Chapchar Kût leh zai hla

April 23, 2025 VANGLAINI-a Chhiartute Thukhawchângah khan ka Chhangte unaupa KC Chhangte khan ngaihnawm takin ‘Chapchâr Kût leh tunlai zaithiamte’ thupuia hmangin kan Mizo chhûlchhuak Pu Rokunga hlate hi he ni-a sak chi, kût boruak nen pawh inhmeh vek a ni a, kan zaithiamte’n rawn sa ṭhin tawh se, tiin hla 10 lai a rawn tarlan bâakah, Kût Committee pawhin hei hi lo tih ngei tum se, ti khan a rawn ziak a. 'Keini kum 80 chung lam tan chuan an hla sak lar sa leh love song ngialngan zet mai an sa ṭhin hi Kût lam hawi hla an lo ni lo bawk nen, a ngaihnawm lo mai ni lovin ka lo insehruh ṭeuh zawk ṭhin,' a tih kha thlâwp chungin, ka'n belhchhah ve duh tlat mai.

Ni e, Pu KC Chhangte rawtna baka ka rawtna chu: Chapchâr Kût Committee hian Chapchâr Kût hla bik phuah turin hla phuah mite sâwm rawh se. A nih loh pawhin Kût hla phuah competition buatsaihin, a ṭha zual 10 tal thlang chhuak se, chung hlate chu Kût ni-ah zaithiamte’n sa ṭhin rawh se. Tin, hla hi a thovin, a ṭangin, a rang tur a ni a; kan ṭhalaite 'hot' taka an zuan a, an lâm a, an hlim theihna tur ngei ni teh se.

Chapchâr Kût apianga kan ṭhalaite lâm châk, zuan tawr tawr châk, su tâwrh tâwrh châk, hla 'cool' ruih maia lâmtîr ṭâlh tuma zaia kan awi ṭhin hi Kût kan hlawhchham ni hian ka hre ṭhin. Ka ngaihdan hi ka rawn thawh ve tawp a ni a, ka vei kum tam tawh khawp mai.

- C. Lianmawia, Zonuam. Ph. 9612513258