Sawhthing lei mawlh mai hi
Tun hnai mai, March thla tawp lam khan Mizoram khawchhak lamah khian kan kal kual a, an ṭhalaite nen kan titi ve nual a, kohhran ṭhalaia inhmang tak takte an ni hlawm. Sawhthing hralh hun laite a ni bawk nen, sawhthing an thar zat leh an hralh dante ka zawt nual a, min chhan dante khan ngaihtuah a ti thui mang e.
Kan kal hun lai kha Mizorama lo hâl hun hnuhnung ber ni aṭangin chawlhkar khat a chuang tawh a. Lo hâl zawh hlim deuh ni mah se, 'Tunlai in la âwl deuh em?' tia ka zawh khan, lo an hâl tawh avangin an âwl theih tawh meuh loh thu an sawi tlangpui a; thlâm sak, thlai chi thlâk leh tih tur dang dang a tam tawh thu an sawi hlawm.
Sawhthing an tharte an hralh ve tho a, mahse, khaw hrang hrangte khan zaa 20 pawh an la hralh loh thu an sawi hlawm. An sawi tlangpui chu, lo an hâl tawh avangin sawhthing chauh buaipui thei an nih tawh loh thu te, ringthar turah hna a tam tawh thu te, sawhthing an hralh zung zung thei lo chu buaithlak an tih thu te, kuminah chuan chhungkaw tam tak chuan sawhthingah 'risk' an lak ngam tawh loh thute a ni.
Sawhthingah risk an lak ngam tawh loh chhan ber chu–an beisei anga sawhthing an hralh theih loh vang a ni ber. Nikum 2024-ah ZPM sawrkarah beiseina sang tak nen khaw tam takah chhungkaw tam takin sawhthing an ching a, tunah an thar ta a, an beisei angin sawrkarin a lei zung zung ta si lo. An mangang a ni. An khawngaihthlak tak zet.
Tuna sawrkara hotute hi a tam zawk chu tlang ram loneih a taka lo tawng tawh, hlo thlo tawh ṭhin an ni hlawmin ka ring. Chuvang chuan Mizote'n tlang ram loneih kan kalpui dan chu an hre chiang hle hlawm ang. Lo vah hun, lo hâl hun, lo hâl hnua hna inkahpup chaw chhoh dan te, lovah thawh tur a tam dante leh ṭul a natziate an hre chiang hle ang.
Tunah hian kuthnathawktute hian ringtharah thawh tur tam tak an nei tawh a, tunah hian ringthar tam takah sawhthing an ching leh mup mup tawh zawk a ni. Chutih laiin nikum lama an chin sawhthing buaipui zui zel a la ngai bawk si. An va buaiin an va indaih lo tak em.
Tunah hian nikum lama an thar sawhthingte chu a zatve pawh an la hralh si lo. Sawrkar hian loneitute'n rim tak leh hah taka an thar sawhthing hi chak lehzuala a leisak a ngai tak zet; khawmuanpui chi an ni tawh lo.
Khawpui aṭanga ngaih ang ngawt hi a ni lo va, an manganzia leh an rilru hahzia hi hriatthiampuia tih dan kawng thar ngaihtuah a ngai tawh. 'Kan lei vek dawn' tih ringawt hi a ni ber lo, a tak taka lei zung zung a ngai tawh e. 'Kan lei vek dawn' tih chhung hian hna dangin a lo hmuak êr ûr tawh mai si. Ṭawngkam ringawta kuthnathawktute hmangaih anga insawi hi thiltihin an lantir a ṭul.
Sawrkar hian sawhthing leitu tur emaw, lei chhâwngtu tur emaw a hmu emaw, hmu lo emaw, an intiam angin sawhthing tharte hi an lei vek tur a ni a, chu chu chak zawka an kalpui a ṭul. Tuna sawhthing lei kalpui mek dan hi sawrkar hian ennawn se, chak zawkin sawhthing leisak ngei teh se.
- Zoramchhana