Beidawng suh

JK Rowling khan a lehkhabu hmasa ber ‘Harry Potter and The Philosopher’s Stone’ a tihchhuah dawn khán vawi 12 zet publisher-te’n an hnâwl a. A tàwpah Bloomsbury-in an publish-sak hrâm a. Mahse, khawvêla ziak mi lâr ber leh ziak mi zínga billionaire hmasa ber a rawn ni ta a ni.

Stephen King-a hre lo hi kan awm àwm lo ve. A lehkhabu (novel) hmasa ber ‘Carrie’ kha publisher 30 chuangin an hnáwl a. A beidawng lutuk chuan a manuscript chu bawlhhlawh báwmah a paih hial a. Mahse, a nupui Tabitha-i chuan beidawng lo tùrin a fuih a. A tàwpah chuan Carrie chu publish a ni ta ngei a, bestseller a rawn ni chho va, history-ah hian Stephen King-a hi hming a dài tawh lo vang.

‘Queen of Mystery’ emaw, ‘Queen of Crime’ tia khawvêlin a hriat Agatha Christie kha a vawi khatnaah a hlawhtling bîk mai lo. A lehkhabu hmasa ber ‘The Mysterious Affair at Styles’ kha vawi 6 zet hnâwlsak a ni a; hmeichhia a nih vàngte pawh a ni ang, an lo iai a ni. Mahse, history chu kan hria e! Detective thawnthu 66 lai a ziak a, short story collection 14 a ziak bawk. A lehkhabute hi billion 2 chuang zet print a ni tawh a; Shakespeare-a leh Bible copy zât zet a lehkhabute hi chhut a ni tawh.

William Golding-a lehkhabu ’Lord of the Flies’ kha publisher 21 laiin an lo hnâwlsak a. Mahse, William Golding-a chu a beidawng duh lo va, a ziak zel a, a bei zel a; a tàwpah chuanLiterature-ah Nobel Prize a dawn phah ta daih asin le!

Herman Melville-a lehkhabu ‘Moby Dick’ hi a hun lai chuan mi tam takin an sawisel a, Melville-a nun ngei pawh khan a tuar a; rilru harsatna hial a thlen a ni àwm e. Mahse, a boral hnu-ah a lehkhabu chu mite’n an han belhchian chuan an dah sáng ta viau mai a. American literature-a lehkhabu ṭha ber leh ropui ber, a sûlsutuah an ngai a ni.

George Orwell-a ‘Animal Farm’ hi a tìrah chuan an lo pawm lo nasa mai a, publisher eng emaw zâtin an lo hnâwl a. Publisher pakhat phei chuan, “Ramsa thawnthu an zuar ngai lo,” a lo tih khum hial a. Mahse, vawiinah chuan George Orwell-a lehkhabute chu khawvêla lehkhabu hmingthang ber an lo ni ta a; Animal Farm leh 1984 phei chu lehkhabu hralh tla ber páwl a rawn ni ta a ni.

Chuvàngin, beidawng suh!

- Isaak Roluahpuia, JF Cottage, Shillong