COVID LEH KRISMAS

Kumin zet zawng, Covid hripui zar a ṭha zawngin i zo dawn teh ang u. Kum danga Krismas dawna nu leh pa leh mipui mimirte harsatna chu Covid hripui avangin lak kianin a awm kan ti mai a niang chu.

Kum dangah kha chuan tun ang hun chho tak, December thla laihawl chho vel hi Krismas inpuahchahna atana kan hmanhlelh hun tak, chhungkaw tin leh mimal pawhin nasa taka engemaw tal neih thar tuma kan chet hun kha a ni ṭhin. Chhungkuaa naupang hnihthum deuhah phei chuan, sum lakluhna mumal nei loah chuan rilru hah hun lai ber kha a ni a. Isua Krista pian champhaphak lawma Thlarau lama hlawkna neih tuma beihna aiin, thil thar neih tum reng rengin rilru a hmanhlel a. Nu leh pate tan chuan Lungngaih thla a ni ringawt ṭhin. Naupangho lahin mahni chhungkaw dinhmun ngaihtuah lek lovin, ṭhiante neih ang tal emaw, a aia man to hret emaw neih tumin nu leh pate hnenah an duhzawng sawiin a zawrhna hmun nen lam an lo kawhhmuh ve sek a.  Kumin chu Covid-in min chhan ta hlauh dawn a nih hi.

Covid hripui avangin Sawrkar lam lahin Krismas boruakah zan lama Curfew pawh a hma aia khauh zawka kalpui tum a nih thu a puang ulh ulh a. Kohhran lam pawhin Krismas lawmna atana Kohhran mite thawhlawm a bituk pawh, pek let leh turte, Bank lama kum leh atana dahṭha tur tein ruahmanna pangngai ṭhin an tidanglam sung sung bawk a. Masi thlengtu tur buaipui leh hun hman dan tur leh hmangtu tur ngaihtuaha Committee buai sek a ngai lo ta phawt mai a. Krismas dawn hunawla vahchhuah leh hmun nuam pana inlakthengthawt tumna programme zawng zawng pawh mitinin kan cancel nghal vek a. Krismas ruai atana Vawk lo vulhtu Kohhrana mi ṭhahnemngaite thawhrim rah pawh a huhova tlanza a rem dawn ta lo.

Mizote nunphung zinga kan kalsan harsat tak tak thil - tihkhawm let let, ṭul lova insenso, mahni chhungkuaa hlimna hmu zo lo,  midangte ngheng renga hlimna neih tum tlat ṭhinna zia zawng zawng chu he Covid hian min ṭhiahsak hiau hiau va. Hnam dangte hmuha mawi lo ber ṭhin, zalen tak inpawm chûk chûk, infawh nawk nawk, inkuah deuh chung chungte pawh he Covid hripui hian min rawn khapsak ta mek bawk. 

Chhungkuaa inhmukhawm ngai mumal lo, chaw pawh chhungkaw kima kilho hlei thei lote pawh min huikhawm mek a ni. Midangten min thinhrik mai a ni lova, midang kan ṭih a, midang kan mamawh ngam lova, mahni chhungkuaa khawsak dan min zirtir mek a ni.

Chutiang chu a nih avangin, a huhova Krismas hman leh, zaikhawm, inkhawm, insawmkhawm tih vel rem ta lo na na na chu, naupang leh puitling thlengin, Krismas kan hmang dawn lova ngaia insenso hautak zawnga engmah neih leh tih tumna awm ta lo chu, chhungkaw tam tak tan chuan thawvenna chi khat chu a ni ta hrim hrim mai. 

Chutih rual chuan kan Kristianna lama thlarau kawnga kan luh thuk lohzia pholanna a ni tel phawt mai. A huho ni lova Pathian biak thiam lo kan ni a. A huho chu ril bik leh thuk deuha ngai niawm taka mahni Ina fianrial ṭawngṭai chu miten min hmuh miau loh avanga thlarau mi lo nia min ngaih hlauh tlatna avanga mahni In lum kalsana zing leh zan khawvawta Dan palzut chak tlat Kristian kan ni mek a. Covid hripui hian Mizote nunphungah zirtur kan ngahzia min kawhhmuh nasa hle a ni.

Covid hripuiin chhungkua min huikhawm a. Midang tel lova mahni chhungkuaa hlim ṭulna min hriattir a. Biak Inah chauh ni lo Pathian biak a theih tih min kawhhmuh mek a ni. Nu leh pate leh fate inkawmngeih ṭulzia a takin min temtir a. A tak takah chuan mahni chhungkua chiah hi kan chhungkaw dik tak, kan innghahna, kan tluk luhna tur a ni tih min hriat thartir mawlh mawlh a ni ber mai.

Hripui hi a lo ziaawm chho deuh zel a nih pawhin, 2020 Krismas leh Kumthar 2021 hi chu mahni chhungkua ṭheuha lawm leh hman tleng tleng ṭheuh tur a ni phawt mai. Covid avanga midangte nena kan huau huau thei ta lo tur hian, kan nunphung leh thlarau lam nun thlengin, bung thar min kaipui sela. Chung Pathian faka lawm thu sawina zawng zawngte pawh, a huho kher kher lo hian min chhangin min lo lawm dawn tho a ni tih hi zir chhuak ṭheuh ila. Covid hian kan Kristian rin dan leh nun thleng hian hlawkna min pe mawlh teh se.