Kawngpui kan nei ṭha dawn e

Mizoramah kawngpui eng emaw zat an sial a, Aizawl-Champhai, Aizawl-Siaha leh kawngpui dangte chu sorkar laipuiin a mi chhawr bik NHIDCL kutah dahin, anni'n construction company an ruai a, tunah chuan a mâm ta pur mai a, a lawmawm khawp mai. Amaherawhchu, heng kawngpui sial hian kan environment a nghawng chhe nasa a, a siamṭha lehtu tur chu Forest department an ni a, an compensation lak khawiah nge an hman tih kan en zui bawk ang.

Nikum khan khaw kar kawng mai ni lo, Aizawl khawpui chhung kawng te, Lunglei khawpui chhung kawngte leh district khawpui dang kawngte kha a chhe em em a, siamṭhat nan ruahtui tlak nasat lai a nih vangin mipui zawng zawngin kan tuar a nih kha. Aizawl khawpui chhung chhia phei chu MNF ṭhalaite'n hnatlangin an han bel vel kha a ni a, mahse, an hnathawh kha eng ual a ni lo a; eptu party ṭhalai an nih vang a ni pakhat.

Khang hun lai khan kawngpui khuar lutuk kha rawra hraw deuha han hnawh mâm mai awm kha a ni a, kan engineer-te khan an ngaihsak em em lo a, chung lam aṭanga ti tura nawrna a awm loh vang pawh a ni ang. Khatih lai kha chuan court-a kal mai chakna ka nei rum rum hial a ni. Mahse, tunah chuan a zia ta viau mai a, a lawmawm e.

PWD Minister Pu Vanlalhlana chuan kawngpui siamṭhatna tur pawisa a awm thu a lo sawi tawh a, Aizawl khawpui kawng hrang hrang km. 84 lai chu an hma dawn a ni awm e. Kawngpui siam tur pawh April ni 15, 2025 zan khan ribbon chep chatin a hawng hial a, kawngpui siamṭhatna tur ribbon chep chat meuha Minister-in a hawng erawh thil âwm lo leh ṭul lo kan ti mai thei.

Kum 1994 kha Mizorama Gospel Centenary kum a ni a, khatih laia Chief Minister Pu Lal Thanhawla khan Mizo mipuite tan centenary present atan Aizawl khawpui kha a bikin a siamṭha a, rawra leh balute pawh kha Jatinga lung vek hman a ni. Kawngpui pawh a nuam a, a daih rei viau a, mahse, kan leilungin a zir lo a, a chhe ve leh ta mai bawk a.

Tunah PWD Minister-in a sawi angin Aizawl khawpui kawng chhuat siam hna chu Bawngkawn aṭangin Ramhlun lamah an han thawk ṭan a, manual-a ti loin khawl hmangin an han luah dum hlurh ta mai a; hetiang hi kan khawpuiah kan tawng khât hle awm e. Paver machine hmanga an luan chu a rah pawh a nuam a, a mâm ṭha em em a ni.

Heng kawngpui siam thar mek hi mipui lam pawhin kan venhim a, kan duat a ngai ta a ni. An siam leh mai mai dawn lo tih hriat a ṭha. Kawngpuia luang zuih khawpa insûk te, motor silte phei chu dan anga chawitir zel tawh ni se a ṭha khawp ang.

- Lal Rinmawia