Kohhran mi?

Kan thupui tur hi a ṭha vêng vâwng viauin ka hria. Kristian ram kan ni a, thai lan ve zeuh zeuh pawh hi a âwm ve thoin ka hria. Eng ang mi nge maw ni le, emaw, eng ang chhungkua nge, tih hi inzawh chang a awm ve fo a, ‘Kohhran mi an ni emaw, kohhran mi tak an ni,’ titea kan inchhan chuan, mi fel tak, ṭha tak, pangngai tak chhungkuaa mi an ni tihna a ni.

Mahse, vawiina thupui turah hi chuan zawhna (?) hi a tel a ni. A nih chuan eng ang mi/chhungkua nge, tih kha a chiang lo; mi ṭha tak an lo ni thei a, ni miah lo thei bawk. Kan rinna hi a inchen lo hlawm a, ṭhenkhat chu ti ve mai mai, ṭha tak hi chu kan tam vak pawn ka ring lo. A chhan chu, kan biak in pawn lam nun dan hi a ṭha lo tlangpui, nunpui lem lo hi kan ṭhahnem ve hmel. Ṭhenkhatina ringtu dik tak an lo tehna hi chu a dik lo lai awm ve nualin ka hria, min hmu tlang vektu erawh chuan a hre ngei ang le.

Upate

Kum sawm chuang lai chu a ni tawh ang a, ṭum khat chu, ”Upa tih velte chu tute emaw ve mai mai kha an nia,” ka ti a. Tichuan, hmelṭha deuh thlêk kual nan biak in chu kan hmang ve ta mai a. Ṭum khat chu ka taksaah harsatna a rawn awm ta tlat mai a, inkhawm lai chuan ka buai ru ta hle mai a. Ka rilrua ka hriat chhuah tak chu, kohhran upate chu tute pawh lo ni ta se, anmahni hi a ni lo, a neitu tak tak chu khitah, anni hi chu a aiawha a dahte an ni. Eng ang biak in pawh ni se, a hmangtute pawh eng ang mi pawh lo ni se, hmun thianghlim, Pathian biakna hmun, puithuna hmun, tihte ka ngaihtauh chhuak tel bawk a. Hemi aṭang hi chuan biak in, a kawtlai leh hung chhung reng rengah chuan ka ti tawh miah lo vang, ka ti ta a. Vawiin thleng hian ka la inhrilh nawn mawlh mawlh fo ṭhin a ni. Mahse, he ka thil tawn hi Pathian kut ngei a ni, tih finfiahna erawh ka nei lo. Upa hote an ṭhat viau rual hian mit tikham tak tak, ngaihhmawh awm deuhte pawh an zingah an awm ve zauh ṭhin bawk.

Rawngbawltute

Hun la rei vak lovah khan kan thawhpui pakhat hi ka hahpui ṭhin hle. Nilêng deuh thaw hian a rawngbawlna kaihhnawih lam hi a sawi chiam chiam ṭhin a, a hna lam pang kha chu a hre mumal reng reng lo. A ṭhutnaah hian thatchhe em em hian a ṭhu a, a châng leh a phone aṭangin inkhelte an en bawk a, beng chu a tlai ṭha duh khawp mai. An vengah chuan kohhran ṭhalai hruaitu, pulpit rawngbawlnate pawh nei pha chin chu a ni ve si. A buaithlak, ka hahpui ṭhin hle mai.

Kum tawp dawn lamah chuan tihian ka ngaihtuah chhuak ve ta a, ‘Pathian hian a rawngbawl tur hian mi fel leh tling ber berte hi a thlang kher lo,’ tih hi. Ka hah rûkna chu a zâng ta deuh huai huai a. Ngaihtuahna a thui duh hle. Nia, ṭha leh fel takte chauh thlang dawn ta se la, Isua chu khawvel chhandamtu a ni thei dawn si lo a ni; tling lo leh fel lote Pathian a ni mah zawk si a.

Kohhran mi?

Kohhran mi (?) tak mai hi kan awm ve a. Mi dangte chungtlakna atana kohhran leh Pathian thute hmang ṭangkai tlat, ṭawngṭaite pawh sermon patê kan tih ang deuh chi, mite hauh leh sawisel nana remchanga hmang tlat ṭhin, mahni ṭha inti em em, mi dangte hmu tling thei mang lo, hmuh dan leh ngaihdan eng emaw tak nei tlat, buaithlak tak, lo dawnsawn dan fimkhur ngai, a nih loh chuan rîk hluai theih, chêt chhiat dêr theihna an ni. Hetiang ho hi Pathian thu tak mai, mahni chu eng em em ni chuang lo, rum deuh rût maite han ti ila, a fuh thei thoin ka ring. Tun hma deuh kha chuan camping chhuak hlim ṭhenkhatte kha an ni duhin ka hria. Pawl chhuak hote pawh hi kohhran duhkhawp lo, kawng khat aṭang chauha thil thlir, duh fîr tak, hmanhmawh lutuk leh fimkhur ta lo deuh an ni ber ang chu. Tunlaiah hi chuan rilru fim tak hmang ṭhin, uluk taka kal zelna tur thlir, thil ti zung zung mai lo, ngaihdan leh hmuh dan pawh zau leh fel taka nei ṭhinte hi kohhran mi kan han tihte hi chu an nia; a lem (fake) ho hi chu ‘kohhran mi?’ I ti ve mai ang.

Bible-ah kan hmu hlawmin ka ring; buh zinga buh lem ṭo ve ṭeuh an hmu a, thliar fel nghal mai ila, an ti a. Mahse, buh neitupa (Pathian) khan a remti hrih lo; buh takte kha an ti tel palh hlauh ang tih a hlau a ni. Pathian pawh hian ringtu intite zingah ti tak tak lo, kâwr atan chauha hmang an tam em em tih a hria; mahse, mi thianghlim lâwr nghal mai chu a ti rih lo. Chuvang chuan, kan kohhrana rawngbawlnaah a ni chu a ṭha lo emaw tia inthliar ngawt a rem rih lo tlat; buh lem leh tak chu lo ṭo za rih rawh se, a ti tlat a ni.

Vawiina mit a tikham mang e, he kohhran upa hi chu a eiru hnem âwm, a van lêrh em em, kan tih hote hi chu a tùr ve rêng a ni. Inthliar tak tak a la hun lo a, lo ṭo za hrih mai mai rawh se tih kha thupek a la ni hrih.

Aw le, engpawhnise, kan kohhran hruaitu ṭheuhte hi keimahni ang bawk an ni a, ṭawngṭaisak ve fo hi an ngai ve reng a ni. Kohhran mi (?) kan han tih deuh hote pawh hi a lang lamah chuan an ṭhat hmel hle a; finchhuah a, chiang taka va sawipui mai pawh a ṭha viau ang.

- Lalchhandama Colney Ph – 9862982321