Zirlai pawl leh politics

Mizo mipui tam tak chuan Mizoram pum huapa zirlai pawlte hi an hruaitute'n politics kailâwn atan an hmang ṭhin niin an ngai a; a dik thawkhat rualin, zaa za chuan a dik bik lo.

India ram state dangah chuan zirlai pawl eng emaw zat an awm a, political party zawmpui an nei hlawm. Mizoramah erawh chuan chutiang chu a ni ve chiah lo a, a lawmawm lam a ni. Congress zirlai pawl NSUI erawh chu Mizoramah an din a, party dang erawh chuan zirlai pawl an nei lo niin a lang.

Kan rama zirlai pawl kan neih heng–MZP, MSU leh SSU te hian political party zawm bik an nei lo a, mahse, an hruaitu lawkte zinga tam tak chuan party âwn lam an nei ṭhin niin an sawi. Chu bakah, hruaitu zinga tam tak chu hruaitu an nih loh hnuah political party-ah an lut bawk. Chuvangin, zirlai pawlte hi mi tam takin politics kailâwn atan an hmang tia sawi awm ṭhin hi a dik lohna a awm lovah a ngaih theih ang.

Kan zirlai pawl zingah MZP hi an lar ber a, an upa ber bawk awm e, MSU pawh an lar thawkhat viau. SSU erawh hi chu zirlai ni chunga mahni inchâwm lam tuipuitu leh chutiang lama hma latu an ni a, a 'spirit' hi a ṭha hle mai a, an hruaitute pawhin intihlâr nan leh politics kailawn atan an hmang ve lem lo niin a lang.

Zirlai pawl hlun ber MZP hi han en zui bik ta ila. An hruaitu zinga tam tak chuan hruaitu an nih loh hnuah political party an zawm a, ram hruaitu MLA ni zui ta leh minister hial ni pawh an awm nual tawh. Hruaitu zingah President lo ni tawhte han thlûr bing leh ta ila, MZP a reh vang vang hnua 1990s vela tharthawh leh a nih aṭanga president-te bik kan en ang.

Kum 1993-1995 leh 1996-1997 chhunga MZP President Pu Lalmuanpuia Punte-in political party a zawm a, ZNP leh ZPM-ahte awmin, hun rei tak politics a khel tawh (MZP President a nih hnuah MNF a zawm hmasa berin ka hria a, ka chiang tawh lo). MLA a ni ve thei dawn ta lo emaw tih hnuah kum 2023 inthlanah a tling ve ta hlawl a, tunah hian MLA a ni mek. Kum 1995-1996 chhunga President Pu K. Vanlalvena chu MNF niin, MNYF President-te pawh a lo ni tawh a; tunah hian Rajya Sabha MP a ni mek a, MLA inthlanah a lo ding ve tawh ṭhin bawk.

Kum 1997-1999 chhunga President Pu Lalruatkima chu MZP President a nih hnuah Central YMA-ahte hruaitu a ni a, chumi hnuah MNF a zawm a, tunah hian MNF Treasurer a ni mek. Kum 2008, 2013, 2018 leh 2023 inthlanahte Aizawl West-II bialah MNF candidate a ni a, 2013 leh 2018-ah MLA atan thlan tlin niin, kum 2018-2023 chhung Minister a ni.

Kum 1999-2001 chhunga MZP President Pu R. Vanlalvena chuan Congress party a zawm a, kum 2013 khan MLA atan thlan tlin a ni a, tunah Congress party-ah a la awm mek. Kum 2001-2003 chhunga President Pu Lalchhandama Ralte chuan MNF a zawm a, tunah MNF Vice President a ni mek. MNF aṭangin MLA candidate a lo ni fo tawh a, kum 2006 khan by-election ah MLA atan thlan tlin a ni a, kum 2018 leh 2023 MLA inthlanpuiah thlan tlin a ni leh bawk a, tunah hian Leader of Opposition a ni mek.

Kum 2003-2005 chhunga President Pu C. Lalrokhuma erawh chuan tun thlengin political party a la zawm lo niin a lang. Amah hi khawtlanga inhmang tak a ni a, pawl dang ṭhenkhatah hruaitu pawimawh a ni bawk. Kum 2005-2007 chhunga President Pu P.C. Laltlansanga chuan MNF a zawm phawt a, MNF ṭhalai President pawh a ni ṭhin. A hnuah Congress a zawm leh a, MLA candidate pawh lo ni tawh a ni.

Kum 2007-2009 chhunga MZP President Pu C. Lalhmachhuana chuan Congress party a zawm a, tunah thâwm a nei lo angreng a, political party-ah chuan a la awm zel turah ngai ang. Kum 2009-2011 chhunga President Pu V.L. Krosshnehzova chuan MNF a zawm a, nihna pawimawh tak a chelh a, MLA candidate tur pawhin a hming a lang ve fo mai a, mahse, candidate chu a la ni ta chiah lo a ni awm e.

Kum 2011-2013 chhunga President Pu James Thanghmingmawia'n Congress party a zawm a, MPCC-a department pawimawh takah Chairman pawh a ni tawh ṭhin a, tunah tak hian eng chanvo nge a chelh ka chiang lo. Kum 2018 MLA inthlanpuiah Tuichang bialah Congress candidate a ni. Kum 2013-2015 chhunga President Pu Lalhmachhuana'n Congress party a zawm a, nihna pawimawh tak a chelh zui. Kum 2018 leh 2023 MLA inthlanpuiah khan Serlui bialah Congress candidate a ni.

Kum 2015-2017 chhunga President Pu Lalsangzuala Ngente pawhin Congress a zawm a, ani hi chu a langsar vak lo. Kum 2017-2019 chhunga MZP President Pu L. Ramdinliana Renthlei erawh chuan tun thlengin political party a zawm lo a, zawm a tum lo pawh a ni mai thei. Khawtlang leh thil dang dangah a inhmang viau a, a awmna vengah YMA hruaitu pawimawh, President ni ṭhin a nih bakah, Central YMA thlengin hruaitu a ni mek a, ZORO-ah hruaitu pawimawh tak a ni mek bawk.

Kum 2019-2021 chhunga President Pu B. Vanlaltâna chuan MNF a zawm a, vanduaithlak takin ani hian chatuan ram min pansan tawh. Kum 2021-2023 chhunga President Pu Lalnunmawia Pautu chuan President aṭanga a chawlh veleh MNF a zawm a, tunah hian MNF ṭhalai Vice President a ni mek. Tuna kum 2023-2025 chhung atana MZP President ni mek chu Pu Lalthianghlima a ni a; kumin September/October velah MZP hian President thar a nei lehin a rinawm.

Heti hian tun dinhmun an tarlang ta ila:

1. Lalmuanpuia Punte ZPM

2. K. Vanlalvena MNF

3. Lalruatkima MNF

4. R. Vanlalvena Congress

5. Lalchhandama Ralte MNF

6. C. Lalrokhuma No party

7. P.C. Laltlansanga Congress

8. C. Lalhmachhuana Congress

9. V.L. Krosshnehzova MNF

10. James Thanghmingmawia Congress

11. Lalhmachhuana Congress

12. Lalsangzuala Ngente Congress

13. L. Ramdinliana Renthlei No party

14. B. Vanlaltana (L) MNF

15. Lalnunmawia Pautu MNF

Heng kan tarlan aṭang hian zirlai pawl hruaitute'n zirlai pawlte hi politics kailâwn atana an hman leh hman loh chu a chiang mai a; mimal ngaihdanah han dah zui ta ila. MZP bikah chuan kum 1993 aṭanga President lo ni tawh mi 15 zinga mi 13 chuan political party an zawm a, nihna pawimawh tak tak an chelh hlawm. Mi pahnih Pu C. Lalrokhuma leh Pu L. Ramdinliana Renthlei te rawh chuan tun thlengin party an la zawm lo thung.

Sawi tawh angin, MZP President ni lo, hruaitu dang zingah political party-a lut tam tak an awm tawh a, MLA leh Minister hial ni tawh pawh an awm nual a ni. 1990s chhova MZP tihnun thar leh a nih hmaa MZP hruaitu lo ni tawh zingah pawh political party-a luta MLA/Minister ni tawh an awm nual bawk.

Zirlai pawlte hi an hruaitute'n politics kailâwn atana hman tum leh hmang ṭhinah mi tam takin an ngai niin a lang a. Zirlai pawl ngaithei lo deuhte phei chuan mi sum thawh chhuah sa an dawn (donation) hmanga ei zawngah leh zirlai pawl hruaitu nih chu eizawnna atana hmang angah an ngai ni pawhin a lang. Hengte hi an hruaitu ṭhenkhatah chuan a dikna lai pawh a awm ang a, mahse, a dik vek bik lo tih hria ila. MZP hruaitu zingah eizawnna mumal tak dang neia tel te, pawl an chhuahsan hnua an thiamna hmanga hna ṭha tak tak hmute pawh eng emaw zat an awm ve a ni. political party zawm tum lo tam tak an awm ve bawk.

Kan zirlai pawlte hian thil tih fuh tawk loh an neih changa a chhe thei ang bera han sawi zui ta buan buan maite an awm ṭhin a, hetiang hi chu a ṭha bik lo. Zirlai pawlte hian thil ṭha tam tak an ti a, an hmalakna avanga a ṭha zawnga hlâwkna thleng, ram leh mipuiin an ṭhatpui pawh tam tak a awm tawh awm e. Na tak taka insawiselna leh indiriamna ang chi hi a ṭha ber lo a, insawisel pawhin siamṭhat duhna rilru aṭanga tih ni zel thei se a ṭha a ni.

- Zothana Khiangte