KHA OFFICER KHA

Lungleia ka awm nawn leh laiin (2007 chho khan) ṭum khat Chief Minister a lo kal dawn a, kan lo hmuak a. Kei kha kohhran lama hotu pawimawh pawh ka ni lo va, kan hotute an kal remchan loh avangin ‘Nang, lo zu kal rawh,’ an tih kha ka ni. Chief Minister (Pu Hawla) chu a hun ruatah a lo thleng ta lo ngei a.

Chutia CM lo thleng tur kan lo nghah char char lai chuan officer pakhat (a hming ka zawt lo) nen kan titi dun ta reng a. Kei ka lo ṭawng duh ve bawk nen, ani pawh a ṭawng tui ve ta khawp mai. A thusawi tun thlenga ka la hriat reng, min tilawm em emtu chu, ani kha Supply dept-a thawk, lo kaisang ta a ni. A thil sawi chu hei hi a ni, "Buhfai hralhna pawisa (sale proceeds) dik taka ka pe lut kha ka hlim ṭhin khawp mai. Tunlaia kohhran Pathian ram kan chhiar a, kan lawm ang hi ni berin ka inhria," a ti a. Chu a thusawi ka han hriat chuan officer corrupt lo leh fel tak ni ngeiin ka hria a, ka lawmin ka ngaisang ru khawp mai.

Tun thleng hian kha officer thusawi kha ka la hre reng a, kan sawrkar hnathawk officer-te zingah hetiang mi hi an awm ṭeuhin ka ring. Tun hnu hian officer thar fel tak tak, corruption laka fihlim kan ramah hian an awm niin an sawi a, a lawmawm hle a ni.

Thawhlawm lam han sawi tel takah chuan, kan zah em em Pu Lalmanzuala, IAS (Rtd) khan kan kohhran thawhlawmte pawh hi corruption pawisa aṭanga lut a tam ni ang khan a sawi ve thung kha a ni a. Kohhran a thawhlawm lo lut hi a eng nge corruption aṭanga ‘note’ tih kan hre si lo va, rin thilthua lo hnawl ngawt lah a remchang bawk si lo. Kan pawm zel mai dawn chu a ni e.

Kum 2014-2015 khan MZP lamin sawrkar hnathawk zingah corrupt lo ber nia an hriat kha an thlang a. Hetih lai hian ka hna pui ber bakah Social Concern Dept Director hna kha min kawptir a. Dept Committee khan Mizorama sawrkar hnathawk corrupt lo bera an thlan kha hriatpuina pek ni se, tih a rel a. Dept Committee chunga Service Committee kan neih lai kha a ni. Dept Committee chuan committee lianah a han report a, min hnâwlsak ta tlat mai a nih chu, ka lungawi lo hle.

Pathianin min hruai zel a, kan ramah ‘Ka corrupt dawn lo’ ti politician-te kan lo nei ta zel hi a lawmawm hle. Inthlang ram kan ni a, inthlan dawnahte hian ‘Corruption-ah fihlim ka tum’ ti thei candidate-te hi nei ta zel ila a ṭha ngawt ang.

Tawk teh se, kha officer, a hming ka lo zawt ta lo kha chu aw.

-Rev Biaka Chinzah