CLASS 10 ZAWHAH (Career awareness)

HSLC result a chhuak dawn a; nu leh pa tam tak rilruah, ‘Mami, Mama hian eng nge zir se ṭha ang?’ tih zawhna a awm leh ngei ang. Nu leh pa bengvar deuhte chuan an fate’n high school an kai hma hauh aṭangin an fate tui zawng leh an kalna awm kawng an lo ngaihven lawk a. Ṭhenkhat erawhin mahni fate tui zawng pawh ngaihtuah lova anmahni ṭha tih zawng leh anmahni ngei pawhina an tihhlawhtlin theih loh, tihhlawhtlintir tum pawh kan kat ve nuk tho bawk. Chutiang karah chuan, ‘Ngaihtuah ngaihna leh han sawipui dan tur pawh ka hre lo’ tih ai chuan, ṭha nia kan hriat han hrilh ve hrim hrim pawh a la zia viau tho. Nu leh pa inkarah pawh ṭhahnem ngaih dan a inang vek thei lo va, hlawhtling tur erawh chuan kan duh vek thung. Mi tam tak hian, kan fate chu, ‘Chu chu ni se, chutah chuan thawk se, hlawhtling se’ tih hi kan duhthusam leh kan thlir dan a ni fur a; a kawng erawh kan kawhhmuh thiam lo va, ṭhenkhat phei chuan zirtirtute kutah an dah hlawm tawp emaw tih turin a ngaihna an hre lo ve bawkin a lang ṭhin.

Pawl 10 pass chin chu mahnia inhai kaw tura beisei an nih lai hian, inhai kaw tur pawhin a hre zawkte zawh nachang hriat a lo ṭul ve a. Zawh tur tak ngial pawh hre lo a la awm theih cheu. Sawi tur leh ngaihdan a tam theih em avangin career pakhat zawh tura inkaihhruaina kimchang (career guidance) han sawi chiam a rem loah ngai ila. Kan fate’n class 10 an zir zawha kawng an zawh theih tlangpui hriatna (career awareness) atan leh an zir zel dan tur hriatna tura ṭangkaipui pakhat tal kan awm beiseina avangin he thu hi ziah a ni.

Kan ngaihven rûk, ṭhenkhatin a ngaihna kan rinhriat chauh chu kim lo takin i han bih chhin ang aw.

• Kan fate zir tur thlan nan khua a tlai tawh em?

A la tlai chhe lo ve. Lo ngaihven a, ṭan hma tluk erawh a awm lo. Pawl 10 an pass hian zirna kâkpui an thleng chiah a ni. Mahse, doctor leh engineering line-a kal tum tan Science leh Mathematics subject-ah kan faten mark an hmuh ṭhat loh chuan science stream-a admission hmuh a har deuh nghal ringawt dawn. Kan lo tlai hman deuh tho em, tih chu result chhuah hunah a hriat ang chu. Mi nu leh pate hian an lo ngaihven hma thei teh mai a nia.

• Eng nge HSLC zawhah zir chhunzawm se ṭha ang?

Hei hi zawhna tam ber a nih hmel. Zirnaa mellung pawimawh leh langsar ber pakhat HSLC exam result kan han hria a, a hre lo mi tan chuan zir zel dan turah kan rilru a buai ru deuh a ni. Zirna tluang pangngaiah chuan arts, science leh commerce stream-te a awm a, heng bakah hian HSSLC zawhah technical, medical, diploma course leh kawng dang zau tak thlan tur a la awm. Zirna kawng tluang pangngai chauh chu han hrût leh ta ila.

Arts stream hi tam tak chuan an ngainêp deuh ngawt ṭhin a, mahse, ngaihnêp theih a ni lo. Sorkar hnaa lut tam zawk hi arts subject zir an ni ti ila kan sawi sual tam awm lo asin. Arts stream-ah hian subject thlan tur a tam hle mai a, kan fate hian a ngaihna an hriat bik loh vang emaw, HSLC-ah an tih ṭhat tawk loh vangin emawin confidence an hloh vat a, hloh chuang lo pawh an awm tho a nia. An tuina pawh ni lem lo, mi nâwlpui subject lak ang lak ve ngawt an ching. ‘Chumi pawh chuan a la’ tih vel mai mai chhuanlama hmangin nu leh pa, a ngaihna hre lo lehzual zawkte an hmin titih ringawt zel. A hun laia zir awlsam deuha an ngaih an thlan ringawt hian hna zawn dawnah a ṭangkai/pui nêp duh khawp mai. Chutah tak chuan nu leh pate’n kan fate subject lak turah an tana ṭangkai tur thlanpui emaw, laktir nachang hriat emaw a pawimawh a ni.

Pass tur ringawta zir an ni lo va, hna zawng tur leh thawk tura zir an ni tih hi hrilh nawn fo a ṭul. Entir nan, BA Education emaw, MA Education emaw nih hi zirtirtu nih tum tan a tawk tawh lo va, B.Ed. emaw, D.El.Ed. emaw bakah, Teacher Eligibility Test tunah chuan paltlang tel a ngaih tawh avangin, pawl 11 aṭanga Education subject lo lak ngawt ai chuan, subject dang, hna zawn hun atana an khawthlir tizau thei tur lo lak nachang an hriat chuan châng an tizau sawt dawn tihna a ni. Education subject ngaihnêpna lam ni lovin, a aia châng tihzauhna tur subject dang lak nachang hre tura fate hrilh a pawimawh tihna mai a ni. Chutiang chuan, hna hrang hrang lakna tur exam an hmachhawn dawnah History, Political Science, Economics leh Geography lo zir lawk tan a thara zir tur a titlem deuh ang a, a bulṭhut (foundation) lo hriat lawknain nasa takin an hun khawhral tur a veng thei bawk ang.

Subject ṭha kan tih apiang vawi khata lak vek theih a nih dawn loh avangin pawl 11 luh dawnah subject combination thlan thiam a pawimawh tihna a nih chu. Hna zawn nana an la hman theih tur, an tui zawng tak, hrehawm leh zir tur a nih avang chauha an zir tur ni lo subject laktir a fuh ang. Ngaihtuah uluk a ngai a, a remchan em avang emaw, a chunga kan sawi zûlin, ‘Ka ṭhiannu/ṭhianpa pawhin a la’ tih vang emawa subject combination lo thlan ve ngawt hi chu a fuh lo deuh a ni.

Science stream aṭangin medical line (doctor, nurse, laboratory technician, etc.) leh technical line (engineering, architecture, etc.) lam a zir theih. Physics, Chemistry, Biology leh Mathematics te hi science stream-a subject hlawm liante an ni. Medical line-a kal tur tan Mathematics lak kher a ngai lo ti an awm ṭhin a, Mathematics lak tel chu pawimawh ber lo mah se, thiam tel tluk a awm lo. Pawl 12-a Mathematics tih chhiat avanga doctor zir thei lo an la awm âwm lo ve. Pawl 10 hnu lama Chhiarkawp subject kalsan ta vang vang anga kan inngai a nih chuan hna zawn hunah a pawimawhzia kan hre leh tho ṭhin.

Doctor line nge ṭha anga engineering line, tih zawhna pawh a awm fo. A ṭha zawk sawi thiam a har ngei mai. Thih leh dam thu hi mihring nunah a thupui ber mai awm e. Chuvangin, doctor hna hmu lo an vang deuh zawk mai thei; mahse, ram hmasawnna ruhrel tak tak sual chhuaktute hi doctor aiin engineer lam an ni deuh zel chuan ka hria. Tun hnai maia Mizoram luhka pawimawh tak Lengte kaia Tlawng lei dawhnaah khan engineer hnathawh mipuiin kan hmu thiamin a rinawm. A ni lo lamah kan pêng dawn, duh tâwk ang. Ṭhenkhat chuan pawl 12 thlenga science stream zawm a, college level aṭanga competitive exam bei tura arts subject lak chhunzawm pawh an awm ṭhin.

Commerce stream pawh tun hma ai chuan a lar chho ve ta viau. A hming ang tak hian sumdawnna hlawhtling nei tura hriat tur pawimawh tam tak an zir a ni. Accountancy, Business Studies, Economics leh Business Maths/Mathematics te hi commerce stream-a subject hlawm liante an ni. Commerce subject la hoina exam an ngaihsan deuh ber pakhat chu chartered accountant (CA) exam an tih mai hi a ni a, he exam pass tawh tan hi chuan, ‘Damlo an awm chhung chuan doctor-in hna a hmu ang’ tih ang deuhin, sumdawnna a awm chhung chuan CA tan hnathawh tur hmuh loh tak tak a awm lo a tih theih hial ang; an hlawh pawh a nêp lo ṭhin hle. Chartered accountant exam pass hi IAS exam tluk zeta har a ni a; CA leh IAS te hi India rama inziah tlin har ber pahnih an ni awm asin!

Commerce student zingah banking lama kal pawh an awm nuk ṭhin. Tun hnaia commerce subject la tam tak erawhin stock market leh investment lamte lam an tuipui viau a, sorkara hna zawn aiin mahnia sumdawnna bul ṭan (entreprenuership) lam pawh an tuipui zawk ta viau niin a lang. Science stream-a Mathematics zawng zawng hi commerce student tan pawimawh vek lo mah se, commerce kaihhnawih chhiarkawp thiam tel a pawimawh hle bawk.

Pawl 12 chinah chuan arts, science leh commerce stream-te hi a kûngpui an ni deuh mai kan tih tawh kha; pawl 12 hnu lamah a aia zau leh thûk zawka zir tur tam tak a awm. Chung zingah chuan management line pawh kan hre lar chho ṭan a, zir zo tawh pawh kan awm ve nual tawhin a rinawm. A ti fuhte chuan hlawh sang tak tak lain sumdawnna chi hrang hrang, firm, company leh institution lian tak takah pawh hna pawimawh an chelh ṭhin. Judicial studies/law zir pawh eng emaw zat an awmin an practice mek bawk.

Heng bakah hian academic line-a kal, college, university leh research institute ropui tak taka thawkte pawh an awm. College leh university lama zirtirtute phei chu kan sawi sual viau a nih loh chuan nêp tak a awm theih loh tluk a ni. Ṭhalaite rilru sûkthlêk lo hrual pumtu an nih avangin an awmna khawtlang apiangah ngaih pawimawh an ni. Masters degree–MA, MSc, MCom, MBA, etc. zir zawh hnuah National Eligibility Test (NET) exam leh PhD paltlang te a ngaih ṭhin avangin tih fuh loh chuan hlawhtlinna nghah chhung a rei deuh chang a tam ṭhin. Zirna kailâwn hian pêng a ngah em avangin pawl 12 chin bak pêl thui lutuk lovin heti hian i hrût bul rih mai teh ang.

Education policy thar hi a nih ang taka zawm thei tura sorkar a hausak hunah chuan arts, science leh commerce stream kan tihte hi awm tawh lovin, naupangin a tui zawng subject a zir pawlh thei tawh dawn. Mahse, chutiang tihlawhtling tur chuan zirtirtu tam tak lak belh leh kan zirna in leh inkaihhruianate nasa taka sîksawi a ngaih avangin rang taka thleng tura beisei theih chi a la ni rih lo. Engpawhnise, hlawhtlinna hi vawi leh khata lo thleng thut a ni lo va, taima tak leh rim taka sual chhuak turin kan fate kan fuih thei a ni.

A tawp khar nan, ‘Kan fate’n eng nge an zir ang?’ tih hi hriatthiam a har hle mai a; naupang hre chiang mang si lova mahni ngaihsan zawng lo sawipui vak a, ‘Chu chu zir ve rawh se’ lo intihsak ngawt pawh a fuh lo thei ve viau ang. Kan fate tui zawng lo hriat sak leh an zir zel dan tur sawipui kan thei chiah lo a nih pawhin, eng emaw chen chu kan ngaihtuahpui a ngai tho tho a, chutiang lam hre deuh titipui emaw, thurawn emaw tal lak ṭhin a finthlak viau awm e.

- R. Lalthlamuana