State Games kha chhunzawm zel a ṭha

Mizoram State Games hun rei tak neih theih tawh loh chu MNF sorkar hnuaiah thar thawh a niin Sports Minister tharin chak takin a kalpui a, infiammite tan hei lo liama thil lawmawm hi a awm thei lovang tih turin a chanchin kha an puangzar nasa a. Sports lama hma­sawnna kawng pawi­mawh tak niin kan lo ralkhat hriat a, kan thu hriatte hi a dik lai a awm rualin a dik lo lai te pawh a lo awm tel a, State Games review na lampang hi thiam ang tawk tawkin sawi ang. 

Ṭhahnemngaihna a ni a, rawtna kan siam te pawh tute emaw pawi sawina ni lo turah ka han ngai nghal bawk. 

State Games lamah khan han lut ta ila. Kan rama Sports Asso­ciation zingah hian Football hi an lian fal bik a, anni hian MPL te an tia an inkhel chanchin hi football tui ve lo tana ninawm khawp hriat tur a tam tawh a, chanchin sawi ve tur nei lo Sports Association dangte tan a lawmawm dan a sang bik ang. A chhan chu swimming te, athletics tih te, carrom board tih ang chi te, fencing tihte pawh hi chanchinbu lama hmuh tur awm ngai mang lo an nih avangin news-ah luah lum hrim hrim kha hmasawnna lian tak a niin a hriat. Mipui nawlpuiin kan hriat Volleyball, Boxing, Football tih ni lo Sports dang tan chuan chhunzawm zel tura nawr nawr chi a niin a lang a ni. 

A sawisel zang ni si lovin rawtna zawnga sawi ṭha ka tih chu inbuatsahna (pre­paration) hun tlem lutuk khan State Games hlutna a ti hniam a, infiammi kha in buatsaih lawk lovin an tel ve mawp mawp mai a, a tum ber Sports hmasawnna lam a thlen vak ta lo. A tel hrim hrim an tam kha hlawhtlinna (acheivement) anga an ngai a nih loh chuan sports thlirna aṭanga teh chuan a pawisa hman tam zawng leh a result kha a inhen lovin ka hria. 

LPS Pro Fight a tel tur hian boxer hi thla hnih thla thum te an inbuatsaih a, kan State Games-ah kha chuan, "Kan Bial aiawh tur kan la in hmu lova," tih kha ṭan hma lawka an au hla a la ni fur. In fawm chawp mai mai khan an tel ve nawk nawk mai ang chi khan hlutna a tihniam a ni. Olympic leh Asian Games hi qualification thui deuh kal tlang a ngai an ti a, a hre deuh te sawi dan chuan National Games pawh hi Mizo zingah tel phak (qualify) an tlem lutuk an ti zui. Kan State Games-ah kha chuan a duh duh tel theih a ni kha a hlutna a ti hniam deuvin a lang. 

Tin, kan sawi tel leh bawk tur chu State Games Gold Medal lak khan ngaih hlut a hlawh vak lo. Entirna atan Boxing-ah chuan Pro Fight champion nih an duh zawk a, tichuan Volleyball pawhin Volleyball League champion nih an lawm zawk a, Football lamin MPL an duh zawk a, Taekowndo Fight League pawh an dah sang zawk bawk. 

Chuvangin State Games pawisa kha a uihawm tlat alawm tuna a kal phungah kha chuan. Tin, MLA Fund hmanga kalpui ang chi kha chu ni tawh lo thei bawk se a duhawm a, MLA Fund hman­na tur dang a tam si. 

Politics zawnga thil la kawi te phei chuan, "Huau Huau Siamna" te an lo ti a, hei hi chu ka pawm lo. Sports tih hmasawn tumna liau liau a ni a, an tumah la hlawhtling lo mahse chhunzawm zel a nih chuan State Games awm leh turte chu a letin a hlawhtling theiin a rinawm. 

State Games kha a hlawhtling a, chhun­zawm zel tur a ni. 

- Lalnunpuia,

Ramhlun North