Pathian ṭih chu sual huat hi a ni

Nikum hmasa maia pu ni ta Pu Vanlasailova hla, ‘Simna tel lo pianthar a tâwk lo ve, sual haw lo mualpho hlau mai ringtu chu tihboralin an la awm dawn e’ tih hla ṭha tak mai kha kan hre ṭheuh awm e. Kha hla a phuah aṭang khan kan ramah sim si lova piangthar hming pu, sual haw lo mualpho hlau boral ta eng zat chiah hi nge awm tawh ang?

Pathian thu hi hmangaihna, khawngaihna, ngaihdamna leh chhandamna a ni tihte chu kan hre lutuk a. Chu chuan min chhûm hmin a, ‘Pathian ṭih hi sual huat a ni’ tih kan pawm tel duh dêr lo. Fate'n pa ber tih dik loh an ṭan tlat a, nu leh pain fate thiam lohna leh dik lohnaah pawh an mualpho loh nan tiin khuh mawi hram hram kan tum a. Changkanna khingbai, mi rethei leh hausa inkar tizau zawngin tun hi kan thleng ta a ni.

I nu leh i pa kha hmangaih la, an dik lohna erawh chu haw ve rawh. I fate kha hmangaih la, an thiam lohnaah erawh ṭan bik suh. Chhungkuaa u leh nau inhmangaih tawn pawimawhna kan infah mawlh mawlh reng a. A rawng kan bâwlsak kan Lalpa Isua Krista ber lah chuan, "A nu emaw, a pa emaw, a fate emaw, a unaute emaw kei aia hmangaih zawk chu ka mi ni tlak a ni lo," a ti leh mauh mai si.

Ni e, fate hi hmangaih lovin kan khawngaih a, chhungkaw tam tak, pangngai tak, fel fai tak ni ṭhin kha kan lo tlabal ta a nih hi. Naupang nunnêm tak, thuawih tak, rilru fîm tak ni ṭhin kha tunah chuan zu ngawl vei, tuihhlo ngawl vei an lo ni ta a. Mahni engmah ni lo, fate mahni aia a leh sariha sualin kan lo chhuah ta a nih hi. He thu ziak chhiar lo lo kha chutiang mi chu kan la ni leh ta nghal a.

Pa ber ei ruk emaw, pa ber damdawi tawlh rûk emaw nu berin a zêppui a, fate’n an ṭan bawk a. Kan khawsak a awlsam phah ve a, kan Pathian ram a tam phahna a nih chuan pawi kan ti lem lo. Thil dik lo a ni tih kan hriat chian rengah pawh hetia chhungkua kan lo inṭan ve fir fer hian Setana chhiahhlawh rinawm, ram leh hnam hmelma, chhungkaw ei chhetu, ngêt siamtu kan lo ni ta ṭhin a ni.

Bible-in khawvela do lêntir tur leh khandaih lêntir tur, pa fapa dotir tur, nu fanu dotir tur, mo a pi dotir tura Isua lo kal thu a sawi lai a, ‘Chhungkua kan nia’ tia, heti tak maia dik lohnaah pawh kan lo inṭan ve chiam hi chu min tlantu Isua kan khengbet nawn fo tih i hre mawlh ang u.

Kan fate hi kan thu zâwma kan duh anga awm turin kan ti vek sêng lo. Kan nu leh pate pawh Pathian thu zawm famkim turin kan ti vek thei lo. Kan u leh naute lek phei chu Pathian thu zâwm turin kan ti sêng lo hrim hrim. Chutah tak chuan, kawng dik lova an kal pawha khaptu, zilhtu, thununtu, dotu fapa, fanu, nu leh pa, u leh nau nih i tum zawk ang u. An dik lohna kan lo ṭan ve phêt hian sual haw lo mualpho hlau ringtu kan ni a. Kan duh loh mualphona leh lungngaihnain min vûr tho tho ṭhin tih hi i pawm ngam tawh ang u.

Tuna inchhîr lo, sim lo, insiam ṭha chuang lo, kan lo inngaihdam ve fo hi chu Pathian aṭanga chhuak ni lo, Setana aṭanga chhuak ngaihdamna, pawm nuam, hriat nuam, hmingchhiatna awm lo chi a ni a, sual huatna a tel lo. Inkhawm ṭhulh a ngai lo va, laina hnaite leh mi vengva deuh nia kan hriatte'n fel, rilru zau min ti a. Bible erawh chuan sual haw tur leh unaute hmangaih turin min lo ti bawk si a. Nang leh kei, Pathian leh khawvel hi chu kan thu a hrang reng dawn a nih hi.

Thupek ropui ber, ‘Thinlung zawng zawng, rilru zawng zawng, chakna zawng zawnga Pathian hmangaih a, a tlukpui, mahni inhmangaih anga vengte hmangaihtu turte hian kan Pharisai-na aṭangin kan tih loh tur zawk kan ti a. Huat tur kan hmangaih a, hmangaih tur zawk kha kan haw tlat a; mihring mihrinna aṭanga ṭha nia kan hriatte ngei hi kan ram ei chhe mektu chu an ni. A hun ngaihtuaha zirtirtu ni tawh ṭhiau âwm ni mah ila, Pathian thu bul A Aw B aṭanga ṭan lehin, ‘Pathian ṭih chu sual huat hi a ni’ tih i zir ṭha leh ang u.

- Muandinga, Nausel