Lîr lo nghîng palh ta se

Mizoramah chuan khawvel dangin an tawrh ang lirnghing emaw, tuilian nasa emaw kan la tawng lo a, a vanneihthlak ngawt mai. Lirnghing lian tham han tawng ve palh ila, tia ngaihtuah ringawt pawhin kan tawrh rapthlak dan tur hi ngaihtuah ngam pawh a ni lo.

Mizoram chu state dang angin khawpui plan mumal a awm lo a, kawng kamah in kan sa a, kawngpui kan nêk chêp ral lo chauh a ni mai a. Khâm bakbarekah in kan sa a, tui luankawr a awm ṭha lo a, mahni tuichhe paihna takngial pawh ngai pawimawh loin thlang lamah a luang vel mai mai a; leimin pawh kan tawng ta nual a nih hi.

Khâm panga in sak kan huai nasa mai si a, khawvel dangin lirnghing a tawn ang hi tawng ve palh ta ila kan va chhe nasa dawn em! Chutiang chhiatna chu tawng palh ta ila, kan leilungin a zir si lo a, han inchhan chhuak thei tur pawh kan awm lo thei hial ang.

Hetiang lam ngaihtuah chuan kan sorkar kal tawhte leh kan officer hmasate’n plan mumal an siam loh vang a ni. ‘Se bo hnua se kawng khâr’ an sawi angina, tunah chuan Aizawl khawpui enkawltu tur AMC a awm ta a; strict takin khuahkhirhna nen khawpui enkawl zel mah se, a tlai zo tawh bawk si.

Chhiatna rapthlak kan tawrh rih lohna ber nia an sawi chu kan Kristianna hi a ni e, an ti a. Kan nu leh pa, pitar leh putar tê tête’n Pathian an auh nasat vang a ni e, te an ti bawk a; a dik thawkhat ngei ang.

Lirnghing lian tham kan tâwk rih lo hi Pathian min venna a ni berin a lang. Khawvelah kan chêng miau si a, engvang mahin lirnghing hian min tuam lohna bik tur a awm lo. Kan in leh lo din dan te, kan in sakna hmunte'n a zir ngang si lo. Hmun rem lo leh khan bakbarekah kan han inbêngbel ṭhin si a, kan tuar a nih ngat chuan khawvel ram dang aiin kan tuar nasa bik ngeiin a rinawm.

Sorkar kal tawhte'n ruahmanna ṭha an siam loh vangin kan dem ngawt tur a ni bik lo ang. Keimahni cho chhuah a ni ve thei bawk a ni. Mahni in sakna hmun te, kan sak dante inenfiah a ṭul viau a ni.

In sakna hmun tur thlang uluk lehzual ila, khâm leh hmun âwih te hi i ngam lutuk lo teh ang u. Hun lo la kal leh zel torah chuan Mizoram sorkar leh AMC lam pawhin dan an neihte hi a nihna ang taka kenkawh ngam a ṭul tak zet a ni.

Ṭawngṭai mite’n Pathian an auh vanga him angin kan inhria a, mahse, eng emaw palh tâwk thei reng kan nih hriain, inrâlrin reng erawh chu kan tihmâkmawh a ni.

- Lal Rinmawia