Zoram tharah chuan
Zo fate thinlung leh ngaihtuahnate chu tihharha a awm hunah mite nunphung chu a hlui aṭangin a tharah a lo awm ang a, chutih hunah chuan mahni nun ṭheuh kan insiam thar ang. Zoram thar din turin kan ram tluchhe mekah hian kan taimakna te, kan rinawmna te, kan huaisennate chu kan ram tan kan hlan tawh ang.
Politician-te chuan ram hmasawnna tur a ni em tih pawh ngaihtuah pha chuang si lovin, duhsakna dik lo hmangin thlan chhuah bik mipuite tana an hmalakna te, riltu zîm tak pu chunga mahni awmna party dinchanna atan chauhva an hmalaknate chu ram hmasawnna a lo tling zo lo a ni tih an hria ang a. Zoram tan kan inthliar hranna tel lo rinawmna thar leh taimakna thar nen Zoram thar din turin hmanhmawh takin hma an rawn la ang a, Zoram thar lamah ke an pên tawh ang.
Sawrkar hnathawktute pawhin anmahni rawn dawrtute zingah chhungkhat laina, hmelhriat leh ṭhian ṭha te, anmahni duhsaktute chauh an lo biak ṭhat biknate chu ram hmasawnna dâltu, thil dik lo a ni tih an inhria ang a, mahni thawh chhuah duh tawk lohna avanga mi dangte chan tur lo îtna te, zelthelna avanga mahni hna chanpual hlen ṭhat peih lohnate hi Zoram thar panna dâltu a ni tih an inhriat hunah, chu nun hlui ze ṭha lote chu an bânsan tawh ang.
Hun, minute leh darkar te chu chhuanlam nihna avangin dik lo takin kan vawng ṭhin a, Zoram tharah chuan hunin dik takin min vawng tawh ang. Sawrkar hnathawktute chuan anmahni rawn dawrtute chu an thil tih laklawh lai pawh ni se, an mamawh leh duhte chu phûr tak leh hlim hmel pu takin an lo buaipui zung zung zel tawh ang.
Nun tihnawm nana ruih theih thil tite pawhin Zoram thar chu a nawm tawh dawn avangin ruih theih thil kher ni lovin, nun tihnawmna kawng dangah an kal tawh ang.
Zoram thar hmel chu ram hruaituah te a lo thleng ang a, sawrkar hnathawhna hmunah te, sumdawnna hmunahte Zoram thar chu hmuh theihin a lo thleng tawh ang.
Mi hausate pawhin mahni hmasialna leh sumdawnna dik lo aṭanga hausakna te, hlêprûkna leh mi chan ai laksakna aṭanga hausaknate chu a lo ṭhat lohzia an hre tawh a. In ṭha pui pui saka a chhungah nuamsa taka chen chu kan Zoram rethei tak nen hian a inhmeh lohzia a rawn hre chhuak ta a. Chu hun chu tluang taka a lo thlen theihna turin mi tinte’n kan nun leh ngaihtuahna te kan siam ṭhat a ṭul hle a ni.
- H. Neihchungnunga, Durtlang North