Pate ngai rual
Naupangah pawh naupang tak, nu tel loa la tlei thlawt lo, kawng engkima an nu tea la innghat, nu ngai ngawih ngawih, nute pawhin an la kuah deuh chawt maite hi ‘nute ngai rual’ tiin kan sawi deuh ber awm e.
Chutiang lo pawhin, tlema tlei deuh tawh pawh naupang hrim hrim, rawlthar/tleirawl la rual pha lo deuhte hi chu ‘nute ngai rual’ tiin kan sawi vek a ni awm e. Nuin a fa naupang deuhte a thihsan hian a fate khawngaihna lamah, ‘nute ngai rual lek an la ni asin maw le,’ kan ti fo mai.
Nute hi an hlu a, an tel lo chuan in chhung a ruak a; naupang chauh ni lovin pa tan pawh an hlu. In chhungah naupang awm sep sep se, bengchhengin ri nuaih nuaih mah se la, nu ber a awm loh chuan chu in chu a reh tlat!
Chuti khawp chuan nute an pawimawh avangin ṭawngkauchheha ‘nute ngai rual’ tih kan lo neih pawh hi a mawh lo ve!
Nu leh fate chu inkâwm ngeih sa, inngai em em an ni deuh zel. Nu tel loin fate an tlei meuh lo a; pa tel lo hian fate hi an tlei thei khawp mai, ‘pate ngai rual’ kan ti khât hle.
Fate’na an ngaih viau pa chu nupuite ngam lo, thaibawih nia ngaih deuhna a awm tlat hi kan ṭhanmawhbâwk niin a lang. Thaibâwih nihna pumpelhna kawng khat atan chuan pa chu in chhungah a intinêlawm duh lo va, fate nen an inkar a zau ta tial tial a. An inkâwm ngeih lo ni satliah mai lovin, fate’n an harsat manganna pawh an pate hnenah an thlen ngam ta lo va. Kan kohhran leh khawtlang nun hi a fel ta lo nuaih mai ni hian a lang ta!
Ṭum khat chu inthlannaah ka duty ve a, kan duty-pui pakhat chu a phone a rawn ri a, loudspeaker-ah a dah bawk si a. A nupuiin a rawn biak bakah a fate an rawn ri nak nak a, a fate’n an ngaih tawh thute an rawn sawi a, nuam a ti hle mai. A be zo chu kan ṭhian, kan duty-puite chuan, ‘Nau awm ṭhintu zawk a hriat hle mai! Ina haw huna tih tur a va chiang ve!’ titein an fiam zui a. Phone a biak laia nuam a tih tehlul nen, nuam a ti zui ta hauh lo. Chu mai ni lovin, a sawi duh loh lohte a sawi zui ta bawk.
Hetiang hi kan rilru puthmang a nih deuh ṭhûm avang hian kan khawtlang nunah pawh hian pa leh fate inlaichìnna ṭha tâwk lo hian nghawng ṭha lo a nei zel ta a ni mai lo maw? Pa leh fate inlaichinna siamṭhat hi zaha lak tur chi a ni lo ve. Fate leh pate hi inkawm ngeih se la, inngai em em mai se la. Pain fate a ngaih viau a, fate’n pate an ngaih viau bawk hian dem zawng ni lovin ngaisang zawk ta ila. Fate hi ‘pate ngai’ ni vek se la, Kristian chhungkua kan sawi fo pawh hi tun ai hian kan hnaih leh zual zawk thei âwm asin!
-Dr. Vanlalvanga Ralte