Ka thlir liam thei ngang lo ve

Lungthu pathuma ei rêl ṭhin, ṭhenawmte bai insuah ṭhin hnam zingah hian chungnung bera Pathian ropui takin awm se la, lei chunga a lawm em em Zo hnahthlakte chunga rem thu lêng rawh se.

‘Chutichuan, mi pakhat avangin sual khawvelah a lut a, sual avangin thihna a lut bawk a, chutiang bawkin mi zawng zawngin thil an lo tihsual avangin thihnain mi zawng zawng a fan chhuak ta a.’ Rom 5:12

February ni 1, 2021 aṭangin Min Aung Hlaing-a chuan mipui sawrkhar a hup bet a, a sipai khawi ho an inluling a, an duhna lam lam hawiin silai an hmet puak a. Nunau pawisawi lo thisen a luang a, an fanu, an fapa duat lai khawlaiah an tlu a, mipui thlabârin an ṭap a. Mahni in lum pawh luah ngam lovin ramhnuaia thosi leh vangvat karah ei tur leh sin lum tur pawh nei lovin an awm a, in luma nuam taka kan awm laiin ruahsur kara tawm hulna pawh nei lovin an rûm a, mittui nen ni leh zan an hmang ral a ni. An hmangaih an nupui leh pasal an chân a, nausen engmah la hre thiam lote hnute châkin an ṭap a. ‘Aw, ral tawh mai se lei ninawm hi’ tih hla a takin an sa a, an tan hei tluka tawrhna rapthlak hi a awm chuang awm lo ve.

Khaw nge remna zawngtu UNO palaite hi an awm tak? Khawiah nge oil ngah ram buainaa in rawlh zar zar ṭhin USA sawrkhar hi a awm tak? Chhantu an ngai a, mittui leh thisen chhuakin khawvel sawrkhar thil ti thei ṭanpuina an au a, khawvelin a beng a hupsan a. He mangchhia hi ṭhanharhsan daih an châk asin. Myanmar mipuite tawrhna hi a nasa em a, hetah kan lo râl hriat mai hi chu a hming chauh a ni asin. Kan chipui tam tak an awm a, tih theih erawh kan nei chau hle si a nih hi. America sawrkhar thil ti thei ber pawh hi an tan chuan mumang mai an ni a, remna zawngtu UNO pawh boruak ang lek a ni.

Aw, Myanmar mipuite u, in tan zalenna kâwl êng thuai se la, in tawrhna zozai hi malsâwmnaah han chang thuai the se aw. Beidawngin indawm kun mai lo u la; ni a tla a, a pil hlen ngai lo angina, in hrehawmna hian kumkhua chu a daih bik lo vang. Kan lo ṭawngṭaipui reng che u a nia. Raltlante lo chhawmdawl a, Mizoram sawrkhar leh NGO, kohhran leh mimal inpekna zozaite hi a va ropui em. Myanmar ram chhung buaina avanga Mizote min suihkhawm hlauh thung si. Kan tawrhpui che u a, kan thinlung hian a theihnghilh phal ngai lo che u asin. Ram tana nunna hlantu zawng zawngte zahna chibai ka bûk a che u.

Aw le, Myanmar Zo hnahthlakte chu rilṭâm tuihâlin an chipuite lo chu belh tûr dang nei hek lo, an rawn raltlan a, a chhia zawng zawng raltlante tihah kan puh thlu a. Ṭhenkhat inthlahrung taka an awm laiin, ṭhenkhat huangtau tak an lo awm ve bawk a. Hetih mek karah chhungte laka insawi fihlim duh avang ngawtin raltlante puhchhiatna a thang vel mek a. Thu dik hre hmasa lovin ṭawngkam pawh kan hmang duhtui lo hle mai. Hetiang inpuhchhiatna hi thleng nawn tawh lo se la; raltlante pawh Mizoram mi tan hnawksaka awm lo turin fimkhur rawh se.

Tumah mi fel famkim kan awm lo va, inhriatthiam tawnna hian min thlun zawm se la, kan ngaihsaknate hian Zo fate hrui khat min vawmtir mawlh the se aw. Sawrkhar pawh hian a tih tur ti se la, raltlante khawsakna hmun hi a hranin ruahman thei se la, kan felfai deuh ang. A chhia zawng zawng raltlante kan bûrbun a, hei hi a dik vek bik lo. Kan chhungkuaah ngei pawh rûk hmang, suam hmang kan kawl reng a, mite natnah thlensaktu lah kan awm deuh reng a. Drugs addict-te hian min tizak dawn chauh a nih hmel e; YMA hialin thupha a chawi tâk hi.

Ram hruaitute u, in thlazâr hnuaia Zo fate hi eng tin nge kan khawsakho zel dawn le? Tuna i thingkung phun daihlimah hian châwl hahdam hman lo mah la, tui pek ṭhulh chuang suh u. In thingkung phun daihlimah chuan ṭhang leh tharte an la rawn châwl hahdawm dawn si a.

- Zothansanga, Chhiahtlang Kawnveng. Phone–9612333536