Ram pum huap zirna kan ngai pawimawh tak zet em?

A thu chuan zirna ṭha kan ngai pawimawh hlawm khawp mai. Kan ram hruaitute hlei hleiin an ngai pawimawh. Sawrkar thar (ZPM) a lo ding a, a changtu Minister chet dan aṭangin kan lo lawm hman viau tawh a. Zirtirtu ṭha tak takte khawpui aṭangin an han chhuak sang sang a, kohhran leh khawtlangah an ṭangkai bawk si; thingtlang leh khawpuiah zirna ruaikhai takin a kal ṭan tawh dawn e, a va lawmawm tak em! ‘ZPM sawrkar nge nge’ mi tam tak chuan an lo ti hman tawh hial.

‘Mahse, Lalpa a rei lo em!’ tih ang mai. Kil hrang hrang aṭanga nawrna ni maw, khawpui lamah bawk an lut leh ta sup sup mai. Principal leh zirtirtu (professor/associate professor/assistant professor/lecturer) post ruakte pawh an fill-up thei tawh ang chu maw kan lo tih rilrukte kha mumang ang maiin a thâmral leh ta. Pawi tak a ni.

Zirtirtu sem rual kan ti thei lo emaw, principal post ruak (a bikin, thingtlangah kum li/nga lai lo ruak tawhte) kan hnawhkhat thei lo emaw a nih ngat chuan, ‘Zirna siam ṭhat ka vei e’ kan tih ai chuan tuaiin ‘Thi ka nei’ ti se a awihawm zawk hial ta ve ang. Tun hnaiah Mizoram chhim tawp leh hmar tawp thlengin ka zin kual a, higher secondary school leh college lam pawh ka tlawh nual a, an khawngaihthlak hlawm tak zet. Principal nghet neia ram an awm lo. Zirtirtu senior an pension a, pension lo, che thei deuhte’n khawpuia transfer an dil a, an hlawhtling zel bawk si; zirtirtu nghet lo rualin naupang an enkawl. Zirna kan tisawngkawn , kan sawp chhe zo tak ngial dawn. Khawpui lam chu ziaawm tak an ni; principal nghet nei lo college ṭhenkhatte phei chuan a nghet neih an châk vak lo.

Ram pum huap zirna siam ṭhat kan duh tak zet chuan, tlak phah ṭhak ngama kan chêt a ngai tawh. Zirtirtu sem rual (transfer & posting) hi kan ti thei ngei ngei tur a ni. Khawpui aṭanga hmun hla leh hrehawma sawn chhuahte’n hrem tuara an inngaih loh nan, a hla leh hrehawm apiangah special allowance pek tam mai tur. Chuti chung pawha la luhlul tlatte chu voluntary/compulsory pension pek mai ni se.

Kan ram khawpui ber a ni bawk a, Aizawl hi nuam kan ti mah mah. Sawrkar hnathawkte pawhin kum hnih khat lek chhuahsan pawh thih hreh takin kan hreh hlawm. A ni em em lo. Kan rilru sûkthlêk (mentality) kan thlak a ngai. Kohhrana rawngbawltu/upa te kan ni lawm ni. Missionary-ah inngai ila. Kan politician-te thiam loh tak pawh a ni pakhat e. Thil ṭha zawng zawng khawpuiah kan dah vek zel. Kan hotute pawh kan khawhawi kan tihzau hlat a pawimawh ta. State university Aizawla dah ngei ngei tur ang rilru kan put chhung chuan ram pum hmasawnna a rualkhai tak tak thei lo vang tih i ring ang u. Traffic jam erawh kan tipung zel ang. State capital-a awm ngei ngei tur bak thil pawimawh dangte hi chu hmun dang, dahna âwmah chuan dah hreh lo ila.

Tun hnaia adhoc aided high school ṭhenkhat sawrkara dah tum chungchangah, ‘zirlai 60 chin’ tih ang chi leh a thawk mek hrehawm tinrêng lo tuar tawhte chhawk tumna ang lek lek chite phei hi chu thil ‘serious’ lutuk, tih rum rum chi loh a ni tih hriat a ṭha. Mi dik, huaisen kan ramin a mamawh hle.

A khaikhawm nan: Ram tana ṭha turah chuan, a bikin zirna siam ṭhat kawnga ṭan laknaah kan ram roreltute hian tlak phah ṭhak dawn pawh ni se, dodalna nasa tak karah pawh, huaisen takin kalpui hmiah hmiah rawh se. Ram an hmangaih tak zet chuan an la lawm zawk tho vang. Tlak pawh an tla lo bawk ang. NGO/zirlai pawl, etc. te pawhin chutiang kawngah chuan sawrkar thlawpin an kut tihchak tum bawk ila; kan thlawp theih ngang loh a nih pawhin dodal lo tal ila, hma kan sawn ngei ngei ang.

- Dr. Lalsiamhnuna, Phone - 8131822506