Minister-te'n râlna an hlan dan kha

Kumin April ni 28 tlaiah vanduaithlak takin Lengpui daia kawng chhak lam aṭanga lung tlain car chhunga chuang Falkland veng mi pali zinga pathum lai a delh hlum a, a pawi tak zet. Hei hi khuarel chhiatna kan tih ṭhin ang a ni a, Mizoram sawrkar pawhin a tuk April ni 29-ah mitthite vuinaah sawrkarin a râlna (ex-gratia) an hlan nghal. Râlna hlan dan hian sawi zui a kai hle a; mi eng emaw zatin social media-ah an sawi tawh a, kei pawhin han sawi ve ka tum a ni.

Falkland venga chhungkaw pakhata mi pathum lai khuarel chhiatna vanga thite sawrkarin râlna a hlan nghal hi a lawmawm em em a, thil ṭha tak a ni. Mahse, mi tam takin an sawi angin, vuina inkhawmah, ruang awm lai renga an hlan erawh Mizo tih dan phung ngaihtuahin, a mawi lo viau. Mi tam takin an sawisel rêng a.

Mizo tih dan phungah chuan ruang awm laiin râlna kan inpe ngai lo a, ruang thlâk hnuah kan inpe ṭhin. Mitthi vui ni-a râlna inpek hrim hrim erawh a awm fo a, mahse, vui zawhah, phûm tura ruang kalpui hnuah a ni ṭhin. Tih dan tlangpuiah chuan vui ni-a râlna inpek pawh hi khualkhua aṭanga kal, a hranpaa râlna pe tura kal leh mai mai harsat tawhte tih dan a ni tlangpui.

Kan sawrkar hotu lawk tak tak, minister pahnih laiin sawrkar officer liante nen thawk chhuaka vuina inkhawma râlna an han hlan rup mai kha chu a zialo tak zet; che ṭha leh che chak nih an tum lutukna lamah an hmanhmawh lua a ni. Râlna hlan tura khatia stage-a minister-te leh official rual din lan chhoh hung lah a ṭul hek lo.

Pawisa fai emaw, cheque dik tak emaw hlan duhtâwk mai lo a, cheque lem lian tak siama an hlân phei kha chu a zialo mai ni lovin, a zahthlak, a mualphothlak. Thlalak aṭang kha chuan mitthi râlna inhlan ni lovin, lawmman inhlan te pawh an ang zawk! Khatianga râlna hlantute khan 'zah' an hre lo em maw ni chu le, tih tur a ni a; vuina inkhawm buatsaihtu kohhran pawh zahna chhete tal pawh an nei lo em ni chu le, tih tur a ni hial!

Zo nun ze mawi kan sawi ṭhin, kum eng emaw zat Chapchar Kût thupuiah hman a ni tawh; kuminah pawh 'Zo nun ze mawi–hawihhâwmna' tih a ni. Kumina Chapchar Kût thupui 'Zo nun ze mawi–hawihhâwmna' tih hi kan minister-te'n khuarel chhiatna tâwkte râlna an hlan danah khan a bo chiang hle.

Politician-te hian lansarh leh lâr an duh a, a tum pawh an tum ṭhin a; an thil ṭha tih te, an chet velnate chu a langsar thei ang bera thehdarh an duh ṭhin. Chumi avang chuan Falkland venga chhiatna rapthlak tuartute râlna pawh khatiang khan an ti ta mai a nih a rinawm.

Lâr te, lansarh te, thil ṭha tihte mipui hmuh theiha tihlan kan duh viau rual hian, Mizo hnam nunphung te, tih dan phung te, thil mawi leh mawi lo, àwm leh àwm lo te ngaihtuah tel a ṭha khawp mai. Hei hi kan politician-te hian an hriat a ṭul zual; fimkhur mawlh teh se.

- Zoramchhana