Mizoram sik leh sa chhe lo turin i harh chhuak ang u

Lunglei ah ruah a sur ve ta, Pathian hnenah lawmthu i sawi ang u.

Tukin zing dt 15.4.25 dar 7 am vel atangin ruah a sur a, a va han lawmawm teh reng em. Kumin thal- khawro hi a rei palh a hlauhawm hle a, Lunglei ah tui harsatna pawh kan tawk mek laia, ruah a lo sur ta hi a lawmawm takzet a ni.

Mizoram himna chhan hi Pathian khawngaihna leh zahngaihna vang chauh ani:

Pathian khawngaihna avangin Mizoram hi van ruahtui malsawmna leh sik leh sa kan dawng kumtin a, heng chunglam malsawmna a thlawna kan dawn te hi ngaihtuah uluk nachang hre lovin ngaiah kan neih mai thin a, chik takin han ngaihtuah thin ta ila, ruah te hi hun rei tak sur lo ta se, kan tuar nasat tur zia hi han dawn teh, a rapthlak tur zia hi.

Chuvangin, sik leh sa a hun takah kan dawn kumtin fo theih nan kan ram leilung te, ramngawte, thing leh maute, lui te (forest & environments & wildlife) humhalh that nachang kan hriat nawn fo a va tul tak em. Vawin thlenga lirnghing nasa leh thlipui nasa tuarna lakah kan la him te hi Pathian khawngaihna leh zahngaihna vang liau liau a ni tih hi hria ila, Pathian hnenah lawmthu sawi in a zahngaihna leh venhimna i dil theihnghilh lovang ang u. Isua Krista Chanchintha zar kan zo hi he India ram chhung leh pawnah tarlanga, nuna lantira, Mizoram hi model state ni turin Pathian ropui nan hma i la zel teh ang u khai.

- C Lalthanmawia, IPS(retd)