India Danpui Article 371G-Special Provisions Mizote humhalhna bik i hmang ṭangkai ang u

India sorkar leh MNF inremna (Peace Accord) azarah India Danpui Article 371G-ah Mizote tan bik special provisions thun luh a ni a. He special provisions hi Mizo ṭawngin tawi têin sawi kan tum a ni.

Kum 1986 hma lama Central Acts Mizorama la hman mek huam tel lovin, kum 1986 hnu lamah chuan India ram rorelna sang ber Parliament-in dan a siam reng reng chu Mizoram Legislative Assembly-in resolution pass-in a remti a nih chauh loh chuan Mizote sakhua (Mizo religious practices), Mizote khawtlang nun ho dan (Mizo social practices), Mizo hnam kalphunga chin dan (Mizo customs, culture & traditions), Mizote kan ram leilung chungchanga neitu nihna leh chanvo (transfer & ownership of land) khawih pawi leh khawih buai thei a nih phawt chuan heng Parliament dan siamte hi Mizoramah hman a ni ve lo vang (shall not apply to the state of Mizoram) tih hi chiang taka ziah a ni.

Mizote’n India Danpuiah kan sakhua, kan hnam nun dan phung leh hnam zia leh chîn dante leh kan ram leilung humhalhna atan a bik taka humhalh sakna special provisions kan nei hi kan ngaihsak tawk lo hlein ka ngaihtuah fo ṭhin a. Kum 1986 June ni 30-ah Remna Thuthlung (Peace Accord) ziah a nih khan Mizoram mipuite kan lawm em em a nih kha. Kum 1986 hnu lamah tu sorkar mah khan vawin thlengin he India Danpui Article 371G-special provisions kan neih sa ni reng si hi uluk taka bih chian leh zir chian tum sorkar kan la neih lo hi a mak ka lo ti ṭhin. Political party tu pawhin an sorkar chhungin ngaihsak nachang an hre lo nge? State Law Commission leh CM legal adviser-te an awm tho chung khan he humhalh bikna kan neih hi hman ṭangkai tumna a awm miah lo hi a mak khawp mai!

He special provisions zinga mi vawin thlenga kan hman nghal awm chu Mizoram Legislative Assembly member zat hi 40 a ni ang tih chauh hi kan la hman awm chhun a ni rih.

Kan sakhua, kan hnam nun leh ziarâng, kan hnam invawn dan, khawtlang nun leh kan ram leilung, etc. humhalh bikna clause-te hi uluk taka zir chiangin, kan inhumhalh bikna tur dan (special local laws) sorkarin a siam a ṭul hlein ka hria.

A hrim hrimin, hetiang special provisions ṭha tak nei reng si, hman ṭangkai kan tum lo hi a uihawm. Lal Isua'n tehkhin thu a sawi pakhat, talent khat dawngtuin peipun tum miah lova a fûn ṭhaa dahṭha ta ang kha kan nih duh hmel ka ti. He inhumhalh bikna kan neih hi a neitute hian hman pun kan tum si loh chuan India Danpui chhungah ziakin a awm satliah ringawt tihna a ni. Dante chu mahni hamṭhat nana pawt sawi kual thiam thiam chan a ṭha mai ṭhin a. Hnam dang/vai ho tu mahin he kan special provisions hi hmang ṭangkai turin hma min laksak dawn miah lo, a neitu Mizote, a bikin kan MLA/legislator-te’n mawh an phur bik zual ang.

Hmalak dan tur atan entirna pakhat lo sawi ila. India Parliament hian dan thar a siam apiang chu Law& Judicial department hian uluk takin an lo bih zel ang a, kan inhumhalhna bik (special provisions) kalh leh rem ve lo apiang chu Mizoramah a hman ve theih loh (not applicable to Mizoram) tiin an lo enfiah (vet) ṭhin turah ka ngai a. Chu chu Mizoram sorkarin Assembly House-ah an ngaihtuah ho hnuah Mizoramah hman a ni ve lo vang, tiin resolution an pass hnan ṭhin tur ni awm tak a ni.

A tawi zawngin sawi ila; India Parliament-in dan thar eng pawh a siam reng rengte hi Law& Judicial department emaw, hemi atana ruat bikte’n emaw special provisions kan neih nen inrem ve lo leh inkalh lai a awm leh awm loh lo enfiah (vet)-tu an awm a pawimawh hle tihna a ni.

Mizote’n hetiang inhumhalhna bik special provisions kan nei a ni tih hre rânin India Parliament-in dan thar a siam reng reng hi chîk taka lo bih leh zir chian nachang kan hriat a ṭul tak zet a ni.

- C. Lalthanmawia, IPS (Rtd) (9436146391)