Christianna leh kan nun

Christian zingah pawh keini Mizo christian-te aia inkhawm tam hi an awm a rinawm loh, keini aia Pathian thu ngai thla tam pawh an awm a rinawm lem lo. Kar khat hi kohhran pui, ṭhalai, nu pawl inkhawmin a khat a ni ber mai.

Mahse kan nun erawh ringlo mite tan leh sakhaw dang beho tana entawn tlak leh zir tlak a ni leh chuang hauh si lo. Kan kan christianna hian a tam zawk nunah awmzia teh vak a nei lo niin a lang. Pathian thu zawm kawngah leh nunpui kawngah hmuh tur a awm tlat lo. Christianna ina a ken tel nun dikna leh rinawmna, midang tana malsawmna nun hi kan nunah hian hmuh tur a vang khawp mai.

Fel famkim chu kan awm thei lo, mah se, dik tak leh fel tak, rinawm tak leh midangte tana malsawmna ni tur ang zawng chuan a nun theih; kan tum phawt chuan! Chanchin Ṭha la hre loten kan khawsak dan leh kan awmdan aṭang Chanchin Ṭha an lo hriat a, kan ṭawngkam chhuak aṭangtea midangten damna an lo chan theih nan tea kan nunte hi Pathian thu nena inmila hmang fo tur kan ni. Ringtu nundan tur ang ni loin kan nung fo a, kan khawsa fo ang lawi si.

Tirhkohte thiltih bua kan hmuh angin ringtu hmasate khan an thil neih ang ang an inṭawm ṭhin. Rilru hmun khat puin Pathian biak inah
ṭhahnemngai takin an awm ho ṭhin. An in lamahte pawh chhang an phel a, hlim tak leh lungawi takin an chaw an ei ho ṭhin a, Pathian an fak a, mi zawng zawng lawm zawngin an awm ṭhin. Chutiang ang chu ringtu hmasa (Christian hmasate) awm dan a ni.

Keini mizo, Pathian nung bia a, christian hnam intite nun dan erawh hi chu a danglam hle. Duhamna in kan khat a, midang ta tur eiruk kan hreh lova, khawngaihna leh lainatna tel map lovin dinhmun chhe zawk leh pachhe zawkte diriam kan hreh lo. Pawl leh khawtlang ang zawnga mob rule hmanga mi nunna lak chang te pawh kan nei fo mai, tualthat angah leh thil dik lo ti angah kan inngai chuang hauh lova, dik lo taka ram neih leh sorkar
aṭanga zangnadawmna (compensation) lak leh dawn kan hreh hek lo.

Pathian nung ringtu christian kan ni ta sa sa a nih chuan Pathian ringtu nun dan tur dik tak leh christian nun dan tur dik tak anga nun i tum tlang hlawm teh ang. Tuna kan nun dan tam tak hi chu sakhaw dang betute tan pawh kan hmuhsitawm hial asin.

Sual lah hi kan han hre thei em em a, mahni diklohna leh fellohna kan in hriat theih loh laiin midangte diklohna leh fellohna te tak te pawh hi kan han hre thei em em zel a, a zialo ṭhin ngawt mai. Kan kristianna leh kan nun hi inmawi teh se.

- Nawlchunga Chinjah, Siaha