Zaipawl atan sum leh tha kan sen ral hi
Mizote hi zai ngaina hnam kan ni tih chu kan pawm tlang vekin a rinawm a. Chutih lai chuan zaipawl kan neihna a rei tawh ang ai hian khawvel puma lar khawp chu sawi loh, India ram puma lar khawp pawh kan la nei lo hi chu kan inen let a ṭul viau a tih theih ang. Chuti anga lar si lo chu zaipawl hrang hrang din nan leh an chet velna atan kan sum leh tha sen ral tamzia kan ngaihtuah leh miah lo em ni chu aw, a tih theih.
Synod Zaipawl
Synod Zaipawl sawi hmasa ta ila. Kum 2023 CKṬP chuan Synod Choir chet velna atan budget an duan chu Rs 13,10,000 a ni a. Hetah hian zinna, hla zirna, uniform leh music video siamnate telh a ni a. Hman zat erawh chu Rs 7,24,264 a ni a, a tlem viau lo a, Wales ramah zin phei se chuan hei ai hian a sang daihin a rinawm. Lunglei lamah Presbyterian Choir a ding bawk a, Synod Choir senso chanve an seng turah ring chhin ta ila, Rs 3,62,132 a ni ang. Dinna la rei vak lo Synod Mission Choir a la awm bawk. Presbyterian Choir nen hian an sum sen ral a inthlau lo turah ngai ila, Rs 3,62,132 angin chhutsak ve mai ila. Chuti a nih chuan kum khat chhunga Synod levela zaipawla sum sen chu Rs 14,48,528 a ni ang.
Pastor bial tin zaipawl
Pastor bial zaipawl hi bial tinin kan nei thei deuh vek bawk a, Synod hnuaiah bial 223 vel a awm. Pastor bial tin deuh thawah hian sum kal tamna ber leh budget kan dah san ber chu bial zaipawl rawngbawlna hi a ni ang. Aizawla pastor bial pakhat chuan Rs 1,50,000 vel zel kum tin an seng ral angin a chhut theih bawk ang. Chuti a nih chuan bial 200 chuan kum khat chhungin Rs 3,00,00,000 vel an seng ang (Bial tinin zaipawl an neih loh vangin bial 200 anga chhut a ni.) Hla zirnaah ei leh in tlem azawng a kal ral a, kum khat chhunga an tha sen nen han belhkhawm chuan a tlem viau lo ang. Hei chu a chhut peihin chhut tawh se la.
Kohhran tin zaipawl
Kohhran zaipawl hi kohhran tinin kan nei bawk a, tun hma chuan sum sengso lem lovin an zai mai ṭhin fo ang a, mahse, tun hnaiah chuan zaipawl tura hla zir tam zawkah hian thingpui in an intihhmuh ta viau a. Refreshment-ah hian ṭum khat hla zirah Rs 300 vel hisapsak ta ila, average-a lakin thla khatah vawi 3 zir ṭhin angin chhut ila (a chhan chu zir loh lai deuh te a awm ang a), kum khat chhunga hla zir ṭum 36 refreshment manah Rs 10,800 a ni ang. Synod hnuaia kohhran zat hi 892 vel a ni ang (pastor bial 223-ah chuan bial khata kohhran 4 vel zel awm ang ni ta se, 223x4= 892). Chung kohhrante chuan zaipawl refreshment bika an sum hman ral zat belhkhawm chu Rs 96,33,600 a ni ang.
Tichuan, zaipawl atana Synod hnuaia insensona zawng zawng belhkhawm chu Rs 1,16,44,260 a ni daih ang. Zaipawl ropui tak neihna tham sum chu kan seng ral lo maw? Mahse, ti nge zaipawl ropui kan neih hleihtheih loh le, Mizoram chhunga lar bak kan la awm lo si a ni lo’m ni? Tuna mi khi kum khata sen ral a ni a, kum 20 chuangah phei chuan kan senso hi turu tak a ni. Kan la sengso ngam zel ang em? Kohhran leh a chunga chengte hian kan ngaihtuah loh lam tak a nih a rinawm.
Synod hnuai ni ve lo zaipawlte
Tun hnaiah chuan para church leh pawl eng emawten zaipawl an din leh mek bawk a, sum eng emaw zat a kal ral nual bawk ang. Anni ho hi bial zaipawl tlukin hla an zir a, an zin kual nasa bawk; chuti a nih chuan an sum sen pawh a inzat thuak awm e.
Synod hnuai lovah kohhran tam tak kan awm a, zaipawl dang ṭhahnem tak a awm mek bawk tihna a nih chu. Chung kohhran pawl dangin zaipawl atan sum an sen ral hi Synod hnuaia bial zaipawl belhkhawm sum senral aiin a tlem a rinawm loh, mahse, a inang turin chhhut ila. Mizoramin zaipawl atana kan sum senral a rawn lang uarh thei ang a, chengvaibenchhe 35+ vel hi kum khatah zaipawl tana kan sum luang ral a ni tihna a nih chu. Hna ropui a va thawk thei dawn em!
Zaipawl kum khata sum hman zat
1 Synod Choir - Rs 7,24,264
2 Presbyterian Choir Lunglei - Rs 3,62,132
3 Mission Choir - Rs 3,62,132
4 Bial Zaipawl belhkhawm - Rs 3,00,00,000
5 Kohhran Zaipawl belhkhawm - Rs 96,33,600
6 Para churches - Rs 96,33,600
7 Other churches - Rs 3,00,00,000
TOTAL - Rs 35,07,15,728
Tuna kan sum sen ralah khian zaipawl member-te’n kan tha sen a la tel ve lo. Zaipawl hla zir nana ṭhalaite hun khawhral hi mi pakhat tan darkar khata Rs 50 lek anga chhut pawhin a ṭhahnem tham khawp ang le!
Kan ṭhalai rual mangang tan sum seng zawk ila?
Heta kan sum sen ral tarlan hian tum a nei a, chu chu zaipawla sum seng vaka ṭhalai tam tak sual kawng zawh leh ruihhlo bawiha tâng kan ngah si hi a inhmeh lo em em a ni. Kan ṭhian leh unaute ruihhlo bawihah an tâng mek a, kan khawtlang nun a thothang ṭha thei lo va. Ṭhalai rual hna nei lovin an rum tlawk tlawk a, nupui pasal nei ṭha ngam mang lovin an tal vel huat huat mek a, nu leh pa an rum mek a ni. Chutih lai chuan sum ṭhahnem tak chu zaipawl neih nan kan lo pe reng a lo ni a, zaipawl leh hla zir vanga piang thar sawi tur an vang si! Ruihhlo ngaite pual hian camping mai ni lo, home leh recreation centre te, after care dinte hi ngaihtuah zawk ila. A nih loh pawhin zaipawla kan sum sen chanve tal hi heti lamah hian hmang ila, a ṭha zawk lo maw?
- Kima Mivam