KRISMAS KHAWHAR

Kumin zet zawng..

INKHAWM BORUAK -

Biak In chei nalh em em ah khaw vawt avanga thaw khu rum rumin urlawk zanah kan han chuang lut a, zaikhawm Programme chhawrdawh hrerengin tawi fel takin kan inkhawm a, inkhawm banah thla la in, Hall ah zaikhawm turin thingpui leh chhangban kan han ei zui a..

Kan in bul hi inkhawm kawng a ni a, inkhawm tur thum mum mum mai, zaikhawm bang ri nuk nuk mai te kha mumang an chang ta!! A reh hian a reh ruih a, khua a va har tak em. Inkhawm thawm a reh a, fatu thawm a awm lova, phu suau suau hriattur a awm lo  Bialtu upa chibai sema vahchhuah tak ngial pawh a inthlahrun awm a, a reh tlawk tlawk mai zawng a ni e. 

KHAW LAI BORUAK -

Khawilaiah nge an zun dawn ti a kan suangtuah, chak deuh deuha tlan te kha zan dar 8 hnu lamah khap beh a nih vangin a reh ṭhup a, phun phun ṭhin mah ila, khang ho kha khawhar hnem an lo ni ve pakhat. An reh ṭhup chuan a lo reh khawp mai. Traffic Point liantham ah Traffic Police leh Police pangngai an lo ngir khup chuan thuawih lo hram kan awm lo. Mahse a reh a ni. Silent Night dik tak kan hmang a, ranchaw pekna lem lem aiin a tak tak hmun khawhar kan ngaihtuah thleng thei hial mai!!

RUAI LO KRISMAS -

Vawiin ang hi ruai ṭheh ni ah kan hmang tlangpui a, fatu ṭhang khua a har ngawih ngawih a, Biak In a dai duk a, ruai ṭheh tura a puia nawia nalh tak taka in zui diah diah te, ruaiṭheh zo Biak in kawt leh kawngpuia kan bial laih laih te kha hmuh tur a awm ta si lo. Ruai sa ni lo, mahni ina sa hmeh pangngai ringawta ṭum tlak dawn tak mai chuh!! Khuang ri hriattur awm bawk si lo, "Zan dar 8 a lo ri ta a" ti a khuahkhirh tlangau au thawm hriat tur awm reng mai bawk si. Khua a vawhna chiah hian Krismas a phawk zo ta ber a nih hi maw.

DIK TAK CHUAN -

Kha zan khawhar, Bethlehem dai a ranin tlawmah khan a lo pianga Chunglam hriatpuina lovin lawmpuitu an tawng lova, lei lam aṭang chuan tlawmna tawp an chang mai lovin dodalna leh tlanchhiat ṭulna in a umzui hial a sin.

Birthday neitu leh lawmsak ber hre chang lo leka thuamhnaw, eitur leh ruihhlo nen kan lo hmuak te, a ri bung bung ringawta a Birthday neitu ber lawmna zawng hauh lova kan lawmsak na hi a tam tawh ang a.. Tuna kan khawhar let fe hian khawhar takin nau a piang a, tukhaw hriat lohin Bethlehem daiah khan hring a rawn chang zawk a ni.

TLIPNA -

He khawvel hian tlemte tala kha zan khawhar kha hriatsak a, hriatthiampui turin Chunglam khian min duh a ni thei a, a Birthday neitu dinhmunah in chantir a, dinhmun khawhar thlak bakah kan hmuaha kan lawmsak danah hian a lawmzawng tak lawmpuina Taksa leh Thinlung ngei chu khawhar tak, Chunglam lawmna tak nisi a hlan min phut a lo ni reng thei a nia.