Zo tui thiang te, luang dem dem rawh

Kum 2021 ṭhâl zet kha zawng ka hriat phâk ve chinah a ṭhâl na ber awm e; Zoram khaw hrang hrang tui nei lo au-aw a ring ngei mai. Aizawl khawpuiah meuh pawh tui connection dilna tihtawp lailawk a ngai hial mai. Lunglei khawpuiah pawh he harsatna hi a nêp chuang hauh lo, a chhehvel ram kâng ṭhelhna tur tui chawi turin thlawhtheihna hial chah luh a ngai ta a nih kha! Social media lamah pawh heng thute hian tui harsatzia an tilang chiang hlein ka hria: ‘Fapa pali nei ila, pahnih IAS, pakhat doctor, pakhat tuisem,’ tih te, ‘Hmelṭha viau mah la, tui in nei bik lo. Tlangval officer aiin tuisem an luck zawk,’ tihte leh thil dang tam tak a awm.

Kuminah pawh hian Lunglei khawpui chu tui harsat avangin a rûm leh a, ruah surtir turin mi tam takin Pathian an au a ni. He harsatna nasa tak hian tuihna humhalh kawngah Zo fate min tiharh zo lo a nih chuan, kan tu leh fate nakin hun tur chu ngaihtuah thui ngam pawh a ni meuh lo. Hei hi ‘Zo tui thiang te, luang dem dem rawh’ tih hla sa ṭhintute tun din hmun a ni e.

Khaw pakhat VCP chuan ti hian a sawi a, ”Kan khuaah chuan Krismas leh kumthar laia zaikhawmna a lâm taima ber berte kha a hnu deuh lawk ṭhâl tui kang nghahna hmuna hmasa nih inchuh chak leh insual huai ber berte an ni,” a ti. Khaw pakhat VCP ve thung chuan ti hian a sawi ve bawk a, “Zan lama ṭhâl tui kang nghah avangin nuthlawi kan pun phah ziah,” a ti. Tui harsatna hian kan thlarau nun thlengin nghawng ṭha lo a nei thei a ni tih a tilang chiang hle. Kan tuihna hi a kang zel a nih chuan hei aia chanchin ṭha lo zawk hi kan la hmachhawn thei dawn bawk a ni. ”Hmarvenga cheng Pu Sanga chuan an ṭhenawm Pu Kunga zing ni lum ai lai chu thingfakin a vaw hlum. Pu Sanga hnen aṭanga thu kan dawn danin, Pu Kunga hian an eirawngbawlna tur tui a ruk sak niin a sawi,” tihte leh, “Kan khua chu tui khamkhawp kan neih tak loh avangin chhimthlang lam kurung lui ruamah nakum chu pêm kan tum,” tihte hi kan chanchin thar turte an la ni lo vang tih hi tu nge sawi thei?

Ni e, tui hi a hlu tak zet a, tui tel lovin tumah kan nung thei lo. Chuvangin, tui tel lovin khawvel leh a chhunga thil awm zawng zawngte pawh hi min pe dawn se, tuma’n kan duh lo vang. Chuti taka hlu si chu a aia ngaih pawimawh leh hlut kan ngah hle thung si.

Engvangin nge tui kan harsat tak em em le? A chhan bul ber chu kan lui châwmtu ber ruahtui dawhthleng (catchment area)-a ramngawte kan tihchereu vang a ni. Tin, tuihna tihpun kawngah hmasawnna awm mang si lova a eitu kan pung ve zel hi a ni bawk. A pahnihnaah chuan, kan lui tuite sawngbawl thianghlim theih loh khawp hiala kan tihbawlhhlawh ṭhin vang a ni. A pathumnaah chuan, chhiatna hial thlen thei khawpa ruahtui tam dawng si hian a dawh khawl lamah kan pachhe leh em em thung si hi a ni. Heng harsatna thlentute hi keimahni kan ni a, a tikiang turin mawhphurhna lian tak kan nei a ni.

1. Catchment area-a ramngaw venhim leh huan lo ram enkawl chungchanga mawhphurtu kan ni.

Catchment area-a kan ramngawte hi humhalh an ngai hle. Zo fate eizawnna bulpui ber chu huan leh lo siam a ni a, chuvangin, catchment area-ah pawh huan leh lo siam tam tak kan awm a ni. Kan eizawnna zahawm tak hi tuma’n kan sawisel lo va, amaherawhchu, kan tuihna khawih pawi lo zawng leh awmze nei zawka kalpui dan erawh kan thiam a hun tak zet. Zo fate hi mi tlawmngai tak kan ni a, chuvang chu a ni ang mi ṭhenkhat chuan ṭhenawmte tuihâla an mangan ai chuan tiin an ram hlu tak luikawr hnara mite chu ramngaw siam nan khawtlang tan an hlan let mek a ni. Catchment area venhim leh enkawl dan tur tlem tarlang ila a ṭha ang e.

(i) Catchment area-a ram neitute tan ruahhmanna fel siam a hun hle:

Ruahmanna fel tak a awm loh avangin ram neitute’n an duh zawng thlai an ching hi dem ngawt tur a ni lo. Catchment area-a thlai chin phalna leh thlai chin tur ruahmanna siam a hun tawh hle a ni. Kan tui hnar-a teak te, oil palm-te leh fu huan zau tak siamte hian kan tuihna a tichhe thei hle a ni tihte pawh kan hriat a hun hle. Khawvela oil palm thar chhuak hnem ber Indonesia pawhin tuihna a tihtlem avangin an manganpui hle tawh a ni.

Tin, thlai kung lian lo leh bawrchhawr deuh heng kuhva leh serthlum te hian lei chunglâng kal ral tur an veng nêp hle a, lei chhungril lama tui lut tur pawh an ṭanpui nêp hle. Heng thlai hmun awm tawhte hi tuihna tipung tur zawnga tihchangtlun a ngai tak zet a ni. Lei chhawrdawh (terracing)-te leh thlai kara tui luang ral tur venna khur (recharge pit) siam te a pawimawh. Kan tui tlan lai lui kawr vah pawh kan la ching fo hi a ṭha lo hle. Khaw ṭhenkhat chuan luikawr thlenga lo vat lo turin thuchhuah an siam a, a lawmawm hle a ni. Tin, catchment area-a huan neite tan heng damdawi leiṭha (chemical fertiliser) te, rannung thahna hlo (insecticide) te, hnim tûr (herbicide)-te leh chemical hlauhawm hrang hrangte hman khap ni bawk se.

(ii) Catchment area-te kangmei laka venhim:

Fimkhur tak chung pawhin ram hi kan tikâng palh fo. Chutih rualin, kangmei chhuak tam tak hi chu inthlahdah leh fimkhur loh vanga kâng ta te a ni deuh ber. Lo hâl hmaa meilam sial ṭloh te, a hâl hun lova hâlte leh ramkal ṭhinte fimkhur loh avangin ram kan tikang nasa hle ṭhin. Rei lo te chhungin a kâng chhia a, a siam ṭhat nan erawh kum tam tak chhung a ngai leh si ṭhin. Ram tihkan pawizia hi chhung tinte inzirtir thar a pawimawh tak zet a ni. Kan ramin ruahtui a dawng ṭha a, kangmei laka ram a him phawt chuan fûr khat chhung lek pawhin a lo hring dup mai a, kum sawm a ral meuh chuan a lo ngaw ve leh viau zel a ni.

(iii) Catchment area-a hmasawnna ruhrel siam dawnin fimkhur a ngai:

Hmasawnna hna (project) thar eng pawh ruahman a nih hmain a tihchhiat tur a awm em tih ngaihtuah hi thil ṭul leh tihmakmawh a ni. A awm sa khawih pawi thei hmasawnna hna chu eng hna pawh ni se, hmasawnna tluantling lo, hmasawnna khingbai a ni tihna a ni. Catchment area-ah hmasawnna ruhrel kan ruahhman a nih pawhin kan tuihna tichhe lo zawnga ruahman thiam a hun tak zet.

2. Bawlhhlawh senghawi chungchanga mawhphurtu kan ni.

Changkannain a ken tel bawlhhlawhte senghawi dan kan thiam leh si lo hi thil pawi tak a ni. Tunah chuan thil fûn chi (packaged commodity) tel lo chuan nun a kim tawh lo a ni ber e. Hmawmsawm, incheina (make-up), damdawi tuiril lam leh a sakhat, ran leh thlai enkawlna damdawi leh thil dang chi hrang hrangte hian fûnna an nei deuh vek a. Kan ni tin nunah an ṭangkai em em vek a, mahse, kan hman zawha a senghawi dan kan thiam leh si lo lai hi a pawi lai ber chu a ni. Tlang ram a awm, a tlang chhip lam zela khawsa kan nih avangin kan tui tlan lai kawrah bawk an luang lut leh vek ṭhin.

Kan tuipu (PHED)-te hian tui nû an thlifim thei a (thlit fim theih chin an nei), tuia natna hrik awm (pathogenic bacteria) an tihlum thei a. Mahse, a tuiril lam heng damdawi thi tawh tui te, make-up tui te, ran damdawi tui te, rannung thahna tûr te, thlai enkawlna damdawi tuite leh thil dang tam takte hi zaah za an thliar hrang thei lo va, dal deuh siin kan tuizemah bawk chhûn luh a ngai leh ṭhin. Chu chu bawlhhlawh paihtu keimahni thiam loh ngei a ni tih kan pawm a ngai. Kan duh duhna hmuna bawlhhlawh paih hi sim a hun tak zet a ni. Kan lui tuite hi ei tlak leh luia chengte tana chenna tlak a nih reng theih nan kan bawlhlawhte sawrkarin senghawi dan tur mumal tak an siam angin i senghawi ṭhin ang u.

3. Ruahtui dawhkhawl chungchanga mawhphurtu kan ni.

Tuihna humhalh dan ṭha ber chu ruahtui dawh khawl a ni. Vanneihthlak takin Mizoram hian ruahtui kan dawng ṭha hle a, kum khat chhunga Mizoram puma ruahtui tla zat chu cm. 232 vel a ni a, patling pil zân theihna khawp ruahtui kan dawng ṭhin tihna a ni. Mahse, a dawh khawl lama kan ṭhanharh loh avangin ṭhâlah tui kang kan nghak leh nge nge ṭhin. Khawpuiah chuan tui kan nghei dawn chuan rilruah PHED tui semtu a lo lang hmasa ber ṭhin a. Tui semtute’n kan duh zat min pek châk hle ṭhin mah se, ṭhâlah tui sem tur an neih tlem avangin duhkhawp min pe thei lo fo ṭhin. Tui khamkhawp dahna tuizem siam aia ngaih pawimawh thil dang kan ngah lutuk pawh hi inenfiah a hun tak zet a. Ruah chu a sûrna hmunah, a sûr lai ngeia dawh khawl nachang hriaa kan dawh khawl ngei pawh a ngai a ni.

A tawp berah chuan, khaw tinin ‘Zo tui thiang te, luang dem dem rawh’ tih tur lui kan neih ṭheuh theihna turin kan lui hnârte humhalh ṭha ila, kan lui tuite tibawlhhlawh lo ila, ruahtui dawh khawl uar bawk ang u.

- Er L. Sawthly, Khatla East