MNYF leh kuhva rah tawlhruk

April thla tawp lam khan MNYF ten Thingdawl Polytechnic building-a kuhva rah man sa, Kolasib DC lamin an lilâm avanga phurh chhuah vel an zuk en a, video vel pawh a darh nasa viau mai.

Ram dang kuhva rah man sa dah khawm, court-in tihral tura a tih tawhte MNYF ten an zuk tlawh hrim hrim kha a ṭha a, thil awmzia dik tak an zuk hriat phah ngei ang le. Kolasib-a sawrkar thuneitute'n thil awmzia an lo hrilhfiah miau a. Dan tlawhchhante nena Kolasib SP-in emawni a hrilhfiah malh malh laiin MNYF lama mi pakhatin "Dan hre tura lokal kan ni lo," a'n lo ti zauh ngeiah. Ka duh thei e! Ka nuih a zat viau rualin, a thil sawi kha MNYF nen inhmeh ka ti ru phian bawk si.

Ka sawi tum tak zawk chu, MNYF ten Thingdawla kuhva rah man sa dah khawm an zuk enfiah chungchanga press release an siama a tawp lam thu kha a ni. An press release-ah chuan "... dan kalha Burma kuhva ro kan buaipui mup mup laia nimina Tuirini bula Burma kuhva ro Truck lian Trip 3 ualau taka khawchhak lam aṭanga an rawn la phur thla zel te hian Mizoram hi Smugglers te zalenna hmun ah ZPM Sorkarin a siam mek zia a tilang a ni," an ti a.

"MNF Ṭhalaite hian ruihhlo leh dan lova kuhva ro a sumdawng Smugglers te an zalen ta lutuk hi pawi kan ti a, hemi kawnga Mizoram sorkar a huaisen ngamlo hi a vanduai thlak kan ti. MNYF chuan drugs leh Burma kuhva ro a sumdawnna kan do zel dawn a, Mizo mipuite pawh min ṭawiawma min pui turin kan sawm a ni," an ti zui bawk. Press release No.MNYF PR -47/2025-26 hi Media & Publicity department Secretary H. Lalawmpuia tih hminga chhuah a ni.

MNYF ten kum 2018–2023 chhung an sawrkar laia kuhva rah tawlhruk do lova tuna an do ta hi a lawmawm lamah ngai phawt mai ila. An sawrkar lai khan do nachang lo hre tawh ni se chuan an 'sawrkar power' hmangin an titawp thei tur hi a ni a. An harh chhuak tlai mah mah a ni. Mahse, harh chhuah loh ai chuan a ṭha tho mai.

An press release-ah '...Burma kuhva ro truck lian trip 3 ualau taka khawchhak lam aṭanga an rawn la phur thla zel te hian Mizoram hi smuggler-te zalenna hmunah ZPM Sorkarin a siam mekzia a tilang a ni," an ti a. MNF sawrkar laiin nge ZPM sawrkar lai hian kuhva tawlhruk zalen zawk tih dik takin an sawi duh kher lovah ngai ta ila. MNF sawrkar lai kha chuan sawrkar hriatpuiin Burma aṭangin kuhva tawlhruk a ni a, sawrkarin mit a siai thu leh chhiah pawh a lak thu MNF sawrkara Home Minister-in a sawi hial a nih kha.

MNF ṭhalaite'n kuhva smuggler-te ZPM sawrkarah an zalen ta lutuk pawi an tih thu leh sawrkar a huaisen ngam lo chu vanduaithlak an tih thu a sawi a. Mahse, kei chuan MNF sawrkar laiin kuhva tawlhruk a zalen fe zawkah ka ngai ve thung. Kan hmuh dan a inang lo hle mai! Champhai DC, Mizo nu huaisen tak hmalakna leh a kaihhnawih thilte kha chu sawi zui tawh lo mai ang.

Engpawhnise, MNYF ten Burma kuhva roa sumdawnna an do zel dawn thu an sawi hi a lawmawm a; dâwt leh thu dik tluantling lo tel lovin thil dik lo chu han do zel mai teh se.

- Lalhlanpuia