Champhai Chhangphut Chhehvel - Lalnghinglova Hmar (Tetea)
Zemabawk kan thleng phei a, Bethlehem Vengthlang fans ṭhenkhat, flag eng intara bike-a min rawn tlan pel ka hmuh aṭang khan a nuam nghal tawh a, Chhangphut Field-ah ngei Mizoram Premier League khela football an han pet chiah kha chuan a nawmna kha a sang tawh takzet a ni!
Ni e, a vawi khatna atan Mizoram Premier League chu Lammual pawnah khelh a ni a, Champhaia Chhangphut Field hmingthangah October 6&7 khan MPL 5 round 7 chu khelh a ni. He inkhel chanchin hi sawi ka tum ber a ni lo a, a chhehvel chanchin hi sawi ka châk zawk chu a ni. Ṭhenkhatin ram hnuk a khawih lo an ti ang a, ṭhenkhat tan ninawm a ni thei a; nimahsela keini football 'mai mai' buaipuitu tan chuan hei hi kan tleina a tling a, kan hlimna a tling a, kan lawmna a tling - he Chhangphut Field boruak hi.
Kalkawng mawlh kha!
Champhai lam chuan, "Kan kawngpui chhe lutukte hi min lo sawi sak teh u," an ti mai thei a, hei hi chu subject dang a nih vangin sawi ta lo ila, lirthei a rimzia leh tlan hleitheih loh a nih dante hi chu a football loh avangin sawi tel kher lo mai ang!
Tuirial velah kawng chhe karah Bethlehem Vengthlang fans ṭhenkhat nen kan inpel chho nawk nawk a, Chanmari FC fans kan hmu a, MPL co-sponsor Gionee lam an rawn thawk rip chho viau bawk a, football vanga khati zat 'palai' kan han zin chhuak kha a nuam tawh hrim hrim.
Ni e, Europe-ahte chuan kar khat dan apiang deuhthawin hetia zin chhuahna remchang hi a awm zel a, a huhoin relah leh bus-ahte an chuang a, an ri mup mtp ṭhin. Keini erawh kan economy-in a la zir lo a, vawi khat zin chhuah pawh a suala sual tham a ni a, a kal chhunte chuan a nawmzia an hria ang - kalkawng nuam lo leh hrehawm zawng zawng kha Champhai leh Chhangphut Field boruak khan a hliahkhuh zo ngei e.
Hei le Chhangphut Field!
October 5 chawhnu dar 3:00 velah Champhai kan lut a, kan thlenna tura kal hmasa loin Chhangphut Field kan pan. Champhai District Football Association (CDFA) hruaitute an lo awm a, MFA lama kan hruaitu ṭhenkhatte leh Zonet TV lam an lo awm tawh a, anni hi chu a hmunhma leh Tv lama chhuah dan turte buaipuia lo thleng hmasa an ni.
CDFA lamin thingpui min lo pe nghal thuai a, kan inchibai a, kan zinga kal ve la inhre ngai lote pawh an innel nghal sarh mai - football unaute vek an ni. A tuka inkhel tur player-te a chhehvelah an lo awm sap sap a, CDFA Grassroots an kalpui chu uluk takin training an lo nei mek a, Chhangphut Field chhung kan lut ta.
A chhung kan luh hma aṭang tawhin Chapchat Kut leh puipunna thil dang atana an hman chul ve loh khelmual hi a grass a la ṭha bik hle tih kan hmu a, a chhung kan dai chiah a, a danglamzia kan hria. training lo nei tawh kan MPL player-te kan zawt a, Chhangphut Field inkhelh a la nawm bikzia leh an grass a la ṭhatzia uar takin an sawi.
Tlai dar 4:00 vel a ni tawh a, ni a tla ṭan dawn a, favang boruak thengthaw nuam takah keini Aizawl aṭanga kalte chuan 'thlasik rim a nam' kan tih turin a vawt nuam raih tawh a, CDFA-in duat taka an enkawl Chhangphut Field aṭanga ni tla tur han thlir chu a nuam danglam bik a, tun hmaa khelmual ṭha duha lo au ve tawh ṭhin tan chuan a lungawithlak ngei mai.
Chhangphut chanchin
He khelmual hi CDFA ta a ni. CDFA chu keini Mizoram Football Association hnuaia unit pakhat an nih angin MFA lam chuan "kan khelmual," tia kan chhal ve theih a ni. He khelmual heti hian a lo awm tawp lo a, a phenah thil tam tak a awm.
Kum 1972 khan Champhai khaw pa thilphal pahnih, Pu R. Chalbawia leh Pu Damliana (Taitea) te chuan an ram hlu tak, chhangphut (wheat) an chinna ṭhin chu Champhai Games & Sports Association (CGSA) kutah khelmual siamna atan an pe a, 1999 khan CGSA ṭhiah a nih hnuah CDFA a lo ding a, anni kutah Chhangphut Field hi hlan a ni.
He khelmual hi CDFA hian theih ang anga humhalhin chei ṭhin mah se, duhthusama khelmual ṭha a ni hleithei lo. Kum 2013 a ni a, Chhangphut Field-a artificial turf phahna tur lungphum chu chief minister Lal Thanhawla'n a phum a, amah vek hian October 30, 2014 khan a hawng zui a ni.
He khelmual hi CDFA ta a nih angin artificial turf phah a nih hnuah pawh CDFA hian enkawl zui an duh a, sorkar lamin District Sports Association hnena hlan turin rawtna lo nei deuh tawh mah se, CDFA kutah lo chuan a him dawn lo tih an chiang a, CDFA kutah Chhangphut Field hi a awm chhunzawm ta zel a ni.
A inkhelhna hi 105x70 metres a ni a, khelmual tluan chhuaka hung vek a ni a, dressing room changtlung tak a awm bakah a gallery hnuaiah football team riah theihna tur a awm a, canteen-te an neih bakah chowkidar-te neiin uluk takin an enkawl.
Football tana siam chu football tan
Chhangphut Field hi Champhaia khelmual pawimawh ber a ni. Tun hma zawng chuan puipunna hmun ber a ni a, Chapchar Kut a ni emaw, eng puipun remchang pawh awm dawn se he khelmual hi an pan khawm mai ṭhin a, engkim tihna hmun a ni ber.
Kum 2014-ah artificial turf an phah zo a, hmun danga an 'tihsual' tawhte hre chungin CDFA chuan an khelmual enkawl dan tur an rel ta. Kum khata ni 365 awmah hian ni hnih chiah football ni loah a hman theih a, chu chu Republic Day leh Independence Day a ni! A bakah chuan football chiah a leng.
NGO ṭhenkhatin Chhangphut Field an hmang a, intlansiakna atan an lo hmang a, pawisa chawitir an ni! Dead ball a ni emaw, inûm a ni emaw, infiamna dang ang chi pawh ti dawn se, football a nih loh chuan an phal lo bur. "A theih ve tho alawm," tih ang chi thil dang tihna atan an phal lo a, tun thlengin khelmual ṭha tak an la nei thei - tun ang zela an enkawl chuan a tlo hle ang.
Ni e, football khelmual chu football atan pek mai hi a ṭha. "Tun hma pawhin chumi khami chu an ti ṭhin," han ti eng ang mah ila, tun hmain football khelhna bik turin artificial turf an la phah miau lo a, tun hmaa hman dan anga hman phêt tum hi cheng vaibelchhe chuang tihchhiatna mai a ni tih Lammual
aṭangin a hmuh theih - tunah chuan a grass a bel zo tawh a, tui a tling a, TV aṭang phei chuan a hring leh a dum zat a inang deuh thuak tawh - Chhangphut Field hi chu a tlo zel ang.
Tin, Lungleiah Ṭhuamluaia Ground hi Lunglei District Sports Association (LDSA) kutah a awm a, Lunglei District Football Association hian an duh hunah an hmang thei lo. An hman dawnin LDSA hnenah pawisa an chawi a, LDSA hian 'football' khelmualah hian LDFA hi thuneihna an pe lo. Lunglei football hruaitute rilru nâ hian vawi tam an rawn sawi tawh a, an tournament neih duh hunah NGO, school leh kohhran ṭhalai pawl etc sports vangin an hmang thei lo fo - LDSC hian "A book hma sa sa," an ti a, Lunglei football hruaitute chu Lungleia football khelmual ṭha ber hman danah NGO leh school-te nen inang rengin an en a, an book hmasak loh chuan duhsak an ni chuang lo - hei hi football ṭhanmawhbawk lian tak a ni, a tuartu chu Lunglei leh a chhehvel footballer-te an ni.
Football khelmual chu football tan tiin Chhangphut Field chu humhalh a ni a, hei hi hmun tina kal dan ni ta se, khelmual a tlo ang a, an phah chhan football-in hma a sawn bawk ang.
Match day a ni ta
October 6 chhun dar 11:30 a ni. Hnathawh ni pangngai a ni a, chhun ni sat vanglai tak a ni. Inkhel entu ṭhahnem tak beisei ngam a ni lo a; nimahsela mahni veng ṭan tur pawh ni loa 'football' en tur hrim hrimin chhangphut Field an pan khawm ta. Dar 12:00 a rik phei chuan khelmuala ṭhutna mawi hmak tham an pungkhawm tawh. Hun a kal zel a, inkhel half time-ah phei chuan an khat mawi tawk a ni ber.
Ṭhenkhat chu Sialhawk aṭangin an khaw tlangval inkhel en turin an lo kal a, Zawlsei aṭangin an khaw player inkhel an rawn en - Champhai chhehvel khaw hrang hrang aṭangin an pungkhawm a, Khawzawl
aṭangin ṭhahnem tak an lo kal a, Farkawn leh Khawbung aṭanga lo kalte pawh an awm.
Inkhel entu zingah sikul naupangte awm bawk mah se, Champhai khaw valupa
ṭhahnem tak kan hmu a, Chhangphut Field hmunhma petute ngei pawh inkhel en turin an la thawk chhuak. Sorkar official lam pawh an thawk chhuak ṭha a, a khaw nawtin Mizoram Premier League an hlut tih hai rual a ni lo.
A goal apiangin an 'au' hum hum thei a, club fing deuhin 'lam ṭang' an lo sawm a, veng vengin an rawn thawk chhuak a, veng hrang hrang information centre-ah an tlangau bawk a, an veng tlangval ṭan tur an lo nei fur nen, October 6 & 7-ah Champhai leh a chhehvela football fans Chhangphut Field-ah an pungkhawm ṭha hle.
Thawhpuite lam ve thung
Champhaia inkhel buatsaih mai hi chu a theih a, a hautak chu Mizoram pumin a chhim ve theih tura TV lama pek chhuah a ni. MFA thawhpui Zonet TV lam an thawk rip a, an khawl zawng zawng nen Champhai lam an pan. Chutah MPL sponsors lamte thil tarmawi zawng zawngin Chhangphut Field a thleng chho bawk a, Gionee lam phei chu mascot nen an chho a, mipui lawm pawh an hlawh hle mai.
MFA chu president Lal Thanzara hoin kan thawk chhuak a, Aizawla MPL inkhel mi pawimawhte chu an tel kim hle. MPL hi kum nga dang kalpui turin MFA leh Zonet TV lamin inremna Champhaiah ngei an ziak bawk a, he football inelna hi a la kal zel dawn a ni.
ZoFooty.com lamin an statistician-te an rawn thawn chho tel a, kan official photographer PC Lala a kal bakah a ṭawiawm turin Champhai lam an lo ṭang bawk a, hmun nuam zawkah, boruak nuam takah mipui ṭhahnem zawk hmaah kan inkhel ta tih loh chu Aizawl nen danglamna a awm meuh lo!
Thlen in aṭangin ka'n dak chhuak a, Vengthlang Biak In chhakah Dinthar FC hruaitu 'Maimawms' rual an lo nui uar uar a, a hlimawm a nia! Zanlaiah chak lawm football fans rual "Chanmari West," tia car chhunga au thawm kan hria a, Aizawl FC player-te Vengthlang bazarah an t-shirt ha ngeiin an han bazar a, Zo United-in Champhai khaw tlangval an neihte hmang ṭangkaiin 'thawhpui' an lo hui khawm a, Chhinga Veng FC ni se an jersey ha thei ringawt ṭhahnem tak an nei - football boruak a lian. Ramhlun North FC lam thleng tlai berin thleng hla ber mah se an thawm a lian a, hard core fans ṭhahnem tak an zin chhuak a, Chanmari FC-te Chhangphut Field bul Champhai College-ah inkulhin 'cool' takin an khawsa a, Bethlehem Vengthlang lah table topper tih takah fans an nei ṭha.
Champhaia Chhangphut Field-a thil thleng hi Mizoram football history-ah hriatreng a ni tawh dawn a, an khelmual an duat dan leh enkawl dan hi zir chhuak thei ṭheuh ila chu he MPL5 Round 7 inkhel hi a va hlawhtling lehzual dawn em!
