DELHI ELECTION LEH ARVIN KEJRIWAL ZIRLAI

A hunlai a ni bawk a, nimin lamah ziak tawh mah ila i han chhunzawm leh teh ang. 

Rinlawk ang ngeiin Arvin Kejriwal-a kaihhruai AAP chuan hneh takin chakna a chang a. Seat awm zawng zawng 70 ah seat 62 la in BJP-in seat 8 an la a, Congress leh a dang zawngin seat khat mah an la ve lo. Kum 2015 inthlan aiin seat la tlem mah sela hetiang taka inhnehna hi India political history-ah a tam lo. Delhi mipui zaa 80 chuangin Arvin Kejriwal-a hruaina an ring tawk a, a hnuaiah an thla a muang tawk tih a hriat hle. 

Kejriwal-a pui hian inthlan campaign laiin thu mak pui pui a sawi a, "kan hnathawhah in lungawi loh chuan min vote tawh suh u" te a ti vak vak a. Mahse Delhi mipui chuan an lungawi a ni tih vote hmangin an lantir a, a ropui teh e. Hepa hian cheng nuai 25 man car man to a mamawh ve lo va, Wagon R ṭawng tawh lam a nei ve a, chu lah chu mi tuten emaw te an la ruksak vel ta mai mai leh nghal a! Kawrchung leh necktie lam a ngai pawimawh hmasa lo a ni ang, kawrlum leh nghawngbah (muffler) nena a thlalak hmuh tur a tam ber a... mahse Delhi mipuiin an ngaihzawn rawn tlat! 

Hindu pachal a ni a, mahse ram kaihhruaina tura ṭha nia a hriatah chuan Kristian sakhaw lungphum phumtu Isua Krista zirtirna a entawn ngam a, Hindu hoten Kristianah inleh a tum tiin an kher an kher ve lo! A thusawi tih rinawm nan Pathian thu a cheh ve sek lem lo va, mahse Pathian thu angin a thusawi a hlen ṭhin thung a! Ani chuan election manifesto uluk takin a duang a, a tih theih tur chin tawk a duang chhuak a, chu chu a takin a kalpui a, keini chu manifesto kan in ziah mawi siak thung a! Ani chuan "Ka ti ang" a tih chu a takin a lantir a, keini chuan "Kan ti ang" kan tih kha a sawi mam dan kan ngaihtuah zel thung! CM a nih chhung khan a kum khat sum lakluh chu cheng nuai 5 in a tlakhniam phah a, keini chu kum 5 chhungin a maktaduai telin kan pun phah thung a! Kan inang lo teh e! 

He hnehna (victory) hian beiseina thar min siam! India ram pum deuh­thawah serthum rawng (BJP-saffron) a parchhuak titih a, chumi hma in kutphah ropui (Congress) in India ram chu kum 60 chuang zet a hum rûn tawh bawk a, chung palian Goliatha te pahnih chu hmunphiah (AAP) tlawm tak, hmanni lawka keh tharin hneh takin a phiatfai thei tlat! India ram politics hi chhe hle tawh angin lang mahse, mi ṭha leh dik, zui tlak an rawn zuan chhuah chuan mipui hian kan la zui duh tih he hnehna hian a tilang chiang hle. Delhi mipui an fing tlat! Sum bawmpui hmanga thlemtu therhlo chi hrang hrang hmanga vehthlemtu ai chuan CM rethei leh mawlmang taka khawsa Kejriwal-a an ring zawk tlat... hepa hian a thusawi chu a hlen ṭhin tlat alawm! 

Result chhuah nia hnehna lawma Delhi mipui punkhawmna hmaah Kejriwal-a chuan tumah sawichhe ve lovin tumah kâp ve lo vin he thu ropui hi a sawi leh pek a: "A tak takah chuan kei hi ka pawimawh lo, AAP pawh hi a pawimawh tak tak lo, a pawimawh ber chu Politcis bung thar siamtu Delhi mipuite hi in ni. 

Kum nga kal ta khan party thar hnenah remchanna an pe a, chu chu kan beisei phâk loh a ni. Vawiinah chuan kum nga a lo ral hnu-ah chuan politician-te hnathawh mila vote an thlak tak avangin politics bung thar duhawm tak an siam ta a nih hi. Tunah chuan sawrkar dang leh party dang pawhin thatchhe takin hna an thawk thei tawh bik lovang. A chhan chu anni pawhin a lehpekah chuan an hnathawh milin mipuiin vote an thlak tih an hre tawh dawn tlat a!" tiin India politics-in bung thar duhawm tak a kai thu a sawi a. Chu bung thar siamtu Delhi mipui a fak daih, AAP leh an party thawhrimzia lam a sawi ve vak vak lo! 

Kan hmangaih Zoram hian he politcis bung thar hi i kai ve tawh ang u hmiang, kan sawrkar hrawnte hi an sum sem leh inzawrhna itawm lam ni lo vin an hnathawh milin vote ve tawh ila, Zoram thar hi a hranpaa koh chhuah kher a ngaih ka ring lo. Delhi mipui an â reng duh tawh lo, Mizo mipui pawh hi ât reng kan tum tur a ni bik lovang chu. Mizo mipui hian thil ṭha kan duh a, hnathawk ṭha sawrkar kan duh a, ram hruaitu ṭha kan duh a, Delhi khawpui anga ‘hlim’ kan duh ve a nih chuan an thutiama ding ṭhin, an thusawi anga ti ṭhin mihring i zawng ve tawh ang u hmiang. Cheng nuai khat emaw cheng nuai thum emaw min rawn zawrh dek deka vote liam duak duak tur khawpa mawl kan ni tawh lo ve Mizo mipuite hi...i harh ve tawh ang u. 

- Rev. PC Nghaklianmawia