Fûrpui hmachhawn tura hmalakna

Kan hma lawkah fûrpui kan hmachhawn dawn a, eng ang takin nge ruahtui a tlak tam dawn kan hre lo a; lir pawh a nghîng lo ang tih tu ma’n kan sawi thei lo. Khâm pang bekberekah in kan sa a, lir chhetê pawh nghing se, mangkhawng hlauhawm taka kan khawsa tih kan inhriat reng a ṭul khawp mai. Pathian venna vangin lirnghing nâ kan la tuar lo a, a zahngaihna vangin kan tuar lo pawh a ni thei.

Fûrpui lo thleng tur atan UDPA department te, Central YMA leh Smart City hmalakin Aizawl khawpui chuan inrâlrinna dâr an vaw ta chuah chuah mai a. Sorkar kutke berte zinga mi YMA branch-te pawh phûr takin hnatlang an nei a, pawl angte pawhin hnatlang an nei chho zel a ni. YMA branch hrang hrangte chuan tuihâwk luankawr thenfai hna nasa takin an thawk a, an fakawm hle.

Kan tui luankawrte hi engkim paih nan kan hmang emaw tih mai tur a ni. YMA-te'n an huam chhung ṭheuhah thapui an han thawh chu, luikawr balhzia, leivung leh bawlhhlawh tamzia a hmuh theih. Nasa takin an hai chhuak a, a paihna turah motor hmangin an paih hlawm a, an va fakawm tak em! Engkim mai hi sorkar tan tih vek theih a ni lo a, chuvangin, Mizorama pawl ropui leh zahawm YMA-in ṭan a la hi a hmuhnawm tak zet a ni.

Aizawl khawpuiah hian thingtlang aṭanga pêm lut an pung zel dawn a, an in sakna pawh a duhtui lo viau hlawm. Hengte hian an in bul tui luanna pawh siam lem loin, tuihâwk kawngbo an siam fo a. Chungte chuan in thlengin a timin ṭhin a, thihna hial pawh a awm châng a awm. Chuvangin, in ṭa tak tak kan sa a, kan tuichhe paihna lamah hmalakna a awm loh chuan mahni mai ni lo, ṭhenawm leh a veng ang pawhin harsatna leh chhiatna kan tawk fo.

Kan leilung luang ral tur leh a tichhe thei tur angin hmasawnna ni si, kawngpui kan sial mup mup a. Chutih lain, kan ramngaw humhalh lêk lo leh sik leh sa danglamna veng him miah loin kan che bawrh bawrh mai si. Ṭhâlah khua a lum em em tawh a, fûrah ruah namenlo a sur ṭhin a; heng hi ramngaw kan tih chereu vang a ni tih kan hriat a pawimawh ngawt mai.

Chuvangin, fûrpui hmachhawn turin kan in leh a vel a him em? Ruah nasa eltiang sûr ta se kan tuihawk luankawr a fai ṭha em? Chu chuan himna min thlen ang em tih hi kan ngaihsak reng a ṭul ta. Fûrpui lo thleng turah engtin nge i hmachhawn ve dawn le?

- Lal Rinmawia