Chapchar Kût leh tunlai zaithiamte
Mizoram buai reh hnuah vawi eng emaw zat chu Chapchar Kût zalen takin kan hmang liam leh ta a. Thupui ṭha tak tak, Chapchar Kût leh Mizo nunphunga kan lo neih ṭhin mual liam ta nia kan hriat leh, liam mekte tharthawha chawi nung leh thei tur nia an ngaihte Chapchar Kût Committee-in an rawn thlang a. 'Zo nun ze mawi chawi san' tih te, ‘Zo nun ze mawi – tlawmngaihna,' khawvel ram dang leh hnam dangin an neih ve loh ti hiala kan chhuan em emte leh, 'Zo nun ze mawi–Hawihhawmna' tihte hi kan thupui mawi tak a ni ṭhin. Thupui sawitute’n hun hman rei hlau tak chungin thiam takin an sawi ṭhin a, a ngaihnawm ṭhin hle a ni.
Nimahsela, hun hnihna, chawhnu lam, hun tam zawk ṭhalai leh naupang lamte’n zai leh lâmna hun hmang tura Lammual chhunga kan zîk hut hut laia zai tura an ruat hote’n kan kal khawm chhan leh kan thupui hawi map lo, khawimaw laia an larpui love song ngialngan tak mai an han sa mai ṭhin hi chu! Kei putar kum 80 chung lam tan hi chuan a ngaihnawm lo mai ni lovin, ka lo inseh ruh ṭeuh zawk ṭhin a. Heng ai hian Pu Rokunga’n Mizo nun ze mawi chawisanna tur hla tam tak a phuahte hian an zaithiamna hmangin mipui han awi se la, ṭhalai leh naupangte’na kan lo zawm dual dual theih tur leh, Zo nun ze mawi kan chawisan theihna tura rilru chawk tho thei tur hla a ni hlawm si a.
Heng Pu Rokunga’n duh taka Mizo mipui leh Mizoram tana a phuah:
1. Kan tlang kan ram, a hring a mawi, tlawmngaihna pangpar mawi a vul
2. Kan Zo tlang ram nuam hi chhawrpial rûn i iang e
3. Kan ram rorelna pawl hi, Aw Pathian malsawm la
4. Raltiang i kai ve ang
5. Mizo kan ni, kan lawm e
6. Aw zoram nuam i hming a mawi mang e
7. Aw, nang Mizoram tlang nuam
8. E Khai! Hlim rawh u, nui rawh u
9. Kan Zoram nuam leh mawi, mihrang pianna
10. Aw ka pianna ram, kan Zoram nuam
Hengte hi Chapchar Kût kan hman leh hunah chuan kan ṭhalai zaithiamte hian sak nachang rawn hre ve tawh se ka va han ti em; sa turin a ngenin ka ngen nghal bawk e. Tin, Chapchar Kût committee-te pawh ka ngen bawk a che u; zai tura in sawmte apiang heng ka hla rawn ziah zinga mi hi sa turin rawn ruat hial teh u, tiin duhthu ka rawn sâm e.
- KC Chhangte, Nursery Veng, Aizawl
Phone: 9436361653