpui tibuaitu, manganna nasa tak thlentu do tur hian finna leh rem hriatna thuk tak hmangin, mi nawlpuiin kan hriat bak, a theih dan zawng zawnga dang chat turin strategy ṭha tak tak in duang tawh ang chu tih laiin, Seling-Champhai kawngpui pangngai ngawr ngawr chauh hi kan lo la tinzawn em ni le?

YMA President sawi dan chuan, Mizoram chhimchhak khaw hrang hrang aṭangin Burma lam aṭanga lo luhna khân ṭha tak tak a awm ṭeuh a. Chung khua aṭanga lo lut zawng zawng chuan pumpelh theih miah lohin Khawhri hi an paltlang ngei a ngai. Thingsai phei chu Khawhri aṭangin km 30 lek, Ṭiau lui hnaih tea awm a ni. Ṭiau thlengin kawng ṭha taka blacktop vek tawh a ni. He lam kawng, thingtlang khaw tereuhtê tê lamah hian lirthei chi hrang hrang, truck lianpuipui nen, chhun zanin an tlan reng ṭhin a ti.

Seling-Champhai a ralmuan loh avangin smuggler ho hi he lamah hian free takin an kal ṭhin a ni awm e. Tuna an mi mante pawhin he lam kawng hi a free vanga kal an nih thu an sawi a ti. Truck lo kalte pawh khawi aṭanga lo kal nge an nih tih an zawhin, Champhai lam aṭangin an ti ṭhin a ti. He lamah hian Burma kal khân ṭha tak tak a awm a, mahse, chung zawng zawng chuan Khawhri an paltlang ngei ngei a ngai a ti.

Heti khawpa lo chânna khân ṭha Khawhri-ah hian engati nge tun thlenga eng department mahin out post emaw, check post emaw an la siam loh mai chu le? A khaw mite pawhin thuneitute an lo hrilh ṭhin tawh, mahse, ûksâk an hlawh ngai lo a ni awm e. Anni’n phalna nei lova lo tih ve ngawt fo chu dan bawhchhiat hlauhawm bawk si, thingtlang mahni hna thawh ngai bawk nen, ringhlel tak leh pawiti tak chungin an enliam leh mai thin a ni awm e.

A dik a ni, BJP sawrkarin vai ṭawnga dan thar eng eng emaw a siam hnu phei hi chuan thil ṭha kan ti emaw kan tih laiin, kan tum loh deuhin na takin mahni kan inpal âwk thei tlat si a. Pawisa a awm dawn phawt chuan, smuggler leh thil sual titu lama ṭang châk an tam bawk si.

Hmeichhiate humhimtu, lal ropui leh huaisen Zakapa khua, Khawhri khuaah hian sawrkar ngei hian smuggler ho danchah nan rang takin out post leh check post siam rawh se. A khaw mite pawhin an pui chak em em ang. Tun tuma an man pawh police kan fak hlauh police chu fimkhur thu hlaah a khaw mite’n an pun chauh a ni.

Ruihhlo leh sual kan donaah hian ring tak taka tlangau luai luai lo hian fîm tak leh fing takin, fimkhur tak leh uluk taka kil tin dapa do dan tur, strategy ṭha kan duan a, huai taka kan bawhzui a ngai tawh a nih hi.

- K Hmingthankaia