INDIA QUAVADIS?

Tuma'n min ráwn ve lo na a, mahni ngaihmawh zawng han au chhuahpui hian mahni lam tal kan tal-thawl ve hawk ṭhin a. Chuvang chuan, India ram kal zel dan tur ka thlirna hi ka'n au chhuahpui ve a ni.

Khawvela democracy ram lian ber India hi a Constitution ṭhat vang ni maw, ram hrang hrang ṭhen­awm ramte sipai sawrkarna a thlen ṭhin laiin India erawh chu kum 70 chuang zalen takin kan kal mup mup a. London khawpui lailia Hyde Park ang maiin a zalen hle a ni. Ukilte paradis an ti hial thin. Hei aia ṭha zawk duhna Hindu kulmut RSS chuan an au chhuahpui a. Tun ang niak nuak hi chu a ṭha tawk lo. Mipui tam ber 85% Hindu-te duh dan angin Hindutva, Common Civil Code, Article 370 thaibo tihte chu an political wing BJP hmangin tihpuitlin an tum ta a ni. Heng Hindu kulmutte thlirna aṭang chuan an tih awm tak niin a lang. Keini Kristian tlemte pawhin Krista thupek zawmin khawvel zawng zawng hi Lalpa ramah chantir kan tum a ni lo'm ni? BJP election manifesto Kashmir inhung bikna Article370 chu thaibo a ni ta a. Political party leader hlun Chief Minister hluite chu lung inah thla an khawng ta char char mai le.

CAB pawh pass a lo ni ta rup mai. Hmabak - Hindutva, Common Civil Code, NRC tihte chu an sawrkar chhung ngeia tihpuitlin an tum ruh hle niin a lang. An duhthusam ang hian lo puitling thei ta se la, India ram inpumkhatnain a ṭhat phah sawt dawn nge, Soviet Union angin a keh darh dawn tih chu hunin a la hril turah ngai ila. India Quavadis? CAB dodaltu langsar zualte chu Mosolman leh North East mipuite kan ni awm e. An hmabak NRC, Common Civil Code, Hindutva tihte hi Parliament-ah lo pass leh ta se, 'A ṭha e' tiin kan lo pawmpui thei mai dawn nge, North East pumpui hi independence lo thei loah min nawr lut ang a, Himalaya kingdom, China duhthusam a thleng luah mai dawn em ni? North East Quavadis?

Keini Mizoram, Nagaland leh Meghalaya tan pawh Kristian lal ram dinna remchang a ni mai ang a, nuamsingkhaw kan ti mai ang chu maw. Kristiante tan Lal Isua'n hlauh tur dik tak min hrilh bak hlauh tur a awm ve lo.

Mizoram Sawrkar Inpuahchahna: A chunga kan sawi thil inthlakthleng rup theite thlirin sawrkarin ei leh bar intodelhna atan SEDP chu flagship programme-ah a puang a. A tihhlawhtlin nan district pathum an siam belh ta a, board hrang hrang 14 zet siamin, vice chairman-te chu minister of state rank-ah an hlangkai ta thawt thawt mai le. MLA hlawh pawh a pung ta thur thur mai. Flagship programme pakhat bamboo programme-te pawh puahchah a ni ta. Thingtlang mipui 70% vel eizawnna ngelnghet an neih theih nan cheng nuai 3 ṭheuh hmachhawp a intiang ur mai bawk si. Kan electric leh buhfai chawk luhna lah a pung thur thur a, thar chhuah nei lo state pachhia chawmhlawm hnam aṭanga chhanchhuah hna hi a hautak rem rem hle mai. An inpuahchahna rigawt pawh hi sum leh pai hnar nei lo state tan chuan luhai thlak a tling. Chuvangin, Central sawrkar belh/tlawn thiam a ṭul ta. Remna leh muanna atan Congress kan chhawr ṭangkai thiam ang khan, 'Vai buhfai ei ṭheuh ṭheuh engah nge kan BJP loh bik lem ang le,' tiin kan Lok Sabha MP neih chhun chuan sawrkar lamah a vote ta rup mai le. Kan innghahna ber Central sawrkar economic dinhmun lah a tlathla vawng vawng (free fall) an ti. Kan hotupa vuak dup sa tak  ngial pawh kan chhawr ṭangkai thei lo mai ang tih a hlauhawm ta. Inlarna chawi lartuten mutmu tuah lovin inralrinna dar an vaw chel chul ta mai. Arsi chu a en vanglaiin a thim ta rup mai tihte chu under current-in a vak chak hle leh nghal a. MNF Quavadis?

Ka lungkham lian ber chu lo vah /hal bansan nan Mizo method buhkhur/terrace hmangin kum khat chhung lekin ei leh bar i thar chhuak phawt teh ang u. Ramsa, ramngaw, tuihna, sik leh sa humhalhna kawng awmchhun chu Mizo method hi a ni. Leilet awm saa vai chhawr tawh lovin co-operative movement-in mechanize farming-in i thar chhuak ṭeuh mai ang u. Kan ram ṭha lai ber Inner Line Reserved Forest, sq.m. 509 khu a neitu Mizoram sawrkarin la let lehnghal se la. Leilet awm sa aṭang khuan rice mill bunin kum khat chhungin kan intodelh mai ang chu. 'Vai an tam tawh em mai' tih chhuanlama mahni ram leilung humhalh ngam lo hnam nih tluka tlawmthlak leh zahthlak a awm lo. Mizoram hnam dam reng rawh se.

- Vanlalngaia