Ruang awm laia râlna hlan

Falkland Venga Pu Lalrinliana te nupa leh an fanu chu vanduaithlak takin Lengpui Airport kawngah lung tlain a delh hlum hlauh mai a, an lainatawm tak zet a ni. Kha vanduaina kha a pawi a, anmahni thiam loh pawh a ni lo a, an vanduai tak zet a ni. A hria a piangin an thihsan an fapa pahnih an tawrhpui a ni.

Hetiang vanduaina hi hman ni lawkah Ngaizelah pawh a thleng tawh a, sorkar chuan a vuinaah râlna hlan a nih kha. Râlna leh luman hi chu ruang thlak hnuah ni se a mawi zawk hmel.

Miin chhiat an tâwk a, mittui nen an awm mek laia langsar taka râlna hlan kha a fuh mawlh lo. A bik takin Falkland venga mite chhiattawh dan kha a rapthlak em em a, an rilru a na ngawih ngawih ngei ang. Chutih laia a vuina inkhawmah cheque lem lian tawk kan minister pahnihin an han hlan kha chu tih tawh loh tawp chi a ni.

Disaster Management &, Rehabilitation Minister Pu K Sapdanga a nih lai kha Cyclone Remal vanga Melthum leh Hlimen chhiat tawh lai a ni a, sorkarin a ralna a hlan ngei a. Mahse, an ruang chungah ni loin Minister khan a ipte aṭang pawisa a phawrh a, a hlan mai a, kha kha Mizo tih dan phungah inrâl dan dik tak a ni.

Ruang awm laia langsar taka cheque lem nena râlna inpek kha chu sim hmak chi a ni. Kha thil khan sawisel a hlawh viau mai. Sawisel pawh ni se a awm khawp. Mipuiin an sawisel, thil mawi lo ang chi hi chu ram hruaitute hian mênah thlak mai loin, an ngaih pawimawha an zawm ngei a ṭha hle ang. Ram hruaitu lian nih avangin 'Ka tih chu ka tih' tih ngut tur a ni bik lo.

Mitthi vuinaah râlna hlan mai a ni lo, DMR Minister thar leh bialtu MLA, Forest Minister ten stage-ah an hlan khan sawi a hlawh zual viau a ni. ZPM sorkarah hian mi ṭhenkhat chuan tih ngai loh an ti ta nual nia sawi pawh a awm.

ZMP sorkar chu sawisel la hlawh vak lo a ni a, hna an thawk ve dawn chauh a, ho te teah sawisel an hlawh ta fo hi chu an inen let ve chu a ngai a ni. Mizo hnam kalphung en mil ve deuha an chet erawh mipui lam chuan kan phût ve viau a ni tih lo hria se a lawmawm khawp ang.

- Melissa Pa